Skanda Purana · Chapter 7.9

// pulastya uvāca // //
tato gacchennṛpaśreṣṭha tīrthaṃ trailokyaviśrutam //
kedāramiti vikhyātaṃ sarvapāpaharaṃ nṛṇām

yatra mandākinī puṇyā sarasvatyā samāgatā //
tatra snāto naro rājanmucyate sarvakilbiṣaiḥ

śṛṇu rājanyathāvṛttamitihāsa purātanam //
ṛṣibhirbahudhā gītamarbude parvatottame

ajapālo nṛpaśreṣṭhaḥ sūryavaṃśasamudbhavaḥ //
saptadvīpavatīṃ pṛthvīṃ sa pāti nātra saṃśayaḥ

na hastino na pādātā na cāśvāstasya bhūpateḥ //
na rathāśca mahārāja na kośāśca tathāvidhāḥ

na gṛhṇāti karaṃ rājanprajābhyothādhikaṃ nṛpa //
rājyaṃ sa īdṛśaṃ cakre sarvalokahite rataḥ

jātāparādho bhūpṛṣṭhe jāyate cetkathaṃcana //
taṃ gatvā nigrahaṃ tasya cakruḥ śastrāṇi tatkṣaṇāt

evamasya narendrasya varttamānasya bhūtale //
sukhena ramate loko rājye nihatakaṃṭake

kāmaṃ varṣati parjanyaḥ sasyāni rasavaṃti ca //
gāvaḥ prabhūtadugdhāśca vidyamāne narādhipe

kenacittvatha kālena vasiṣṭho bhagavānmuniḥ //
tīrthayātrāprasaṃgena tasya gehamupāgataḥ

taṃ dṛṣṭvā pūjayāmāsa śāstradṛṣṭena vartmanā //
pratyutthānābhivādābhyāmarghyapādyādibhistathā

evaṃ saṃpūjitastena bhaktyā paramayā nṛpa //
sukhopaviṣṭo viśrāṃto vasiṣṭho munisattamaḥ //
rājarṣīṇāṃ kathāścakre devarṣīṇāṃ tathaiva ca // /

tataḥ kathāvasāne tu kasmiṃścinnṛpasattama //
papraccha vinayopetastaṃ muniṃ śaṃsitavratam

// ajapāla uvāca // //
atītānāgataṃ vipra varttamānaṃ tathaiva ca //
tvaṃ vetsi sakalaṃ brahmaṃstapaścaryāprabhāvataḥ

kautukaṃ hṛdi me jātaṃ varttate munipuṃgava //
prasādaḥ kriyatāṃ mahyaṃ kathayasva prasādataḥ

// vasiṣṭha uvāca// //
brūhi pārthivaśārdūla yatte manasi varttate //
kathayiṣyāmi tatsarvaṃ yadyapi syātsudurllabham

// rājovāca // //
kena karmavipākena mamaitadrājyamuttamam //
niṣkaṇṭakaṃ sadā kṣemaṃ sarvakāmasamanvitam

na dīno na ca duḥkhārtto vyādhigrasto na ko'pi ca //
vidyate mama rājye ca na daridro mahāmune

nārīyaṃ mama sādhvī ca prāṇebhyo'pi garīyasī //
maccittā madgataprāṇā nityaṃ mama hite ratā //
anayā ciṃtitaṃ brahmansarvaṃ vistarato vada

kiṃ dānasya prabhāvena vratayāgasya vā mune //
tapaso vā muniśreṣṭha vratasya niyamasya ca

janmāntarakṛtaṃ puṇyaṃ paraṃ kautūhalaṃ hi me //
kathayasva prasādena vistareṇa dvijottama

//
// vasiṣṭha uvāca // //
śṛṇu sarvaṃ mahīpāla vistareṇa ca kathyate //
na ca manyustvayā kāryo na ca vrīḍā mahāmate

anyadehāṃtare rājañchūdrajātisamudbhavaḥ //
śūdrajātiriyaṃ sādhvī tava patnī hyabhūtpurā

kenacittvatha kālena durbhikṣe samupasthite //
annakṣayānmahārāja sarva lokaḥ kṣudhārditaḥ

tatastvaṃ bhāryayā sārddhamanyadeśāṃtare gataḥ //
samāruhya ca kṛcchreṇa kasmiṃścidgirinirjhare

tvayā dṛṣṭaṃ manohāri śubhaṃ paṃkajakānanam //
tatra snātvā payaḥ pītvā pitṛdevāḥ pratarpitāḥ

manasā ciṃtitaṃ hyetatpadmānyādāya karomyaham //
vikrayaṃ yena cāhāro bhavenmama ca sarvathā

tataḥ padmāni bhūrīṇi gṛhītvā bhāryayā saha //
gato yatra jano bhūri gataḥ pārthivasattama

na ke'pi prati gṛhṇaṃti lokā durbhikṣapīḍitāḥ//
bhramitastvaṃ ca sarvatra śrāṃto vairāgyamāgataḥ

tato dināvasāne tu guhāmekāṃ samāśritaḥ //
bhūmau padmāni nikṣipya kṣudhāviṣṭaḥ prasuptavān

etasminneva kāle tu karṇayoste samāgataḥ //
paṭhatāṃ dvijamukhyānāṃ dhvanirvedapurāṇayoḥ

