Skanda Purana · Verses 7.8-3

// devyuvāca // //
punaḥ kathaya deveśa māhātmyaṃ lokaśaṃkara //
śrīsomeśvaradevasya sarvapātakanāśanam//
brahmaviṣṇvīśadaivatyaṃ tathātra tritayaṃ vada // /// १ //
// īśvara uvāca // //
śṛṇuṣvaikamanā bhūtvā mama gopyaṃ purātanam //
tasmim̐lliṃge ca yadvṛttamāścaryaṃ paramaṃ mahat

ṣaṣṭikoṭi sahasrāṇi ṛṣīṇāmūrddhvaretasām //
tasmim̐lliṃge praviṣṭāni te ghṛtāhutirivānale

siddhirvṛddhistathā tuṣṭirṛddhiḥ puṣṭistu paṃcamī //
kīrtiḥ śāṃtistathā lakṣmīstasmiṃlliṃge samutthitā

saptakoṭyastu maṃtrāṇāṃ siddhīnāṃ caiva saṃbhavaḥ //
divyayogarasāścānye divyauṣadhirasāyanāḥ

gāruḍaṃ bhūtataṃtraṃ ca khecaryo vyaṃtarīstathā //
te sarve saha yogena tasmālliṃgātsamutthitāḥ

anyāścaiva tu yāḥ kāścitsiddhayo'ṣṭau prakīrtitāḥ //
tāḥ sarvāḥ saha liṃgena tasmātsthānātsamutthitāḥ

anyaddevi pravakṣyāmi atra siddhiṃ gatāstu ye //
mamāṃśasaṃbhavāḥ prāptā asmim̐lliṃge layaṃ gatāḥ

teṣāṃ ca vikramānsarvānpravakṣyāmyanupūrvaśaḥ //
purākramā grahā muṇḍā guḍakāśca sahetukāḥ

vimalā daṃḍikāścaiva saptaite kutsikāḥ smṛtāḥ //
asmiṃlliṃge purā siddhā yogātpāśupatānmama

rudro viprastathā dānaścaṃdro mantho'valokakaḥ //
sūryāvalokaśceti gārgeyāḥ sapta kīrttitāḥ

someśvare ca te siddhāḥ prabhāse varavarṇini //
mūkamanyaḥ śivaścaiva prakāśaḥ kapilastathā

satkulaḥ karṇikāraśca pauruṣeyāḥ prakīrttitāḥ //
someśvare purā siddhāḥ prabhāse pāpanāśane

yugeyuge purā siddhāstasmim̐lliṃge priye mama //
ete cānye ca ye viprā bhaviṣyaṃti kalau yuge

tatra siddhiṃ gamiṣyaṃti durllabhāṃ tridaśairapi //
etatte sarvamākhyātaṃ talliṃgaṃ siddhidaṃ param

durllabhaṃ sarvamarttyānāṃ prabhāse tu vyavasthitam //
na ca kaścidvijānāti aśubhaiḥ karmabhirvṛtaḥ

grahadoṣāstu ye kecidbhūtadoṣāstathā pare //
ḍākinīpretavetālā rākṣasā grahapūtanāḥ

piśācā yātudhānāśca mātaro jātahārikāḥ //
bālagrahāstathā cānye buddhāścaiva tu ye grahāḥ

jvarabhūta grahāścānye hyatisārabhagaṃdarāḥ //
aśmarī mūtrakṛcchraṃ ca rogāścānye sahasraśaḥ

durnāmakāstathā cānye kuṣṭharogāstathā pare //
kṣayarogāstathā cānye vātagulmāstathaiva ca //
anye caiva tu ye kecidvyādhayastu prakīrttitāḥ

someśvaraṃ samāsādya tasya liṃgasya darśanāt //
sarva eva vinaśyaṃti vahnau kṣiptamivendhanam

upasargāśca () cānye sarpaghoṇapavṛścikāḥ //
sarve tatra vinaśyaṃti śrīsomeśvaradarśanāt

yo'sau someśvaro nāmnā paścimo bhairavaḥ smṛtaḥ //
kālāgnirudranātheti paryāyairnāmabhiḥ śrutaḥ

tasmiṃstiṣṭhāmi deveśi bhaktānugrahakārakaḥ //
sarvaṃ ca duṣkṛtaṃ nṛṇāṃ bhakṣayāmi na saṃśayaḥ

yo'sau prāṇaḥ śarīrastho dehināṃ dehasaṃcaraḥ //
brahmāṃḍametadyasyāṃtareko yaścāpyanekadhā

vedāḥ sarve'pi yaṃ devaṃ praśaṃsaṃti maharṣayaḥ //
parasya brahmaṇo rūpaṃ yasya dvāreṇa labhyate

so'yaṃ devi mahādevaḥ prabhāse saṃvyavasthitaḥ //
yathā guptaṃ gṛhe ratnaṃ na kaścidviṃdate naraḥ

prabhāse tu sthitaṃ tadvadratnabhūtaṃ gṛhe mama //
tacca liṃgaṃ purā kalpe saptapātālabhedakam

kathitaṃ koṭi sūryasya pralayānalasaṃnibham //
tenakālāgnirudreti proktaṃ someśvaraḥ purā

iti devi samāsena kathitaṃ tava pārvati //
someśvarasya māhātmyaṃ sarvapātakanāśanam

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsamāhātmye śrīsomeśvaraiśvaryavarṇanaṃ nāmāṣṭamo'dhyāyaḥ