સ્કંદ પુરાણ · અધ્યાય 7.75

॥ ઈશ્વર ઉવાચ ॥ ॥
તતો ગચ્છેન્મહાદેવિ લિંગં શાકલકલેશ્વરમ્ ॥
શાકલ્યેશ્વરનૈરૃત્યે ધનુષાં ષષ્ટિભિઃ સ્થિતમ્ ॥

તચ્ચતુર્યુગનામાઢ્યં સ્મૃતં પાતકનાશનમ્ ॥
પૂર્વં કામેશ્વરંનામ ત્રેતાયાં પુલહેશ્વરમ્

દ્વાપરે સિદ્ધિનાથં તુ નારદેશં કલૌ સ્મૃતમ્ ॥
તથા કલકલેશં ચ નામ તસ્યૈવ કીર્ત્તિતમ્

સમુદ્રે ચ મહાપુણ્યે યસ્મિન્કાલે સરસ્વતી ॥
આગતા સા મહાભાગા હૃષ્ટા તુષ્ટા સરિદ્વરા ॥
તસ્ય તોયસ્ય શબ્દેન સાગરસ્ય મહાત્મનઃ

તતો દેવાઃ સગન્ધર્વા ઋષયઃ સિદ્ધચારણાઃ ॥
નેદુઃ કલકલં તત્ર તુમુલં લોમહર્ષણમ્ ॥

તેન શબ્દેન મહતા મમ મૂર્ત્તિઃ સમુત્થિતા ॥
કલ્કલેશ્વરનામેતિ તતો લિંગં પ્રકીર્તિતમ્

ઇતિ તે પૂર્વવૃત્તાંતં કથિતં નામકાર ણમ્॥
સાંપ્રતં તુ યથા જાતં પુનઃ કલકલેશ્વરમ્॥
તત્તેઽહં સંપ્રવક્ષ્યામિ શૃણુષ્વૈકમનાઃ પ્રિયે

પુરા દ્વાપરસંધૌ ચ પ્રવિષ્ટે તુ કલૌ યુગે ॥
નારદસ્તુ સમાગત્ય ક્ષેત્રં પ્રાભાસિકં શુભમ્॥
સંચકાર તપશ્ચોગ્રં તત્ર લિંગસમીપતઃ

તતો વર્ષશતે પૂર્ણે સમારાધ્ય વૃષધ્વજમ્ ॥
ગાંધર્વં પ્રાપ્ય દેવેશિ ભૂષિતં સપ્તભિઃ સ્વરૈઃ

તતો હૃષ્ટમના ભૂત્વા તલ્લિંગસ્ય સમીપતઃ ॥
સ ચકાર મહાયજ્ઞં પૌંડરીકમિતિ શ્રુતમ્

દેવદેવસ્ય તુષ્ટ્યર્થં સ સદા ભાવિતાત્મવાન્ ॥
સમાહૂય ઋષીંસ્તત્ર બ્રહ્મલોકાત્સહસ્રશઃ

તતઃ સંભૃતસંભારો યજ્ઞોપકરણાન્વિતઃ ॥
કૃત્વા કુણ્ડાદિકં સર્વં સમારેભે તતઃ ક્રતુમ્

તતઃ સંપૂર્ણતાં પ્રાપ્તે તસ્મિન્ક્રતૌ વરાનને

અથાગમંસ્તતો વિપ્રાસ્તત્ર ક્ષેત્રનિવાસિનઃ ॥
દક્ષિણાર્થં મહદેવિ શતશોઽથ સહસ્રશઃ

તતઃ સ કૌતુકાવિષ્ટસ્તેષાં યુદ્ધાર્થમેવ હિ ॥
પ્રાક્ષિપત્તત્ર રત્નાનિ સુવર્ણં ચ મહીતલે

તતસ્તે બ્રાહ્મણાઃ સર્વે યુધ્યમાનાઃ પરસ્પરમ્ ॥
કોલાહલં પરં ચક્રુર્બહુદ્રવ્યપરીપ્સયા

એકે દિગંબરા દેવિ ત્યક્તયજ્ઞોપવીતિનઃ ॥
વિકચાઃ કેઽપિ દૃશ્યંતે ત્વન્યે રુધિરવિપ્લવાઃ

અન્યે પરસ્પરં જઘ્નુર્મુષ્ટિભિશ્ચરણૈસ્તથા ॥
એવં તત્ર તદા ક્ષિપ્તં યદ્દ્રવ્યં નારદેન તુ

અથાભાવે તુ વિત્તસ્ય યે ચ વિપ્રા હ્યકિંચનાઃ ॥
વિદ્યાવિનયસંપન્ના બ્રાહ્મણૈર્જર્જરીકૃતાઃ

તે તમૂચુર્ભૃશં શાંતાઃ સ્મયમાનં મુહુર્મુહુઃ ॥
કલહાર્થં યતો દાનં ત્વયા દત્તમિદં મુને ॥

વિદ્યાયુક્તાન્પરિત્યજ્ય વિધિં ત્યક્ત્વા તુ યાજ્ઞિકમ્ ॥
તસ્માદસ્ય મુને નામ ખ્યાતં કલકલેશ્વરમ્

તેન નામ્ના દ્વિજશ્રેષ્ઠ લિંગમેતદ્ભવિષ્યતિ ॥
એતસ્માત્કારણાદ્દેવિ જાતં કલકલેશ્વરમ્

યસ્તં સ્નાપ્ય નરો ભક્ત્યા કુરુતે ત્રિઃ પ્રદક્ષિણમ્ ॥
સ ગચ્છેદ્રુદ્રલોકં તુ ત્વત્પ્રસાદાદસંશયમ્

યસ્તં પૂજયતે ભક્ત્યા ગંધપુષ્પાનુલેપનૈઃ ॥
હેમં દત્ત્વા દ્વિજાતિભ્યઃ સ ગચ્છેત્પરમં પદમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે કલકલેશ્વરમાહાત્મ્યવર્ણનંનામ પઞ્ચસપ્તતિતમોઽધ્યાયઃ ॥