Skanda Purana · Chapter 7.86

// īśvara uvāca // //
tasyāstu dakṣiṇe bhāge sthitaṃ liṃgaṃ mahāprabham //
pāṃḍaveśvaranāmāḍhyaṃ paṃcabhiḥ sthāpitaṃ kramāt

guptacaryāṃ yadā yātāḥ pāṃḍavā vanavāsinaḥ //
tīrthayātrāprasaṃgena prabhāsaṃ kṣetramāgatāḥ

tasminkāle mahādevi saṃ prāpte somaparvaṇi //
sthāpayāmāsuste sarve liṃgaṃ saṃnihitā taṭe

mārkaṇḍapramukhānkṛtvā ṛtvijo brāhmaṇottamān //
vedoktaiḥ kārayāmāsurabhiṣekaṃ vṛṣāndaduḥ

tataḥ prasannā ṛṣayo mārkaṃḍapramukhāḥ priye //
pratiṣṭhitasya liṃgasya pāṃḍavairvaravarṇini

// ṛṣaya ūcuḥ // //
ye caitatpūjayiṣyaṃti liṃgaṃ pāṃḍavapūjitam //
te vai pūjyā bhaviṣyaṃti devadānavarakṣasām

aśvamedhaphalaṃ teṣāṃ samyakchraddhārcanena vai //
bhaviṣyati na saṃdeho hyasmadvākyaprabhāvataḥ

snātvā saṃnihitākuṃḍe yo'rcayetpāṃḍaveśvaram //
māghe māsi samagre tu sa sākṣātpuruṣottamaḥ

darśanenāpi tasyāpi pāpaṃ yāti sahasradhā //
viṣṇurūpo hi sa prokto nātra kāryā vicāraṇā

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye saṃnihityāmāhātmye pāṃḍaveśvaramāhātmyavarṇanaṃnāma ṣaḍaśītitamo'dhyāyaḥ