Skanda Purana · Chapter 7.7

pulastya uvāca // //
tato gacchennṛpaśreṣṭha supuṇyamacaleśvaram //
yaṃ dṛṣṭvā siddhimāpnoti naraḥ śraddhāsamanvitaḥ

tatra kṛṣṇacaturdaśyāṃ yaḥ śrāddhaṃ kurute naraḥ //
āśvine phālgune vāpi sa yāti paramāṃ gatim

yastu pūjayate bhaktyā dakṣiṇāṃ diśamāsthitaḥ //
puṣpaiḥ patraiḥ phalaiścaiva so'śvamedhaphalaṃ labhet

paṃcāmṛtena yastatra tarpaṇaṃ kuru te naraḥ //
so'pi devasya sāṃnidhyaṃ śivalokamavāpnuyāt

pradakṣiṇāṃte yastasya praṇāmaṃ kurute naraḥ //
naśyaṃti sarvapāpāni pradakṣiṇapadepade

tatrāścaryamabhūtpūrvaṃ tattvaṃ śṛṇu mahāmate //
mayā pūrvaṃ śrutaṃ svarge nāradācchakrasannidhau

tatra pūrvaṃ śuko nīḍaṃ vṛkṣe caivākaroddvijaḥ //
gatāgatena nīḍasya kurute taṃ pradakṣiṇām

na ca bhaktyā mahārāja pakṣiyonisamudbhavaḥ //
athāsau mṛtyumāpannaḥ kālena mahatā śukaḥ

saṃjātaḥ pārthive vaṃśe rājā veṇuriti smṛtaḥ //
jātismaro mahārāja sarvaśatrunikṛntanaḥ

sa taṃ smṛtvā prabhāvaṃ hi pradakṣiṇāsamudbhavam //
acaleśvaramāsādya pradakṣiṇāmathākarot

naktaṃ dinaṃ mahārāja nānyatkiṃcitkaroti saḥ //
na tathā tapase yatno na naivedye kathaṃcana

na puṣpe dhūpadāne ca pradakṣiṇāparaḥ sadā //
kenacittvatha kālena munayo'tra samāgatāḥ

nāradaḥ śaunakaścaiva hārīto devalastathā //
gālavaḥ kapilo naṃdaḥ suhotraḥ kaśyapo nṛpaḥ

ete cānye ca bahavo devavrataparāyaṇāḥ //
kecitsnānaṃ kārayaṃti tasya liṃgasya bhaktitaḥ

anye ca vividhāṃ pūjāṃ japamanye samāhitāḥ //
eke nṛtyaṃti rājeṃdra gāyaṃti ca tathā pare

balimanye prayacchaṃti stutiṃ kurvaṃti cāpare //
athāścaryaṃ paraṃ dṛṣṭvā pradakṣiṇāparaṃ nṛpam

paraṃ kautukamāpannā vākyametadathābruvan //
pradakṣiṇāsamudbhūtaṃ kāraṇaṃ jñātumicchavaḥ

//
// ṛṣaya ūcuḥ // //
kasmāttvaṃ pārthivaśreṣṭha pradakṣiṇāparaḥ sadā //
devasyāsya viśeṣeṇa satyaṃ no vaktumarhasi

na dadāsi jalaṃ liṃge prabhūtaṃ sumanoharam //
puṣpadhūpādikaṃ vātha stotrāṇi vividhāni ca

samartho'si tathānyeṣāṃ dānānāṃ tvaṃ mahīpate //
etannaḥ kautukaṃ sarvaṃ yathāvadvaktumarhasi

// veṇuruvāca // //
yadahaṃ saṃpravakṣyāmi śrūyatāṃ dvijasattamāḥ //
pūrvadehāṃtare vṛttaṃ sarvaṃ satyaṃ viśeṣataḥ

prāsāde'sminpurā pakṣī śuko'haṃ sthitavāṃstadā //
kṛtavāṃśca tadā devaṃ pradakṣiṇāmaharniśam

kṛpayā'sya prabhāvācca jāto jātismarastvaham //
adhunā parayā bhaktyā yatkaromi pradakṣiṇām

na jāne kiṃ phalaṃ me'dya devasyāsya prasādataḥ //
etasmātkāraṇāccāhaṃ nānyatkiṃcitkaromi bhoḥ

//
// pulastya uvāca // //
veṇuvākyaṃ tataḥ śrutvā munayaḥ śaṃsitavratāḥ //
vismayotphullanayanāḥ sādhusādhviti cābruvan

tataḥ pradakṣiṇa parāḥ sarve tatra maharṣayaḥ //
babhūvurmunayaḥ sarve śraddhayā parayā yutāḥ

so'pi rājā mahābhāgo veṇuḥ śaṃbhoḥ prasādataḥ //
śāśvataṃ sthānamāpanno durllabhaṃ tridaśairapi

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe'caleśvaraprabhāvavarṇanaṃnāma saptamo'dhyāyaḥ