Skanda Purana · Chapter 7.85

// devyuvāca // //
tatra saṃnihitā proktā yā tvayā vṛṣabhadhvaja //
kathaṃ deva samāyātā kurukṣetrānmahānadī //
kiṃ prabhāvā tu sā proktā phalaṃ snānādikena kim //

// īśvara uvāca // //
śṛṇu devi pravakṣyāmi yatra saṃnihitā śubhā //
pāpaghnī sarvajaṃtūnāṃ darśanātsparśanādapi

ādinārāyaṇāddevi paścime dhanuṣāṃ traye //
saṃsthitā sā mahādevī saridrūpā mahānadī

kathayāmi samāsena tadutpattiṃ śṛṇu priye //
jarāsaṃdhabhayāddevi viṣṇuḥ parijanaiḥ saha

gṛhītvā yādavānsarvānbālavṛddhavaṇigjanān //
sa śūnyāṃ mathurāṃ kṛtvā prabhāsaṃ samupāgataḥ

samudraṃ prārthayāmāsa sthānaṃ saṃvāsahetave //
etasminneva kāle tu devadevo divākaraḥ

saṃgrasto rāhuṇā devi parvakāle hyupasthite //
taṃ dṛṣṭvā yādavāḥ sarve viṣādaṃ paramaṃ gatāḥ

aprāptāḥ saṃnihityāyāṃ tānuvāca janārddanaḥ //
mā viṣādaṃ yaduśreṣṭhā vrajadhvaṃ mayi saṃsthite

dṛśyatāṃ matprabhāvo'dya dharmā rthamiha bhūtale //
ānayiṣyāmyahaṃ samyakpuṇyaṃ sāṃnihitaṃ saraḥ

evamuktvā sa bhagavānsamādhistho babhūva ha //
evaṃ saṃdhyāyatastasya viṣṇoramitatejasaḥ

prādurbhūtā tatastasya vāridhārā'grataḥ śubhā //
bibhedya dharaṇīpṛṣṭhaṃ snānārthaṃ cāsuradviṣaḥ

tata ste yādavāḥ sarve rāmasāṃbapurogamāḥ //
cakruḥ snānaṃ mahādevi rāhugraste divākare

prāptapuṇyā babhūvuste saṃnihityāsamudbhavam //
kurukṣetrasya yātrāyāḥ prāpya samyakphalaṃ hi te

evaṃ tatsamanuprāptaṃ puṇyaṃ sānnihitaṃ saraḥ //
tatra snātvā mahādevi rāhugraste divākare //
agniṣṭomasya yajñasya phalaṃ prāpnotyaśeṣataḥ

yastatra bhojayedvipraṃ ṣaḍrasaṃ vidhipūrvakam //
ekena bhojitenaiva koṭirbhavati bhojitā

yastatra kārayeddhomaṃ saṃnihityāsamīpataḥ //
ekaikāhutidānena koṭihomaphalaṃ labhet

mantrajāpyaṃ tu kurute tatra sthāne sthito yadi //
ekaikamaṃtrajāpyena koṭijāpyaphalaṃ labhet

suvarṇadānaṃ dātavyaṃ tatra yātrāphalepsubhiḥ //
snātvā saṃpūjanīyaśca ādidevo janārddanaḥ

iti vai kathitaṃ samyakphalaṃ sāṃnihitaṃ tava //
śrutaṃ pāpaharaṃ nṛṇāṃ samyakchraddhāvatāṃ priye

/
iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye saṃnihityāmāhātmyavarṇanaṃnāma paṃcāśītitamo'dhyāyaḥ