Skanda Purana · Verses 7.6-4

// īśvara uvāca // //
adhunā saṃpravakṣyāmi maṃgalātpaścime vrajet //
tatra siddheśvaraṃ paśyetsarvasiddhipradāyakam

tatraiva cakratīrthaṃ tu tīrthakoṭiphalapradam //
lokeśvaraṃ svayaṃbhūtaṃ pūrvamiṃdreśvareti ca

dṛṣṭvā taṃ vidhivaddevi tato yakṣavanaṃ vrajet //
maṃgalātpaścime bhāge yatra devī svayaṃ sthitā

yakṣeśvarī mahābhāgā vāṃchitārthapradāyinī //
tāṃ saṃpūjya vidhānena tato vastrāpathaṃ punaḥ

giriṃ raivatakaṃ gatvā kuryādyātrāvidhānataḥ //
mṛgīkuṃḍāditīrthāni saṃti tatraiva koṭiśaḥ

yadbhuktiśikhare devi sīmāliṃgaṃ hi tatsmṛtam //
daśakoṭistu tīrthāni tatra saṃti varāna ne

yatra vai yādavāḥ siddhāḥ kalau ye buddhirūpiṇaḥ //
śatasahasrārbudaṃ ca liṃgaṃ tatraiva tiṣṭhati

gajeṃdrasya padaṃ tatra tatraiva rasakūpikāḥ //
sapta kuṇḍāni tatraiva raivate parvatottame

aṃbikā ca sthitā devī pradyumnaḥ sāṃba eva ca //
liṃgākāre parvate tu tatra tīrthāni koṭiśaḥ

mṛgīkuṃḍaṃ ca tatraiva kālameghastathaiva ca //
kṣetrapālasvarūpeṇa mahodadhi svayaṃ sthitaḥ //
dāmodaraśca tatraiva bhavo brahmāḍanāyakaḥ

//
// pārvatyuvāca // //
śrutāni tava tīrthāni deveśa vadatastava //
gaṃgā sarasvatī puṇyā yamunā ca mahānadī

godāvarī gomatī ca nadī tāpī ca narmadā //
sarayūḥ svarṇarekhā ca tamasā pāpanāśinī

nadyaḥ samudrasaṃyogāḥ sarvāḥ puṇyāḥ śrutā mayā //
mokṣāraṇyāni divyāni/ divyakṣetrāṇi yāni ca

nagaryo muktidāyinyastāḥ śrutāstvatprasādataḥ //
brahmaviṣṇuśivādīnāṃ sūryeṃduvaruṇasya ca

devatānā mṛṣīṇāṃ ca saṃti sthānānyanekaśaḥ //
paraṃ deva tvayā puṇyaṃ prabhāsaṃ kathitaṃ mama

tasmādyaccādhikaṃ proktaṃ kṣetraṃ vastrāpathaṃ tvayā //
śṛṇvaṃtyā ca mayā pūrvaṃ na pṛṣṭaṃ kāraṇaṃ tadā

idānīṃ ca śrutaṃ sarvaṃ svasthāhaṃ kāraṇaṃ vada //
prabhāvaṃ prathamaṃ brūhi kṣetrasya ca bhavasya ca

kasmindeśe ca tattīrthaṃ śivaḥ kenātra saṃsthitaḥ //
svayaṃbhūrbhagavānrudraḥ kathaṃ tatra sthitaḥ svayam //
prabho me mahadāścaryaṃ vartate tadvadādhunā

