Skanda Purana · Chapter 7.75

// īśvara uvāca // //
tato gacchenmahādevi liṃgaṃ śākalakaleśvaram //
śākalyeśvaranairṛtye dhanuṣāṃ ṣaṣṭibhiḥ sthitam //

taccaturyuganāmāḍhyaṃ smṛtaṃ pātakanāśanam //
pūrvaṃ kāmeśvaraṃnāma tretāyāṃ pulaheśvaram

dvāpare siddhināthaṃ tu nāradeśaṃ kalau smṛtam //
tathā kalakaleśaṃ ca nāma tasyaiva kīrttitam

samudre ca mahāpuṇye yasminkāle sarasvatī //
āgatā sā mahābhāgā hṛṣṭā tuṣṭā saridvarā //
tasya toyasya śabdena sāgarasya mahātmanaḥ

tato devāḥ sagandharvā ṛṣayaḥ siddhacāraṇāḥ //
neduḥ kalakalaṃ tatra tumulaṃ lomaharṣaṇam //

tena śabdena mahatā mama mūrttiḥ samutthitā //
kalkaleśvaranāmeti tato liṃgaṃ prakīrtitam

iti te pūrvavṛttāṃtaṃ kathitaṃ nāmakāra ṇam//
sāṃprataṃ tu yathā jātaṃ punaḥ kalakaleśvaram//
tatte'haṃ saṃpravakṣyāmi śṛṇuṣvaikamanāḥ priye

purā dvāparasaṃdhau ca praviṣṭe tu kalau yuge //
nāradastu samāgatya kṣetraṃ prābhāsikaṃ śubham//
saṃcakāra tapaścograṃ tatra liṃgasamīpataḥ

tato varṣaśate pūrṇe samārādhya vṛṣadhvajam //
gāṃdharvaṃ prāpya deveśi bhūṣitaṃ saptabhiḥ svaraiḥ

tato hṛṣṭamanā bhūtvā talliṃgasya samīpataḥ //
sa cakāra mahāyajñaṃ pauṃḍarīkamiti śrutam

devadevasya tuṣṭyarthaṃ sa sadā bhāvitātmavān //
samāhūya ṛṣīṃstatra brahmalokātsahasraśaḥ

tataḥ saṃbhṛtasaṃbhāro yajñopakaraṇānvitaḥ //
kṛtvā kuṇḍādikaṃ sarvaṃ samārebhe tataḥ kratum

tataḥ saṃpūrṇatāṃ prāpte tasminkratau varānane

athāgamaṃstato viprāstatra kṣetranivāsinaḥ //
dakṣiṇārthaṃ mahadevi śataśo'tha sahasraśaḥ

tataḥ sa kautukāviṣṭasteṣāṃ yuddhārthameva hi //
prākṣipattatra ratnāni suvarṇaṃ ca mahītale

tataste brāhmaṇāḥ sarve yudhyamānāḥ parasparam //
kolāhalaṃ paraṃ cakrurbahudravyaparīpsayā

eke digaṃbarā devi tyaktayajñopavītinaḥ //
vikacāḥ ke'pi dṛśyaṃte tvanye rudhiraviplavāḥ

anye parasparaṃ jaghnurmuṣṭibhiścaraṇaistathā //
evaṃ tatra tadā kṣiptaṃ yaddravyaṃ nāradena tu

athābhāve tu vittasya ye ca viprā hyakiṃcanāḥ //
vidyāvinayasaṃpannā brāhmaṇairjarjarīkṛtāḥ

te tamūcurbhṛśaṃ śāṃtāḥ smayamānaṃ muhurmuhuḥ //
kalahārthaṃ yato dānaṃ tvayā dattamidaṃ mune //

vidyāyuktānparityajya vidhiṃ tyaktvā tu yājñikam //
tasmādasya mune nāma khyātaṃ kalakaleśvaram

tena nāmnā dvijaśreṣṭha liṃgametadbhaviṣyati //
etasmātkāraṇāddevi jātaṃ kalakaleśvaram

yastaṃ snāpya naro bhaktyā kurute triḥ pradakṣiṇam //
sa gacchedrudralokaṃ tu tvatprasādādasaṃśayam

yastaṃ pūjayate bhaktyā gaṃdhapuṣpānulepanaiḥ //
hemaṃ dattvā dvijātibhyaḥ sa gacchetparamaṃ padam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye kalakaleśvaramāhātmyavarṇanaṃnāma pañcasaptatitamo'dhyāyaḥ //