taṃ śrutvā sahasotthāya jñātvā jāgaraṇaṃ tataḥ //
padmānyādāya tatraiva sabhāryaḥ śivamaṃdire

tatra nāgavatī veśyā śivarātriparāyaṇā //
kedāre parayā bhaktyā karoti niśi jāgaram

tasyāḥ pārśve sthitā dāsī tvayā pṛṣṭā nareśvara //
devasya purato bāle kimarthaṃ rātrijāgaram

tayoktaṃ śivarātryāṃ vai veśyeyaṃ varavarṇinī //
kurute nāgavatī nāma rātrau bhaktyā ca jāgaram

yaḥ śraddhābhaktisaṃyuktaḥ kurute rātrijāgaram //
pūjayitvā mahādevaṃ sa yāti paramaṃ padam

kṛtvopavāsaṃ padmairyyaḥ pūjayettryaṃbakaṃ naraḥ //
sa yāti rudrasālokyaṃ sevyamāno 'psarogaṇaiḥ

sakāmo labhate kāmāndevairapi sudurllabhān //
sa tvaṃ padmāni me dehi kāṃcanaṃ ca palatrayam//
eteṣāṃ mūlyamādāya prāṇādhāraṃ samācara

tatastvaṃ bhāryayā cokto gṛhyamāṇe ca kāṃcane //
na grāhyaṃ mūlyameteṣāṃ tvayā nātha kathaṃcana

upavāso balājjāto hyannābhāvādvayorapi //
padmairebhirharaḥ pūjyo dvābhyāmevādya niścayam

idaṃ tvayā'dya karttavyaṃ tyājyamasyāstu kāṃcanam//
bhāryāyā vacanaṃ śrutvā taiḥ padmaiḥ pūjitaḥ śivaḥ

śraddhayā ca sabhāryeṇa jāgaraṃ ca śivāgrataḥ //
kṛtaṃ tvayā mahārāja bhāryayā śivamaṃdire

purāṇaśravaṇaṃ jātaṃ tatra pārthivasattama //
śivarātryāṃ mahārāja padmaistu pūjitaḥ śivaḥ

kedārasyāgrato bhaktyā rātrau jāgaraṇaṃ tathā//
kṛtaṃ tvayā mahārāja ekāgreṇa ca cetasā

tataḥprabhāte saṃjāte bhikṣāṃ kṛtvā ca pāraṇā //
kṛtā tvayā mahārāja śivāgre saha bhāryayā

tataḥ kālāṃtareṇaiva kāladharmaṃ gato bhavān //
bhāryeyaṃ ca tvayā sārdhaṃ saṃpraviṣṭā hutāśanam

tato jātā mahārāja daśārṇādhipateḥ sutā //
vaidehe nagare rājā jātastvaṃ pārthivottama

ajapāla iti khyāto nāmnā ca dharaṇītale //
sarveṣāṃ prāṇināṃ tvaṃ ca vallabho nṛpasattama

etasmātkāraṇājjātā bhāryeyaṃ prāṇasaṃmatā //
bhūyo'pi tava saṃjātā yanmāṃ tvaṃ paripṛcchasi

tasya devasya māhātmyātkedārasya mahīpateḥ //
rājyaṃ te sukhadaṃ nṛṇāṃ tathā nihatakaṇṭakam

prāptaṃ tvayā mahārāja kedārasya prasādataḥ //
yena tvaṃ sainyahīno'pi pṛthivīṃ parirakṣasi

// pulastya uvāca // //
tasya tadvacanaṃ śrutvā sa rājā vismayānvitaḥ //
gamanāya matiṃ cakre kedāraṃ prati bhūmipaḥ

sa gatvā parvate ramye pūjayitvā ca taṃ vibhum //
śivarātriparaḥ samyagvarṣevarṣe babhūva ha

putraṃ rājye ca saṃsthāpya tato'rbudamathāgamat //
prāpto muktiṃ tato bhūyaḥ sabhāryastatprabhāvataḥ

etatte sarvamākhyātaṃ kedārasya mahīpate //
māhātmyaṃ śubhadaṃ nṛṇāṃ sarva pāpapraṇāśanam

māghaphālgunayormadhye kṛṣṇapakṣe caturdaśī //
śivarātririti khyātā bhūtale'sminmahāmate

tasyāṃ tu sarvathā rājanyātrāṃ tasya samācaret//
kedārasya mahārāja prakuryātpūjanaṃ nṛpa

māghakṛṣṇacaturdaśyāṃ yaḥ kuryāttatra jāgaram //
kṛtopavāso nṛpate śivalokaṃ sa gacchati

snātvā gaṃgāsarasvatyoḥ saṃgame sarvakāmade //
ye prapaśyanti kedāraṃ te yāsyaṃti parāṃ gatim

kuṇḍe kedārasaṃjñe yaḥ prapibedvimalaṃ jalam //
saptapūrvānsapta parānpūrvajāṃstārayettu saḥ

yaścaitacchṛṇuyānnityaṃ bhaktyā paramayā nṛpa //
so'pi pāpairvimucyeta kedārasya prabhāvataḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṇḍe kedāramāhātmyavarṇanaṃ nāma navamo'dhyāyaḥ