સ્કંદ પુરાણ · અધ્યાય 7.8

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ ભદ્રકર્ણં મહાહ્રદમ્ ॥
ત્રિનેત્રાભાઃ શિલા યત્ર દૃશ્યંતેઽદ્યાપિ ભૂરિશઃ

તસ્યૈવ પશ્ચિમે ભાગે લિંગમસ્તિ પિનાકિનઃ ॥
યં દૃષ્ટ્વા માનવસ્તત્ર ત્રિનેત્રસદૃશો ભવેત્

ભદ્રકર્ણગણોનામ પુરાસીચ્છિવવલ્લભઃ ॥
તેનાત્ર સ્થાપિતં લિંગં હ્રદશ્ચૈવ વિનિર્મિતઃ

કેનચિત્ત્વથ કાલેન સંગ્રામે દાનવૈઃ સહ ॥
યુયુધે પુરતઃ શંભોર્નાનાગણસમન્વિતઃ

નષ્ટે સ્કંદે હતે સૈન્યે વીરભદ્રે પરાજિતે ॥
ગતાસ્તે ભયસંત્રસ્તા મહાકાલે વિનિર્જિતે

બલવાન્નમુચિર્નામ દાનવો બલવત્તરઃ ॥
ખડ્ગચર્મધરઃ શીઘ્રં મહેશ્વરમુપાદ્રવત્

ભદ્રકર્ણસ્તુ તં દૃષ્ટ્વા દાનવં તદનંતરમ્ ॥
પતંતં સંમુખસ્તસ્ય તિષ્ઠતિષ્ઠેતિ ચાબ્રવીત્

છિત્ત્વાઽસિમસિના તસ્ય ચર્મ ચાપિ મહાબલઃ ॥
સ્તનયોરંતરે દૈત્યં કોપાવિષ્ટોઽહનન્નૃપ

અથાસૌ નિહતસ્તેન પ્રવિશ્ય વિપુલં તમઃ ॥
નિપપાત મહીપૃષ્ઠે વાયુભગ્ન ઇવ દ્રુમઃ ॥
વધં પ્રાપ્તસ્તુ દૈત્યોઽસૌ નત્વા હરમસૌ સ્થિતઃ ॥
સત્યે સ્થિતં ચ તં દૃષ્ટ્વા તતસ્તુષ્ટો મહેશ્વરઃ

॥ શ્રીભગવાનુવાચ ॥ ॥
તવ વીર્યેણ સંતુષ્ટો ધર્મેણ ચ વિશેષતઃ ॥
વરં વરય ભદ્રં તે નિત્યં યો હૃદયે સ્થિતઃ

॥ ભદ્રકર્ણં ઉવાચ ॥ ॥
યન્મયા સ્થાપિતં લિંગમર્બુદે સુરસત્તમ ॥
અત્રાસ્તુ તવ સાંનિધ્યં હ્રદેઽસ્મિંશ્ચ સ્થિરો ભવ

॥ શ્રીભગવાનુવાચ ॥ ॥
માઘમાસે ચતુર્દ્દશ્યાં કૃષ્ણપક્ષે સદા મમ ॥
સાંનિધ્યં ચ વિશેષેણ હ્રદે લિંગે ભવિષ્યતિ

ભદ્રકર્ણહ્રદે સ્નાત્વા ત્રિનેત્રં યઃ સમાહિતઃ ॥
દ્રક્ષ્યતે સ તુ મે સ્થાનં શાશ્વતં યાસ્યતિ ધુવમ્

તસ્માત્સર્વત્ર યત્નેન સ્નાનં તત્ર સમાચરેત્ ॥
પૂજયિત્વા ચ તલ્લિંગં શિવલોકં સ ગચ્છતિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે તૃતીયેઽર્બુદખંડે ભદ્રકર્ણહ્રદત્રિનેત્રમાહાત્મ્યવર્ણનંનામાષ્ટમોઽધ્યાયઃ