// īśvara uvāca // //
vastrāpathasya kṣetrasya prabhāvaṃ prathamaṃ śṛṇu //
paścādbhavasya māhātmyaṃ śṛṇu tvaṃ ca varānane

kānyakubje mahākṣetre rājā bhojeti viśrutaḥ //
purā puṇyayuge dharmyaḥ prajā dharmeṇa śāsati

viśālākṣo dīrghabāhurvidvānvāggmī priyaṃvadaḥ //
sarvalakṣaṇasaṃpūrṇo bahvāścaryavilokakaḥ

vanātkadācidabhyetya vanapālobravīdidam //
āścaryaṃ bhramatā deva vane dṛṣṭaṃ mayādhunā

girau viṣamabhūbhāge vahuvṛkṣasamākule //
mṛgayūthagatā nārī mayā dṛṣṭā mṛgānanā

mṛgavatplavate bālā sadā tatraiva dṛśyate //
iti śrutvā vaco rājā tuṣṭastasmai dhanaṃ dadau

caturaṃ turagaṃ divyaṃ vāsasī svarṇabhūṣaṇam//
idānīmeva yāsyāmi senādhyakṣa tvayā saha

aśvānāṃ daśasāhasraṃ vāgurāṇāṃ tvanekadhā //
pattayo yāṃtu sarvatra veṣṭayaṃtu giriṃvaram

na haṃtavyo mṛgaḥ kaścidrakṣaṇīyā hi sā mṛgī //
strīveṣadhāriṇī nārī mṛgī bhavati bhūtale

kva yāsyati varākī sā madbalaiḥ paripīḍitā //
śastrāstravarjitaṃ sainyaṃ vanapālapadānugam

ahorātreṇa saṃprāptaṃ bahuvyādhajanāgrataḥ //
aśvādhirūḍho balavānbhojarājo yayau svayam

niḥśabdapadasañcāraḥ saṃjñāsaṃketabhāṣakaḥ //
giriṃ saṃveṣṭayāmāsa vāgurābhiḥ svayaṃ nṛpaḥ

vanapālena sahito mṛgayūthaṃ dadarśa saḥ //
sā mṛgī mṛgamadhyasthā nārīdehā mukhe mṛgī //
mṛgavacceṣṭate bālā dhāvate ca mṛgaiḥ saha

aśvagaṃdhānsamāghrāya santrastā mṛgayūthapāḥ //
kṣubdhā bhrāntāḥ kṣaṇe tasminsarve yāṃti diśo daśa

mṛgavaktrā tu yā nārī mṛgaiḥ katipayaiḥ saha //
plavamānā nipatitā vāgurāyāṃ vicetanā

balādhyakṣeṇa vidhṛtā mṛgaiḥ saha śanairnṛpaḥ //
dadarśa mahadāścaryaṃ bhojarājo janairvṛtaḥ

tataḥ kolāhalo jātaḥ paramānaṃdinisvanaḥ //
mṛgaiḥ saha samāninye kānyakubjaṃ mṛgīṃ nṛpaḥ

divyavastrasamācchannā divyābharaṇabhūṣitā //
narayānasthitā nārī praviveśa mṛgairvṛtā

vāditrairbrahmaghoṣaiśca nīyate nṛpamaṃdiram //
janairjānapadairmārge dṛśyate nṛpamandire

nīyamānā nāgaraiśca mahadāścaryabhāṣakaiḥ //
puṇye muhūrtte saṃprāpte sā mṛgī nṛpamandiram

pratīhāreṇa rājendra vacasā vārito janaḥ //
gataḥ senāpatiḥ sainyaṃ gṛhītvā svaniketanam

rājāpi svagṛhaṃ prāpya snātvā saṃpūjya devatāḥ //
tāṃ mṛgīṃ snāpayāmāsa divyagandhānulepanām

kuṅkumena viliptāṃgīṃ divyavastrāvaguṃṭhitām //
yathocitaṃ yathāsthānaṃ divyābharaṇabhūṣitām

ekāṃte nirjane rājā babhāṣe cārulocanām //
kā tvaṃ kasya sutā kena kāraṇena mṛgaiḥ saha

strīṇāṃ śarīraṃ te kasmānmṛgīṇāṃ vadanaṃ kutaḥ //
iti sarvaṃ samācakṣva paraṃ kautūhalaṃ hi me

evaṃ sā procyamānāpi na babhāṣe kathaṃcana //
mūkavanna vijānāti na ca bhuṃkte sulocanā

na bhuṃkte pṛthivīpālo na rājyaṃ bahu manyate //
na dārairvidyate kāryaṃ nāśvairna ca gajai rathaiḥ

tadeva rājyaṃ te dārāste gajāstaddhanaṃ bahu //
pramadāmadasaṃraktaṃ yatra saṃkrīḍate manaḥ

