Skanda Purana · Verses 7.7-2

// śrīprahlāda uvāca // //
tato gaccheddvijaśreṣṭhā rathāṃgākhyaṃ mahodadhim //
cakrāṃkā yatra pāṣāṇā dṛśyaṃte muktidāyakāḥ

yaiḥ pūjyate jagannāthaḥ pratyahaṃ bhāva saṃyutaiḥ //
sadā netrairanimiṣairvīkṣyate ca janārdanaḥ

yacca sākṣādbhagavatā dṛṣṭaṃ kṛṣṇena dṛṣṭitaḥ //
tattīrthaṃ sarvapāpaghnaṃ cakrākhyaṃ paramaṃ hareḥ

yasya prasiddhiḥ paramā trailokye sacarācare //
prayāgādadhikaṃ yacca muktidaṃ hyasti pāvanam

surairapi prapūjyaṃte yatrāṃgāni śarīriṇām //
aṃkitāni ca cakreṇa ṣaṇmāsānnātra saṃśayaḥ

yaddṛṣṭvā mucyate pāpātprasaṃgenāpi mānavaḥ //
tattīrthaṃ sarvatīrthānāṃ pāvanaṃ pravaraṃ smṛtam//

tatra gatvā dvijaśreṣṭhāḥ prakṣālya caraṇau mudā //
karau cāsyaṃ caiva punaḥ praṇameddaṃḍavatpunaḥ

praṇipatya gṛhītvārghyaṃ paṃcaratnasamanvitam //
sapuṣpākṣatagaṃdhaiśca phalahemasucaṃdanaiḥ

saṃpannamarghyamādāya maṃtrametamudīrayet //
pratyaṅmukhaḥ suniyataḥ saṃmukho vā mahodadheḥ

ॐ namo viṣṇu rūpāya viṣṇucakrāya te namaḥ //
gṛhāṇārghyaṃ mayā dattaṃ sarvakāmaprado bhava

agniśca tejo mṛḍayā ca rudro retodhā viṣṇuramṛtasya nābhiḥ //
etadbruvanvāḍavāḥ satyavākyaṃ tato'vagāheta patiṃ nadīnām

mṛdamālabhya sajalāṃ viprā devakaracyutām //
dhārayitvā tu śirasā snānaṃ kuryyādyathāvidhi

tarpayecca pitṝndevānmanuṣyāṃśca yathākramam //
tarpayitvā havirdravyaṃ prokṣayitvā ca bhaktitaḥ

aśvamedhasahasreṇa samyagyaṣṭena yatphalam //
snānamātreṇa tatproktaṃ cakratīrthe dvijottamāḥ

prayāge yatphalaṃ proktaṃ māghyāṃ mādhavapūjane //
snānamātreṇa tatproktaṃ cakra tīrthe dvijottamāḥ

kārayecca tataḥ śrāddhaṃ pitṝṇāṃ śraddhayānvitaḥ //
viśvedevānsuvarṇena rājatena tathā pitṝn

saṃtarpya bhojanenaiva vastrālaṃkārabhūṣaṇaiḥ//
dīnāndhakṛpaṇebhyaśca dānaṃ deyaṃ svaśaktitaḥ

cakratīrthe tīrthavare viśeṣāddvijasattamāḥ//
ratnadānaṃ prakurvīta prīṇanārthaṃ jagatpateḥ

gantrīmanaḍuhā yuktāṃ sarvāstaraṇasaṃyutām //
sopaskarāṃ ca dadyādvai viṣṇurme prīyatāmiti

suvinītaṃ śīlayutaṃ tathā sopaskaraṃ hayam //
bhūṣayitvā ca viprāya dadyāddakṣiṇayā saha

evaṃ kṛte dvijaśreṣṭhāḥ kṛtakṛtyo bhavennaraḥ//
muktiṃ prayāṃti tasyaiva pitarastrikulodbhavāḥ

pretayoniṃ gatā ye ca ye ca kīṭatvamāgatāḥ //
pacyaṃte narake ye ca mahārauravasaṃjñake

te sarve tṛptimāyāṃti cakatīrtha prabhāvataḥ //
śrāddhe kṛte dvijaśreṣṭhā gayāśrāddhaphalaṃ labhet

yā gatirmātṛbhaktānāṃ yajvanāṃ yā gatiḥ smṛtā //
cakratīrthe dvijaśreṣṭhāḥ snātvā tāṃ labhate naraḥ

śrāddhaṃ praśastaṃ vipreṃdrāḥ saṃprāpte caṃdrasaṃkṣaye //
sūryagrahe viśeṣeṇa kurukṣetraphalaṃ smṛtam //
śrāddhe snāne tathā dāne pitṝṇāṃ tarpaṇe tathā

praśastaṃ cakratīrthaṃ ca nātra kāryyā vicāraṇā

sarvadā pāvanaṃ viprāścakratīrthaṃ na saṃśayaḥ //
yastu śrāddhaṃ prakurvīta yātrāyāmāgato naraḥ

cakratīrthe dvijaśreṣṭhāḥ saṃpūjya madhusūdanam //
pūjiteṣu dvijeṃdreṣu viṣṇusāṃnidhyamāpnuyāt

vācā kṛtaṃ karmakṛtaṃ manasāṃ samupārjitam //
snānamātreṇa tatpāpaṃ naśyate nātra saṃśayaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe caturthe dvārakāmāhātmye gomatyudadhisaṃgamatīrasthacakratīrthamāhātmyavarṇanaṃnāma saptamo'dhyāyaḥ