Skanda Purana · Chapter 7.84

// īśvara uvāca // //
tato gacchenmahādevi ādinārāyaṇaṃ harim //
tasyāśca pūrvadigbhāge sarvapātakanāśanam

pādukāsanasaṃyuktaṃ sarvadaityāṃtakāriṇam //
ādau kṛtayuge devi daityo'bhūnmeghavāhanaḥ

mahābalo mahākāyo yojanāyutavistaraḥ //
ajeyaḥ sarvadevānāṃ trailokyakṣayakārakaḥ //
brahmaṇā tasya tuṣṭena varo datto varānane

yadā pādukayā viṣṇustvāṃ haniṣyati saṃyuge //
tadaiva mṛtyurbhavitā nānyathā maraṇaṃ tava

iti labdhavaro daityaḥ saṃtāpayati bhūtalam //
yugānāṃ koṭimekāṃ tu sadevāsuramānuṣam

saṃtapya bahudhā devi dakṣiṇo dadhimāgataḥ //
tatra vidhvaṃsayāmāsa ṛṣīṇāmāśramāṇi vai

tatasta ṛṣayaḥ sarve vidhvastāśramamaṇḍalāḥ //
śaraṇaṃ caiva saṃprāptā devadevaṃ tu keśavam //
ajeyaṃ taṃ tu saṃjñātvā tuṣṭuvurgaruḍadhvajam

// ṛṣaya ūcuḥ //
namaḥ paramakalyāṇakalyāṇāyātmayogine //
janārddanāya devāya śrīdharāya ca vedhase

namaḥ kamalakiṃjalkasuvarṇamukuṭāya ca //
keśavāyātisūkṣmāya bṛhanmūrte namonamaḥ

mahātmane vareṇyāya namaḥ paṃkajanābhaye //
namo'stu māyāharaye haraye harivedhase

hiraṇyagarbhagarbhāya jagataḥ kāraṇātmane //
acyutāya namo nityamanantāya namonamaḥ

namo māyāpaṭacchanna jagaddhātre mahātmane //
saṃsārasāgarottāra jñānapotapradāyine //
akuṃṭhamataye dhātre sargasthityaṃta karmaṇe

yathā hi vāsudeveti prokte naśyati pātakam //
tathā vilayamabhyetu daityo'yaṃ meghavāhanaḥ

yathā viṣṇuḥ svabhakteṣu pāpamāpnoti saṃsthitam//
tathā vināśamāyātu daityo'yaṃ pāpakarmakṛt

smṛtamātro yathā viṣṇuḥ sarvaṃ pāpaṃ vyapohati //
tathā praṇāśamabhyetu daityo'yaṃ meghavāhanaḥ

bhavaṃtu bhadrāṇi samastadoṣāḥ prayāṃtu nāśaṃ jagato'khilasya //
abhedyabhaktyā parameśvareśe smṛte jagaddhātari vāsudeve

ye bhūtale ye divi ye'ntarikṣe rasātale prāṇigaṇāśca kecit //
bhavantu te siddhiyutā narottamāḥ smṛte jagaddhātari vāsudeve

ye prāṇinaḥ kutracidatra saṃti brahmāṇḍamadhye parataśca kecit //
teṣāṃ tu siddhiḥ paramāstvaniṃdyā stute jagaddhātari vāsudeve

// īśvara uvāca // ]/
iti stutastadā devi ādinārāyaṇo hariḥ //
jñātvā sa bhāvi kāryaṃ tatsamāruhya ca pādukām

babhūva teṣāṃ pratyakṣa ṛṣīṇāṃ pāpanāśanaḥ //
uvāca praṇatānsarvānkiṃ vā kāryaṃ hṛdi sthitam

kathyatāṃ tatkariṣyāmi yuṣmatstotreṇa tarpitaḥ

ityuktā ṛṣayaḥ sarve kṛtāṃjalipuṭāḥ sthitāḥ //
ādidevaṃ hariṃ procuḥ sarve nataśirodharāḥ

// ṛṣaya ūcuḥ // //
jānāsi sarvaṃ tvaṃ deva na cāstyaviditaṃ tava //
imaṃ daityaṃ mahādeva saṃharasva mahābalam//
yathedaṃ sakalaṃ viśvaṃ nirātaṃkaṃ bhavetprabho

ityuktastaistadā viṣṇurdaityamāhūya saṃyuge //
tāḍayāmāsa taṃ daityaṃ hṛdi pādukayā śubhe

sa hataḥ patito daityo vigatāsurmahodadhau//
hatvā daityavaraṃ devastatra sthāne sthito'bhavat//
pādukāsanasaṃsthastu tatrādyāpi varānane

yastaṃ pūjayate bhaktyā ekādaśyāṃ narottamaḥ //
sośvavamedhaphalaṃ prāpya modate divi devavat

golakṣaṃ brāhmaṇe dattvā yatphalaṃ prāpnuyānnaraḥ //
tadādideve govinde dṛṣṭe bhaktyā phalaṃ labhet

kalau kṛtayugaṃ teṣāṃ kleśasteṣāṃ sukhādhikaḥ //
ādinārāyaṇo devo yeṣāṃ hṛdayasaṃsthitaḥ

ekādaśyāṃ ravidine snātvā saṃnihitā jale //
ādinārāyaṇaṃ pūjya mucyate bhavabandhanāt

iti te kathitaṃ devi māhātmyaṃ viṣṇudaivatam //
śrutaṃ pāpaharaṃ nṛṇāṃ dāridyaughavināśanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmya ādinārāyaṇamāhātmyavarṇanaṃnāma caturaśītitamodhyāyaḥ