āhūyāha pratīhāraṃ tayā saṃmohito nṛpaḥ //
purodhasaṃ guruṃ viprānācāryāñchīghramānaya

daivajñānatha mantrajñānbhiṣajastāṃtrikāṃstathā //
iti sannodito rājñā pratīhāro yayau svayam

ājagāma sa vegena samānīya dvijottamān//
rājñe vijñāpayāmāsa deva viprāḥ samāgatāḥ

praveśaya guruṃ dvāḥsthaṃ saṃprāptānmaddhite ratān //
iti sannodito rājñā tathā cakre sa buddhimān

abhyutthāya nṛpaḥ pūrvaṃ namaskṛtya prapūjya ca //
āsaneṣūpaviṣṭāṃstānbabhāṣe kāryatatparaḥ

idamāścaryamevaikaṃ kathaṃ śakyaṃ niveditum //
jānīta hi svayaṃ sarve lokataḥ śāstrato'pi vā

kathameṣā samutpannā kasyedaṃ karmaṇaḥ phalam //
asyāṃ kena prakāreṇa vacanaṃ mānuṣaṃ bhavet

svayaṃ manuṣyavadanā kathameṣā bhaviṣyati //
sāvadhānairdvijairbhūyaḥ sarvaṃ saṃcintya cocyatām

// viprā ūcuḥ // //
deva sārasvato nāma kurukṣetre dvijottamaḥ //
ūrddhvaretāḥ sarasvatyāṃ tapastepe jitendriyaḥ

kathayiṣyati sarvaṃ te tenādiṣṭā mṛgī svayam //
iti śrutvā vaco rājā yayau sārasvataṃ dvijam

sarasvatījale snātaṃ prabhāse dhyānatatparam //
dṛṣṭvā pradakṣiṇīkṛtya sāṣṭāṃgaṃ taṃ praṇamya ca //
upaviṣṭo nṛpo bhūmau prāṃjaliḥ sañjitendriyaḥ

manuṣyapadasaṃcāraṃ śrutvā jñātvā ca kāraṇam //
sārasvato babhāṣe'tha taṃ nṛpaṃ bhaktitatparam

// sārasvata uvāca // //
bhojarāja śubhaṃ testu jñātaṃ tatkāraṇaṃ mayā //
mṛgānanā tvayā nārī samānītā vanātkila

mahadāścaryamevaitattava cetasi varttate //
ādiṣṭā tu mayā bālā sarvaṃ te kathayiṣyati

jānāmyahaṃ mahārāja caritraṃ janma yādṛśam //
āścaryaṃ saṃbhavelloke kathyamānaṃ tayā svayam

ityādiśya gato vegādrathenādityavarcasā //
ahorātradvayenaiva saṃprāpto nṛpa mandiram

praviśya ca mṛgīṃ dṛṣṭvā yatrāste mṛgalocanā //
tayā sārasvato jñāto dharmajñaḥ sarvaviddvijaḥ

// mṛgyuvāca // //
eṣa sarvaṃ hi jānāti kāraṇaṃ yacca yādṛśam //
varttamānaṃ bhaviṣyaṃ ca bhūtaṃ yadbhuvanatraye

etena maraṇaṃ jñātaṃ madīyaṃ pūrvajanmani //
vastrāpathe mahākṣetre tapastaptaṃ bhavālaye

vidhūya kaluṣaṃ sarvaṃ jñānamutpādya yatnataḥ //
jarāmaraṇanirmuktaḥ pratyakṣaṃ dṛṣṭavānbhavam

asya tuṣṭo bhavo devo jñātaṃ tīrthasya kāraṇam //
ādiṣṭayā mayā vācyaṃ bhavejjanmani kāraṇam

iti cintāparā yāvattāvadvipraḥ samāgataḥ //
tasmai praṇāmaparamā mūrcchitā nipapāta sā

