સ્કંદ પુરાણ · અધ્યાય 7.74

॥ ઈશ્વર ઉવાચ ॥ ॥
તતો ગચ્છેન્મહાદેવિ શાકલ્યેશ્વરમુત્તમમ્ ॥
દૈત્યસૂદનવાયવ્યે ધનુષાં ત્રિંશતા સ્થિતમ્

શાકલ્યેન મહાદેવિ પૂજિતં સર્વકામદમ્॥
શાકલ્યોનામ રાજર્ષિર્યત્ર તપ્ત્વા મહત્તપઃ

સમારાધ્ય મહાદેવં પ્રત્યક્ષીકૃતવાન્ભવમ્ ॥
લિંગેઽવતારયામાસ પ્રસન્નં તં મહેશ્વરમ્

તસ્મિન્દૃષ્ટે વરારોહે સપ્તજન્મકૃતં નૃણામ્ ॥
પાપં પ્રણશ્યતે શીઘ્રં તમઃ સૂર્યોદયે યથા

તત્રાષ્ટમ્યાં ચતુર્દ્દશ્યાં સ્નાપયેત્પયસા શિવમ્ ॥
પૂજયેચ્ચ વિધાનેન ગન્ધપુષ્પાદિભિઃ ક્રમાત્

હિરણ્યં તત્ર દાતવ્યં સમ્યગ્યાત્રાફલેપ્સુભિઃ ॥
ચત્વારિ તસ્ય નામાનિ કથ્યમાનાનિ મે શૃણુ

આદૌ કૃતયુગે દેવિ કીર્તિતો ભૈરવેશ્વરઃ ॥
તતઃ સાવર્ણિમનુના સમ્યગારાધિતઃ પ્રિયે

સાવર્ણિકેશ્વરં નામ ત્રેતાયાં તસ્ય સંજ્ઞિતમ્ ॥
તતસ્તુ દ્વાપરે દેવિ ગાલવેન મહાત્મના ॥
સમ્યગારાધિતસ્તત્ર લિંગરૂપીવૃષધ્વજઃ

તૃતીયં તસ્ય દેવસ્ય ગાલવેશ્વરસંજ્ઞિતમ્ ॥
કલૌ યુગે તુ સંપ્રાપ્તે શાકલ્યોનામ વૈ મુનિઃ

યત્ર સિદ્ધિમનુપ્રાપ્ત ઐશ્વર્યં ચાણિમાદિકમ્॥
શાકલ્યેશ્વરનામેતિ તતઃ ખ્યાતં તુરીયકમ્

એવં ચાતુર્યુગં નામ તસ્ય લિંગસ્ય કીર્તિતમ્ ॥
પાપઘ્નં પુણ્યદં નૄણાં કીર્ત્તિતં સર્વકામદમ્

તસ્યૈવ દેવદેવસ્ય ક્ષેત્રોત્પત્તિં શૃણુ પ્રિયે

અષ્ટાદશધનુર્દેવિ સમંતાત્પરિમણ્ડલમ્ ॥
મહાપાપહરં દેવિ તત્ર ક્ષેત્રનિવાસિનામ્

કૃમિકીટપતંગાનાં તિરશ્ચામપિ મોક્ષદમ્ ॥
યત્ર કૂપાદિતોયેષુ જલં સારસ્વતં સ્મૃતમ્

યત્ર તત્ર નરઃ સ્નાત્વા સ્વર્ગલોકે મહીયતે ॥
અશ્વમેધસહસ્રસ્ય વાજપેયશતસ્ય ચ

તત્ફલં સમવાપ્નોતિ તસ્ય લિંગસ્ય દર્શનાત્ ॥
સોમપર્વણિ સંપ્રાપ્તે યસ્તત્ર શુચિરાત્મવાન્

અઘોરં ચ જપેત્સમ્યગાજ્યહોમસમન્વિતમ્ ॥
તલ્લિંગસ્ય સમીપસ્થો યાવન્માસાવધિઃ પ્રિયે

મહાપાતકયુક્તોઽપિ યુક્તો વાઽપ્યુપપાતકૈઃ ॥
સ સર્વાં લભતે સિદ્ધિમુત્તમાં વરવર્ણિનિ

કામિકં તત્સ્મૃતં લિંગં સર્વકામફલપ્રદમ્ ॥
અઘોર વક્ત્રં દેવસ્ય તત્રસ્થં ભૈરવં મહત્

ભૈરવેશ્વરનામેતિ પૂર્વં ખ્યાતમભૂદ્ભુવિ ॥
અસ્મિન્યુગે તુ સંપ્રાપ્તે શાકલ્યેશ્વરનામકમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે પ્રથમે પ્રભાસક્ષેત્રમાહાત્મ્યે શાકલ્યેશ્વરમાહાત્મ્યવર્ણનંનામ ચતુઃસપ્તતિતમોઽધ્યાયઃ ॥