Skanda Purana · Chapter 7.8

// pulastya uvāca // //
tato gacchennṛpaśreṣṭha bhadrakarṇaṃ mahāhradam //
trinetrābhāḥ śilā yatra dṛśyaṃte'dyāpi bhūriśaḥ

tasyaiva paścime bhāge liṃgamasti pinākinaḥ //
yaṃ dṛṣṭvā mānavastatra trinetrasadṛśo bhavet

bhadrakarṇagaṇonāma purāsīcchivavallabhaḥ //
tenātra sthāpitaṃ liṃgaṃ hradaścaiva vinirmitaḥ

kenacittvatha kālena saṃgrāme dānavaiḥ saha //
yuyudhe purataḥ śaṃbhornānāgaṇasamanvitaḥ

naṣṭe skaṃde hate sainye vīrabhadre parājite //
gatāste bhayasaṃtrastā mahākāle vinirjite

balavānnamucirnāma dānavo balavattaraḥ //
khaḍgacarmadharaḥ śīghraṃ maheśvaramupādravat

bhadrakarṇastu taṃ dṛṣṭvā dānavaṃ tadanaṃtaram //
pataṃtaṃ saṃmukhastasya tiṣṭhatiṣṭheti cābravīt

chittvā'simasinā tasya carma cāpi mahābalaḥ //
stanayoraṃtare daityaṃ kopāviṣṭo'hanannṛpa

athāsau nihatastena praviśya vipulaṃ tamaḥ //
nipapāta mahīpṛṣṭhe vāyubhagna iva drumaḥ //
vadhaṃ prāptastu daityo'sau natvā haramasau sthitaḥ //
satye sthitaṃ ca taṃ dṛṣṭvā tatastuṣṭo maheśvaraḥ

// śrībhagavānuvāca // //
tava vīryeṇa saṃtuṣṭo dharmeṇa ca viśeṣataḥ //
varaṃ varaya bhadraṃ te nityaṃ yo hṛdaye sthitaḥ

// bhadrakarṇaṃ uvāca // //
yanmayā sthāpitaṃ liṃgamarbude surasattama //
atrāstu tava sāṃnidhyaṃ hrade'smiṃśca sthiro bhava

// śrībhagavānuvāca // //
māghamāse caturddaśyāṃ kṛṣṇapakṣe sadā mama //
sāṃnidhyaṃ ca viśeṣeṇa hrade liṃge bhaviṣyati

bhadrakarṇahrade snātvā trinetraṃ yaḥ samāhitaḥ //
drakṣyate sa tu me sthānaṃ śāśvataṃ yāsyati dhuvam

tasmātsarvatra yatnena snānaṃ tatra samācaret //
pūjayitvā ca talliṃgaṃ śivalokaṃ sa gacchati

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṃḍe bhadrakarṇahradatrinetramāhātmyavarṇanaṃnāmāṣṭamo'dhyāyaḥ