Skanda Purana · Chapter 7.87

// īśvara uvāca // //
evaṃ kṛtvā naro yātrāṃ samyakchraddhāsamanvitaḥ //
tato gacchenmahādevi rudrānekādaśa kramāt

prabhāsakṣetramadhyasthānmahāpātakanāśanān //
yadekādaśadhā pāpamarjitaṃ manujaiḥ pṛthak

tadekādaśarudrāṇāṃ pūjanātkṣayameṣyati //
saṃkrāṃtāvayane vāpi caṃdrasūryagrahe'thavā

anyāsu puṇyatithiṣu samyagbhāvena bhāvitaḥ //
pūjayedānupūrvyeṇa rudraikādaśakaṃ kramāt

teṣāṃ nāmāni vakṣyāmi yānyatītāni me purā //
ādye kṛtayuge tāni śṛṇu devi yathārthataḥ

ajaikapādahirbudhnyo virūpākṣo'tha raivataḥ //
haraśca bahurūpaśca tryaṃbakaśca sureśvaraḥ //
vṛṣākapiśca śaṃbhuśca kapardī cāparājitaḥ

ādau kṛtayuge devi tretāyāṃ dvāpare'pi ca //
kalau yuge tu saṃprāpte jātaṃ nāmāṃtaraṃ punaḥ

ekādaśadhā rudrāṇāṃ tāni te vacmi sāṃpratam//
bhūteśo nīlarudraśca kapālī vṛṣavāhanaḥ

tryaṃbako ghoranāmā ca mahākālo'tha bhairavaḥ //
mṛtyuṃjayo'tha kāmeśo yogeśa iti kīrtitaḥ //
ekādaśaite rudrāste kathitāḥ kramaśaḥ priye // ९ ]/
anādinidhanā devi bhedabhinnāstu te pṛthak //
ekādaśasvarūpeṇa pṛthaṅnāmaprabhedataḥ

// devyuvāca // //
bhagavanvistarādbrūhi liṃgaikādaśakakramam //
sthānasīmāprabhedena māhātmyotpattikāraṇaiḥ

kathaṃ pūjyāni tānīśa ke maṃtrāḥ ko vidhiḥ smṛtaḥ //
kasminparvaṇi kāle vā sarvaṃ vistarato vada

// īśvara uvāca // //
śṛṇu devi pravakṣyāmi rahasyaṃ pāpanāśanam //
somanāthāditaḥ kṛtvā siddhināthādikāraṇam

yacchrutvā mucyate jaṃtuḥ pātakaiḥ pūrvasaṃcitaiḥ //
ye caikādaśa rudrā vai tava proktā mayā priye

daśa te vāyavaḥ proktā ātmā caikādaśaḥ smṛtaḥ //
teṣāṃ nāmāni vakṣyāmi vāyūnāṃ śṛṇu me kramāt

prāṇo'pānaḥ samānaśca hyudāno vyāna eva ca //
nāgaśca kūrmaḥ kṛkalo devadatto dhanaṃjayaḥ

ātmā ceti kramājjñeyā rudrādhipatayaḥ kramāt //
teṣāṃ yātrāṃ kramādvakṣye sarvaprāṇihitāya vai

rudrāṇāmādidevo'sau pūrvaṃ someśvaraḥ priye //
bhūteśvareti nāmnā vai pūjayettaṃ vidhānataḥ

rājopacārayogena śraddhāpūtena cetasā //
paṃcāmṛtena saṃsnāpya sadyojātena pūjayet

puṣpairmanoharairbhaktyā dhyātvā devaṃ sadāśivam //
tribhiḥ pradakṣiṇīkṛtya sāṣṭāṃgaṃ praṇipatya ca

rudraikādaśayātrārthī nirvighnārthaṃ vrajettataḥ //
bhūteśvareti yannāma proktaṃ tatte bravīmyaham

mahadādi viśeṣāṃtaṃ bhūtajālaṃ yadīritam //
paṃcaviṃśati saṃkhyākaṃ teṣāmīśo yataḥ smṛtaḥ

tena bhūteśvaretyuktaṃ nāma tasya purā kila //
paṃcaviṃśatitattvāni jñātvā muktimavāpnuyāt

bhūteśarudraṃ saṃpūjya gacchedvai muktimavyayām //
iti saṃkṣepataḥ proktamādi rudrasya kīrtanam//
kīrtanīyaṃ dvijātīnāṃ kīrtitaṃ puṇyavarddhanam

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe prathame prabhāsakṣetramāhātmya ekādaśarudramāhātmye bhūteśvaramāhātmyavarṇanaṃnāma saptāśītitamo'dhyāyaḥ