Skanda Purana · Chapter 7.74

// īśvara uvāca // //
tato gacchenmahādevi śākalyeśvaramuttamam //
daityasūdanavāyavye dhanuṣāṃ triṃśatā sthitam

śākalyena mahādevi pūjitaṃ sarvakāmadam//
śākalyonāma rājarṣiryatra taptvā mahattapaḥ

samārādhya mahādevaṃ pratyakṣīkṛtavānbhavam //
liṃge'vatārayāmāsa prasannaṃ taṃ maheśvaram

tasmindṛṣṭe varārohe saptajanmakṛtaṃ nṛṇām //
pāpaṃ praṇaśyate śīghraṃ tamaḥ sūryodaye yathā

tatrāṣṭamyāṃ caturddaśyāṃ snāpayetpayasā śivam //
pūjayecca vidhānena gandhapuṣpādibhiḥ kramāt

hiraṇyaṃ tatra dātavyaṃ samyagyātrāphalepsubhiḥ //
catvāri tasya nāmāni kathyamānāni me śṛṇu

ādau kṛtayuge devi kīrtito bhairaveśvaraḥ //
tataḥ sāvarṇimanunā samyagārādhitaḥ priye

sāvarṇikeśvaraṃ nāma tretāyāṃ tasya saṃjñitam //
tatastu dvāpare devi gālavena mahātmanā //
samyagārādhitastatra liṃgarūpīvṛṣadhvajaḥ

tṛtīyaṃ tasya devasya gālaveśvarasaṃjñitam //
kalau yuge tu saṃprāpte śākalyonāma vai muniḥ

yatra siddhimanuprāpta aiśvaryaṃ cāṇimādikam//
śākalyeśvaranāmeti tataḥ khyātaṃ turīyakam

evaṃ cāturyugaṃ nāma tasya liṃgasya kīrtitam //
pāpaghnaṃ puṇyadaṃ nṝṇāṃ kīrttitaṃ sarvakāmadam

tasyaiva devadevasya kṣetrotpattiṃ śṛṇu priye

aṣṭādaśadhanurdevi samaṃtātparimaṇḍalam //
mahāpāpaharaṃ devi tatra kṣetranivāsinām

kṛmikīṭapataṃgānāṃ tiraścāmapi mokṣadam //
yatra kūpāditoyeṣu jalaṃ sārasvataṃ smṛtam

yatra tatra naraḥ snātvā svargaloke mahīyate //
aśvamedhasahasrasya vājapeyaśatasya ca

tatphalaṃ samavāpnoti tasya liṃgasya darśanāt //
somaparvaṇi saṃprāpte yastatra śucirātmavān

aghoraṃ ca japetsamyagājyahomasamanvitam //
talliṃgasya samīpastho yāvanmāsāvadhiḥ priye

mahāpātakayukto'pi yukto vā'pyupapātakaiḥ //
sa sarvāṃ labhate siddhimuttamāṃ varavarṇini

kāmikaṃ tatsmṛtaṃ liṃgaṃ sarvakāmaphalapradam //
aghora vaktraṃ devasya tatrasthaṃ bhairavaṃ mahat

bhairaveśvaranāmeti pūrvaṃ khyātamabhūdbhuvi //
asminyuge tu saṃprāpte śākalyeśvaranāmakam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śākalyeśvaramāhātmyavarṇanaṃnāma catuḥsaptatitamo'dhyāyaḥ //