Skanda Purana · Verses 7.8-4

// bhojarāja uvāca // //
prabho sārasvata mayā śrutaṃ māhātmyamuttamam //
vastrāpathasya kṣetrasya gire raivatakasya ca

viśeṣeṇa svarṇarekhābhavasya ca jalasya ca //
idānīṃ śrotumicchāmi tīrthotpattiṃ vadasva me

brahmaviṣṇuśivādīnāṃ madhye ko'yaṃ vyavasthitaḥ //
keyaṃ nadī svarṇarekhā sarvapātakanāśinī

kasmādbrahmādayā devā asmiṃstīrthe samāgatāḥ //
kathaṃ nārāyaṇo devaḥ svayameva samāgataḥ

hemālayaṃ parityajya bhavānī girimūrddhani //
saṃsthitā skandamādāya devairindrādibhiḥ saha

// sārasvata uvāca // //
śṛṇu sarvaṃ mahārāja kathayiṣye savistaram //
yena vai kathyamānena sarvapāpakṣayo bhavet

purā brahmadinasyāṃte jagadetaccarācaram //
saṃhṛtya bhagavānrudro brahmaviṣṇupuraskṛtaḥ

tāṃ ca te sakalāṃ rātrimekamūrttibhavāstrayaḥ //
tiṣṭhanti rātri paryante punarbhinnā bhavaṃti te

brahmaviṣṇuśivā devā rajaḥsattvatamomayāḥ //
sṛṣṭiṃ karoti bhagavānbrahmā pālayate hariḥ

sarvaṃ saṃharate rudro jagatkālapramāṇataḥ //
tenādau bhagavānsṛṣṭo dakṣo nāma prajāpatiḥ

sarve saṃkṣepataḥ kṛtvā brahmāṇḍaṃ sacarā caram //
bhinnā devāstrayo jātāḥ satyalokavyavasthitāḥ

trayo bhuvaṃ samāsādya kautukāviṣṭacetasaḥ //
kailāsaṃ te girivaraṃ samārūḍhāḥ surervṛtāḥ

ahaṃ jyeṣṭho ahaṃ jyeṣṭho vādo'bhūdbrahmarudrayoḥ //
tadā kruddho mahādevo brahmāṇaṃ hantumudyataḥ

viṣṇunā vārito brahmā na te vādastu yujyate //
tattvaṃ nāhaṃ yadā nedaṃ brahmāṃḍaṃ sacarācaram

eka eva tadā devo jale śete maheśvaraḥ //
jāgarti ca yadā devaḥ svecchayā kautukāttataḥ

anena tvaṃ kṛtaḥ pūrvamahaṃ paścāttvayā kṛtaḥ //
brahmāṃḍaṃ kūrmarūpeṇa dhṛtamasya prasādataḥ

anupraviṣṭā brahmāṃḍaṃ prasādācchaṃ karasya ca //
sṛṣṭistvayā kṛtā sarvā mayi rakṣā vyavasthitā

udāsīnavadāsīnaḥ saṃsārātsāramīkṣate //
eka eva śivo devaḥ sarvavyāpī maheśvaraḥ

pitāmahatvaṃ saṃjātaṃ prasādācchaṃkarasya te //
prasādayāmāsa haraṃ śrutvā brahmā vaco hareḥ

anādinidhano devo bahuśīrṣo mahābhujaḥ //
ityādivedavacanaistatastuṣṭo maheśvaraḥ //
prāha brahmanvaraṃ yatte vṛṇīṣva manasi sthitam

iti śrīskānde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye brahmarudravivāde viṣṇuvacanena brahmakṛtarudraprasādanavarṇanaṃnāmāṣṭamo'dhyāyaḥ