સ્કંદ પુરાણ · શ્લોક 7.8-3

॥ દેવ્યુવાચ ॥ ॥
પુનઃ કથય દેવેશ માહાત્મ્યં લોકશંકર ॥
શ્રીસોમેશ્વરદેવસ્ય સર્વપાતકનાશનમ્॥
બ્રહ્મવિષ્ણ્વીશદૈવત્યં તથાત્ર ત્રિતયં વદ ॥ ॥। ૧ ॥
॥ ઈશ્વર ઉવાચ ॥ ॥
શૃણુષ્વૈકમના ભૂત્વા મમ ગોપ્યં પુરાતનમ્ ॥
તસ્મિઁલ્લિંગે ચ યદ્વૃત્તમાશ્ચર્યં પરમં મહત્

ષષ્ટિકોટિ સહસ્રાણિ ઋષીણામૂર્દ્ધ્વરેતસામ્ ॥
તસ્મિઁલ્લિંગે પ્રવિષ્ટાનિ તે ઘૃતાહુતિરિવાનલે

સિદ્ધિર્વૃદ્ધિસ્તથા તુષ્ટિરૃદ્ધિઃ પુષ્ટિસ્તુ પંચમી ॥
કીર્તિઃ શાંતિસ્તથા લક્ષ્મીસ્તસ્મિંલ્લિંગે સમુત્થિતા

સપ્તકોટ્યસ્તુ મંત્રાણાં સિદ્ધીનાં ચૈવ સંભવઃ ॥
દિવ્યયોગરસાશ્ચાન્યે દિવ્યૌષધિરસાયનાઃ

ગારુડં ભૂતતંત્રં ચ ખેચર્યો વ્યંતરીસ્તથા ॥
તે સર્વે સહ યોગેન તસ્માલ્લિંગાત્સમુત્થિતાઃ

અન્યાશ્ચૈવ તુ યાઃ કાશ્ચિત્સિદ્ધયોઽષ્ટૌ પ્રકીર્તિતાઃ ॥
તાઃ સર્વાઃ સહ લિંગેન તસ્માત્સ્થાનાત્સમુત્થિતાઃ

અન્યદ્દેવિ પ્રવક્ષ્યામિ અત્ર સિદ્ધિં ગતાસ્તુ યે ॥
મમાંશસંભવાઃ પ્રાપ્તા અસ્મિઁલ્લિંગે લયં ગતાઃ

તેષાં ચ વિક્રમાન્સર્વાન્પ્રવક્ષ્યામ્યનુપૂર્વશઃ ॥
પુરાક્રમા ગ્રહા મુણ્ડા ગુડકાશ્ચ સહેતુકાઃ

વિમલા દંડિકાશ્ચૈવ સપ્તૈતે કુત્સિકાઃ સ્મૃતાઃ ॥
અસ્મિંલ્લિંગે પુરા સિદ્ધા યોગાત્પાશુપતાન્મમ

રુદ્રો વિપ્રસ્તથા દાનશ્ચંદ્રો મન્થોઽવલોકકઃ ॥
સૂર્યાવલોકશ્ચેતિ ગાર્ગેયાઃ સપ્ત કીર્ત્તિતાઃ

સોમેશ્વરે ચ તે સિદ્ધાઃ પ્રભાસે વરવર્ણિનિ ॥
મૂકમન્યઃ શિવશ્ચૈવ પ્રકાશઃ કપિલસ્તથા

સત્કુલઃ કર્ણિકારશ્ચ પૌરુષેયાઃ પ્રકીર્ત્તિતાઃ ॥
સોમેશ્વરે પુરા સિદ્ધાઃ પ્રભાસે પાપનાશને

યુગેયુગે પુરા સિદ્ધાસ્તસ્મિઁલ્લિંગે પ્રિયે મમ ॥
એતે ચાન્યે ચ યે વિપ્રા ભવિષ્યંતિ કલૌ યુગે

