સ્કંદ પુરાણ · શ્લોક 7.8-4

॥ ભોજરાજ ઉવાચ ॥ ॥
પ્રભો સારસ્વત મયા શ્રુતં માહાત્મ્યમુત્તમમ્ ॥
વસ્ત્રાપથસ્ય ક્ષેત્રસ્ય ગિરે રૈવતકસ્ય ચ

વિશેષેણ સ્વર્ણરેખાભવસ્ય ચ જલસ્ય ચ ॥
ઇદાનીં શ્રોતુમિચ્છામિ તીર્થોત્પત્તિં વદસ્વ મે

બ્રહ્મવિષ્ણુશિવાદીનાં મધ્યે કોઽયં વ્યવસ્થિતઃ ॥
કેયં નદી સ્વર્ણરેખા સર્વપાતકનાશિની

કસ્માદ્બ્રહ્માદયા દેવા અસ્મિંસ્તીર્થે સમાગતાઃ ॥
કથં નારાયણો દેવઃ સ્વયમેવ સમાગતઃ

હેમાલયં પરિત્યજ્ય ભવાની ગિરિમૂર્દ્ધનિ ॥
સંસ્થિતા સ્કન્દમાદાય દેવૈરિન્દ્રાદિભિઃ સહ

॥ સારસ્વત ઉવાચ ॥ ॥
શૃણુ સર્વં મહારાજ કથયિષ્યે સવિસ્તરમ્ ॥
યેન વૈ કથ્યમાનેન સર્વપાપક્ષયો ભવેત્

પુરા બ્રહ્મદિનસ્યાંતે જગદેતચ્ચરાચરમ્ ॥
સંહૃત્ય ભગવાન્રુદ્રો બ્રહ્મવિષ્ણુપુરસ્કૃતઃ

તાં ચ તે સકલાં રાત્રિમેકમૂર્ત્તિભવાસ્ત્રયઃ ॥
તિષ્ઠન્તિ રાત્રિ પર્યન્તે પુનર્ભિન્ના ભવંતિ તે

બ્રહ્મવિષ્ણુશિવા દેવા રજઃસત્ત્વતમોમયાઃ ॥
સૃષ્ટિં કરોતિ ભગવાન્બ્રહ્મા પાલયતે હરિઃ

સર્વં સંહરતે રુદ્રો જગત્કાલપ્રમાણતઃ ॥
તેનાદૌ ભગવાન્સૃષ્ટો દક્ષો નામ પ્રજાપતિઃ

સર્વે સંક્ષેપતઃ કૃત્વા બ્રહ્માણ્ડં સચરા ચરમ્ ॥
ભિન્ના દેવાસ્ત્રયો જાતાઃ સત્યલોકવ્યવસ્થિતાઃ

ત્રયો ભુવં સમાસાદ્ય કૌતુકાવિષ્ટચેતસઃ ॥
કૈલાસં તે ગિરિવરં સમારૂઢાઃ સુરેર્વૃતાઃ

અહં જ્યેષ્ઠો અહં જ્યેષ્ઠો વાદોઽભૂદ્બ્રહ્મરુદ્રયોઃ ॥
તદા ક્રુદ્ધો મહાદેવો બ્રહ્માણં હન્તુમુદ્યતઃ

વિષ્ણુના વારિતો બ્રહ્મા ન તે વાદસ્તુ યુજ્યતે ॥
તત્ત્વં નાહં યદા નેદં બ્રહ્માંડં સચરાચરમ્

એક એવ તદા દેવો જલે શેતે મહેશ્વરઃ ॥
જાગર્તિ ચ યદા દેવઃ સ્વેચ્છયા કૌતુકાત્તતઃ

અનેન ત્વં કૃતઃ પૂર્વમહં પશ્ચાત્ત્વયા કૃતઃ ॥
બ્રહ્માંડં કૂર્મરૂપેણ ધૃતમસ્ય પ્રસાદતઃ

અનુપ્રવિષ્ટા બ્રહ્માંડં પ્રસાદાચ્છં કરસ્ય ચ ॥
સૃષ્ટિસ્ત્વયા કૃતા સર્વા મયિ રક્ષા વ્યવસ્થિતા

ઉદાસીનવદાસીનઃ સંસારાત્સારમીક્ષતે ॥
એક એવ શિવો દેવઃ સર્વવ્યાપી મહેશ્વરઃ

પિતામહત્વં સંજાતં પ્રસાદાચ્છંકરસ્ય તે ॥
પ્રસાદયામાસ હરં શ્રુત્વા બ્રહ્મા વચો હરેઃ

અનાદિનિધનો દેવો બહુશીર્ષો મહાભુજઃ ॥
ઇત્યાદિવેદવચનૈસ્તતસ્તુષ્ટો મહેશ્વરઃ ॥
પ્રાહ બ્રહ્મન્વરં યત્તે વૃણીષ્વ મનસિ સ્થિતમ્

ઇતિ શ્રીસ્કાન્દે મહાપુરાણ એકાશીતિ સાહસ્ર્યાં સંહિતાયાં સપ્તમે પ્રભાસખણ્ડે દ્વિતીયે વસ્ત્રાપથક્ષેત્રમાહાત્મ્યે બ્રહ્મરુદ્રવિવાદે વિષ્ણુવચનેન બ્રહ્મકૃતરુદ્રપ્રસાદનવર્ણનંનામાષ્ટમોઽધ્યાયઃ