atha sārasvato jñānājjñātavānkāraṇaṃ ca tat //
ānayantu dvijā vegātkalaśaṃ toyasaṃbhṛtam //

savauṃṣadhīḥ pallavāṃśca dūrvāḥ puṣpāṇi cākṣatān//
dhūpaṃ ca caṃdanaṃ caiva gomayaṃ madhusarpiṣī

ityādiṣṭairdvijairvegātsamānītaṃ nṛpājñayā //
upalipya ca bhūbhāgaṃ svastikaṃ saṃniveśya ca

tatrāgnikāryaṃ kṛtvā'tha vedānkuṃbhe nidhāya saḥ //
indraṃ tasmiṃśca vinyasya dikpālāṃśca yathākramam //
hutvāgniṃ sa caruṃ kṛtvā grahapūjāmakārayat

toyaṃ suvarṇapātrasthaṃ kṛtvā kuṃbhānsvayaṃ guruḥ //
abhiṣekaṃ tataścakre muhūrte sārvakāmike

abhiṣiktā tu sā tena pūtā snānārthavāriṇā //
jātā sacetanā bālā sarvaṃ paśyati cakṣuṣā

śṛṇoti sarvaṃ jānāti caritraṃ pūrvajanmanaḥ //
badarīphalamātraṃ tu puroḍāśaṃ dadau guruḥ

tayopabhuktaṃ yatnena tataścakre sa mārjjanam //
mānuṣe vacane karṇe dadau jñānaṃ gurustataḥ

gurave dakṣiṇāṃ dattvā tataḥ sā ca mṛgānanā //
bhojarājāya sarva ca caritraṃ pūrvajanmanaḥ //

vaktuṃ pracakrame bālyādyadvṛttaṃ pūrvajanmani //
namaskṛtya guruṃ pūrvaṃ brāhmaṇānkṣatriyāṃstathā

// mṛgyuvāca // //
na viṣādastvayā kāryo rājañcchrutvā mayoditam //
itastvaṃ saptame sthāne kaliṃgādhipateḥ sutaḥ

mṛte pitari bālastvaṃ svabhiṣiktaḥ svamaṃtribhiḥ //
ahaṃ hi vaṃgarājasya saṃjātā duhitā kila

pariṇītā tvayā deva pitrā dattā svayaṃ nṛpa //
tvayā'haṃ paṭṭamahiṣī kṛtā yoṣidvarā yataḥ

yuvā jātaḥ krameṇaiva hiṃsraḥ krūro babhūva ha //
na vedaśāstrakuśalo dayādharmavivarjitaḥ

lubdho mānī mahākrodhī satyācāra bahiṣkṛtaḥ //
na devaṃ na guruṃ viprānno jānāti durāśayaḥ

viraktā hi prajāstasya brāhmaṇocchedakārakaḥ //
samāsannairnṛpaistasya deśaḥ sarvo viluṃpitaḥ //
sainyaṃ sarvaṃ samādāya yuddhāyopajagāma saḥ

sahaivāhaṃ gatā deva yuddhaṃ jātaṃ nṛpaiḥ saha //
hāritaṃ sainikaistasya gatā naṣṭā diśo daśa

tyaktvā dharmaṃ nijaṃ rājā palāyanaparo'bhavat //
gacchamānastu nṛpatiḥ śatrubhiḥ paripīḍitaḥ

tavāsmivādī duṣṭātmā hato lokavirodhakaḥ //
dehaṃ tasya gṛhītvāgnau praviṣṭāhaṃ nṛpottama

mṛtasyaivaṃ gatirnāsti narake sa vipacyate //
mṛtaṃ kāṃtaṃ samādāya bhāryāgnau praviśedyadi

sā tārayati pāpiṣṭhaṃ yāvadābhūtasaṃplavam //
iha pāpakṣayaṃ kṛtvā paścātsvarge mahīyate

atastvaṃ brāhmaṇo jāto deśe mālavake nṛpa //
tasyaiva tatra bhāryāhaṃ saṃbhūtā brāhmaṇī nṛpa

