સ્કંદ પુરાણ · અધ્યાય 7.85

॥ દેવ્યુવાચ ॥ ॥
તત્ર સંનિહિતા પ્રોક્તા યા ત્વયા વૃષભધ્વજ ॥
કથં દેવ સમાયાતા કુરુક્ષેત્રાન્મહાનદી ॥
કિં પ્રભાવા તુ સા પ્રોક્તા ફલં સ્નાનાદિકેન કિમ્ ॥

॥ ઈશ્વર ઉવાચ ॥ ॥
શૃણુ દેવિ પ્રવક્ષ્યામિ યત્ર સંનિહિતા શુભા ॥
પાપઘ્ની સર્વજંતૂનાં દર્શનાત્સ્પર્શનાદપિ

આદિનારાયણાદ્દેવિ પશ્ચિમે ધનુષાં ત્રયે ॥
સંસ્થિતા સા મહાદેવી સરિદ્રૂપા મહાનદી

કથયામિ સમાસેન તદુત્પત્તિં શૃણુ પ્રિયે ॥
જરાસંધભયાદ્દેવિ વિષ્ણુઃ પરિજનૈઃ સહ

ગૃહીત્વા યાદવાન્સર્વાન્બાલવૃદ્ધવણિગ્જનાન્ ॥
સ શૂન્યાં મથુરાં કૃત્વા પ્રભાસં સમુપાગતઃ

સમુદ્રં પ્રાર્થયામાસ સ્થાનં સંવાસહેતવે ॥
એતસ્મિન્નેવ કાલે તુ દેવદેવો દિવાકરઃ

સંગ્રસ્તો રાહુણા દેવિ પર્વકાલે હ્યુપસ્થિતે ॥
તં દૃષ્ટ્વા યાદવાઃ સર્વે વિષાદં પરમં ગતાઃ

અપ્રાપ્તાઃ સંનિહિત્યાયાં તાનુવાચ જનાર્દ્દનઃ ॥
મા વિષાદં યદુશ્રેષ્ઠા વ્રજધ્વં મયિ સંસ્થિતે

દૃશ્યતાં મત્પ્રભાવોઽદ્ય ધર્મા ર્થમિહ ભૂતલે ॥
આનયિષ્યામ્યહં સમ્યક્પુણ્યં સાંનિહિતં સરઃ

એવમુક્ત્વા સ ભગવાન્સમાધિસ્થો બભૂવ હ ॥
એવં સંધ્યાયતસ્તસ્ય વિષ્ણોરમિતતેજસઃ

પ્રાદુર્ભૂતા તતસ્તસ્ય વારિધારાઽગ્રતઃ શુભા ॥
બિભેદ્ય ધરણીપૃષ્ઠં સ્નાનાર્થં ચાસુરદ્વિષઃ

તત સ્તે યાદવાઃ સર્વે રામસાંબપુરોગમાઃ ॥
ચક્રુઃ સ્નાનં મહાદેવિ રાહુગ્રસ્તે દિવાકરે

પ્રાપ્તપુણ્યા બભૂવુસ્તે સંનિહિત્યાસમુદ્ભવમ્ ॥
કુરુક્ષેત્રસ્ય યાત્રાયાઃ પ્રાપ્ય સમ્યક્ફલં હિ તે

એવં તત્સમનુપ્રાપ્તં પુણ્યં સાન્નિહિતં સરઃ ॥
તત્ર સ્નાત્વા મહાદેવિ રાહુગ્રસ્તે દિવાકરે ॥
અગ્નિષ્ટોમસ્ય યજ્ઞસ્ય ફલં પ્રાપ્નોત્યશેષતઃ

યસ્તત્ર ભોજયેદ્વિપ્રં ષડ્રસં વિધિપૂર્વકમ્ ॥
એકેન ભોજિતેનૈવ કોટિર્ભવતિ ભોજિતા

યસ્તત્ર કારયેદ્ધોમં સંનિહિત્યાસમીપતઃ ॥
એકૈકાહુતિદાનેન કોટિહોમફલં લભેત્

મન્ત્રજાપ્યં તુ કુરુતે તત્ર સ્થાને સ્થિતો યદિ ॥
એકૈકમંત્રજાપ્યેન કોટિજાપ્યફલં લભેત્

સુવર્ણદાનં દાતવ્યં તત્ર યાત્રાફલેપ્સુભિઃ ॥
સ્નાત્વા સંપૂજનીયશ્ચ આદિદેવો જનાર્દ્દનઃ

ઇતિ વૈ કથિતં સમ્યક્ફલં સાંનિહિતં તવ ॥
શ્રુતં પાપહરં નૃણાં સમ્યક્છ્રદ્ધાવતાં પ્રિયે

।
ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે સંનિહિત્યામાહાત્મ્યવર્ણનંનામ પંચાશીતિતમોઽધ્યાયઃ