તત્ર સિદ્ધિં ગમિષ્યંતિ દુર્લ્લભાં ત્રિદશૈરપિ ॥
એતત્તે સર્વમાખ્યાતં તલ્લિંગં સિદ્ધિદં પરમ્

દુર્લ્લભં સર્વમર્ત્ત્યાનાં પ્રભાસે તુ વ્યવસ્થિતમ્ ॥
ન ચ કશ્ચિદ્વિજાનાતિ અશુભૈઃ કર્મભિર્વૃતઃ

ગ્રહદોષાસ્તુ યે કેચિદ્ભૂતદોષાસ્તથા પરે ॥
ડાકિનીપ્રેતવેતાલા રાક્ષસા ગ્રહપૂતનાઃ

પિશાચા યાતુધાનાશ્ચ માતરો જાતહારિકાઃ ॥
બાલગ્રહાસ્તથા ચાન્યે બુદ્ધાશ્ચૈવ તુ યે ગ્રહાઃ

જ્વરભૂત ગ્રહાશ્ચાન્યે હ્યતિસારભગંદરાઃ ॥
અશ્મરી મૂત્રકૃચ્છ્રં ચ રોગાશ્ચાન્યે સહસ્રશઃ

દુર્નામકાસ્તથા ચાન્યે કુષ્ઠરોગાસ્તથા પરે ॥
ક્ષયરોગાસ્તથા ચાન્યે વાતગુલ્માસ્તથૈવ ચ ॥
અન્યે ચૈવ તુ યે કેચિદ્વ્યાધયસ્તુ પ્રકીર્ત્તિતાઃ

સોમેશ્વરં સમાસાદ્ય તસ્ય લિંગસ્ય દર્શનાત્ ॥
સર્વ એવ વિનશ્યંતિ વહ્નૌ ક્ષિપ્તમિવેન્ધનમ્

ઉપસર્ગાશ્ચ () ચાન્યે સર્પઘોણપવૃશ્ચિકાઃ ॥
સર્વે તત્ર વિનશ્યંતિ શ્રીસોમેશ્વરદર્શનાત્

યોઽસૌ સોમેશ્વરો નામ્ના પશ્ચિમો ભૈરવઃ સ્મૃતઃ ॥
કાલાગ્નિરુદ્રનાથેતિ પર્યાયૈર્નામભિઃ શ્રુતઃ

તસ્મિંસ્તિષ્ઠામિ દેવેશિ ભક્તાનુગ્રહકારકઃ ॥
સર્વં ચ દુષ્કૃતં નૃણાં ભક્ષયામિ ન સંશયઃ

યોઽસૌ પ્રાણઃ શરીરસ્થો દેહિનાં દેહસંચરઃ ॥
બ્રહ્માંડમેતદ્યસ્યાંતરેકો યશ્ચાપ્યનેકધા

વેદાઃ સર્વેઽપિ યં દેવં પ્રશંસંતિ મહર્ષયઃ ॥
પરસ્ય બ્રહ્મણો રૂપં યસ્ય દ્વારેણ લભ્યતે

સોઽયં દેવિ મહાદેવઃ પ્રભાસે સંવ્યવસ્થિતઃ ॥
યથા ગુપ્તં ગૃહે રત્નં ન કશ્ચિદ્વિંદતે નરઃ

પ્રભાસે તુ સ્થિતં તદ્વદ્રત્નભૂતં ગૃહે મમ ॥
તચ્ચ લિંગં પુરા કલ્પે સપ્તપાતાલભેદકમ્

કથિતં કોટિ સૂર્યસ્ય પ્રલયાનલસંનિભમ્ ॥
તેનકાલાગ્નિરુદ્રેતિ પ્રોક્તં સોમેશ્વરઃ પુરા

ઇતિ દેવિ સમાસેન કથિતં તવ પાર્વતિ ॥
સોમેશ્વરસ્ય માહાત્મ્યં સર્વપાતકનાશનમ્

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસમાહાત્મ્યે શ્રીસોમેશ્વરૈશ્વર્યવર્ણનં નામાષ્ટમોઽધ્યાયઃ