dhanadhānyasamṛddho'bhūttathā jīvadhanādhikaḥ //
mṛtaḥ pitā mṛtā mātā sa ca bhrātṛvivarjitaḥ

dhanadhānyasamṛddho'pi lubdho bhramati bhūtale //
atīva kopano vipro vedapāṭhavivarjitaḥ

snānasaṃdhyādihīnaśca māyāvī yācate janam //
bhaktiṃ karomi paramāṃ sa ca krudhyati māṃ prati

saṃtānaṃ tasya vai nāsti dhanarakṣāparo hi saḥ //
na dadāti na cāśnāti na juhoti sa rakṣati

na tarpaṇaṃ tilairvipro vidadhātyatilo bhataḥ //
kārttike'pi ca saṃprāpte viṣṇupūjāvivarjitaḥ

dīpaṃ dadāti no vipro māsamekaṃ nirantaram //
na bhuṃkte śākapatraṃ sa ekāhāro niraṃtaram

māse nabhasye saṃprāpte prāpte kṛṣṇe nṛpottama //
na karoti gṛhe śrāddhaṃ snānatarpaṇavarjitaḥ

na jānāti dinaṃ pitryaṃ pakṣamekaṃ nirantaram //
anyatra bhuṃkte vipro'sau kṣayāhe'pi samāgate

makarasthe'pi saṃkrāṃtau kṛśarānnaṃ dadāti na //
tilānsuvarṇaṃ tāraṃ vā vastraṃ vā phalameva ca //
śākapatraṃ sa puṣpaṃ vā na dadāti tatheṃdhanam

gavāṃ gavāhnikaṃ naiva kathaṃ muktirbhaviṣyati //
na yāti viṣṇuśaraṇaṃ saṃprāpte dakṣiṇāyane

dhenuṃ dadāti no vipro grahaṇe caṃdrasūryayoḥ

ekāpi dattā supayasvinī sā savastraghaṃṭābharaṇopapannā //
vatsena yuktā hi dadāti dātre muktiṃ kulasyāsya karoti vṛddhim

yāvaṃti romāṇi bhavaṃti tasyāstāvaṃti varṣāṇi mahīyate saḥ //
brahmālaye siddha gaṇairvṛto'sau saṃtiṣṭhate sūryasamānatejāḥ

devālayaṃ no vidadhāti vāpīṃ kūpaṃ taḍāgaṃ na karoti kuṇḍam //
puṇyaṃ vivāhaṃ sujanopakāraṃ nāsau satāṃ vā dvijamaṃdiraṃ ca

dhanaṃ sadā bhūmigataṃ karoti dharmaṃ na jānāti kulasya cāsau //
ahaṃ hi tasyānugatā bhavāmi kathaṃ hi kāṃtaṃ parivaṃ cayāmi

evaṃ hi varttamānaḥ sa kāladharmamupeyivān //
dhanalobhānmayā deva maraṇaṃ parivarjitam

paśyantyā gotribhiḥ sarvaṃ gṛhītaṃ dhanasaṃcayam //
kālena mahatā deva mṛtā'haṃ dvijamaṃdire

śvetasarpaḥ samabhavaddeśe tasminnarottama //
tatraivāhaṃ brāhmaṇasya saṃjātā tanayā nṛpa

varṣeṣṭame tu saṃprāpte pariṇītā dvijanmanā //
tasminneva gṛhe sarpo madīye vasate nṛpa

bhāryā mameti saṃdaṣṭo rātrau bharttā mahā hinā //
mṛto'pi brāhmaṇaiḥ sarpo laguḍairvinipātitaḥ

vaidhavyaṃ mama dattvā tu dvijasarpau mṛtāvubhau //
pitrā mātrā mahāśokaṃ kṛtvā me muṇḍitaṃ śiraḥ

vasānā śvetavastraṃ ca viṣṇubhaktiparāyaṇā //
māsopavāsaniratā yāni tīrthānyanekaśaḥ

sarpastu makaro jāto godāvaryāṃ śivālaye //
devaṃ bhīmeśvaraṃ draṣṭuṃ gatā'haṃ svajanaiḥ saha

yāvatsnātuṃ praviṣṭā'haṃ vṛtā sarvajanairnṛpa //
makareṇa tadā dṛṣṭā bhāryeyaṃ mama vallabhā //
gṛhītā makareṇāhaṃ netumaṃtarjale nṛpa

hāhākāraḥ samabhavajjanaḥ kṣubdhaḥ samaṃtataḥ //
kuṃtāghātena kenāsau makarastu nipātitaḥ

jhaṣavaktraḥ sthitā cāhaṃ mṛtā kṛṣṭā janairbahiḥ //
agniṃ dattvā jale kṣiptvā bhasma lokā gṛhāngatāḥ

strīvadhāllubdhvako jāto jhaṣastīrthaprabhāvataḥ //
mānuṣīṃ yonimāpannastasminneva mahāvane

agnerjalācca sarpācca gajātsiṃhādavṛṣādapi //
jhaṣādvisphoṭakānmṛtyuryeṣāṃ te narake gatāḥ

ātmahā bhrūṇahā strīhā brahmaghnaḥ kūṭasākṣyadaḥ //
kanyāvikrayakartā ca mithyā bratadharastu yaḥ //

vikrīṇāti kratuṃ yastu madyapaḥ syāddvijastu yaḥ //
rājadrohī svarṇacauro brahmavṛttivilopakaḥ

goghnastu nikṣepaharo grāmasīmāharastu yaḥ //
sarve te narakaṃ yāṃti yā ca strī pativaṃcakā

jhaṣamṛtyuprabhāvena jātā krauṃcī vane nṛpa //
godāvarīvane vyādho bhramate mṛgamārgakaḥ

vane krauṃcaḥ sakāmo māṃ mudā kāmayitumudyataḥ //
dṛṣṭāhaṃ bhramatā tena vyādhenākṛṣya kārmukam

hataḥ krauṃco mṛto rāja nnaṣṭā sthānādahaṃ tataḥ //
godāvarīvane tasminnevaṃrūpaṃ dadarśa tam

ṛṣirvyādhaṃ śaśāpātha dṛṣṭvā karma vigarhitam //
kāmadharmamakurvāṇaṃ priyā saṃbhāṣatatparam //
krauṃcaṃ tvamavadhīryasmāttasmātsiṃho bhaviṣyasi

ṛṣistena vinītena sthitvā santoṣito nṛpa //
ṛṣirvadati tasyāgre na me mithyā vaco bhavet

siṃhasthasya prasādaṃ te kariṣye muktihetave //
surāṣṭradeśe bhavitā siṃho raivatake girau

vastrāpathe mahā kṣetre muktiste vihitā dhruvā //
ityuktvā sa ṛṣirdeva gato bhīmeśvaraṃ prati //
durvacaḥśravaṇādvyādhaḥ kramātpaṃcatvamāyayau

krauṃcī krauṃcaviyogena gatā sā ca vanāṃtare //
mṛtā daivavaśājjātā mṛgī raivatake girau

mṛgayūthagatā nityaṃ modate madavihvalā //
vyādhaḥ siṃhaḥ samabhavadgirestasya mahāvane

kāmārtā bhramatā dṛṣṭā mṛgī siṃhena yatnataḥ //
tatra saṃbhramate nityaṃ siṃhaścāpi mṛgī vane

siṃho'pi daivayogena mameyamiti manyate //
paraṃ hiṃsrasvabhāvena tāmādātuṃ pracakrame

calatvaṃ mṛgajātīnāṃ vihitaṃ vedhasā svayam //
punargatā mṛgī yūthaṃ krīḍate cārulocanā

bhavasya paścime bhāge tatra raivatake girau //
anuyātaḥ śanaiḥ so'tha mṛgendro mṛgayūthapaḥ //
utpapāta tataḥ siṃho saṃghasya mūrddhani

siṃhasya na mṛgaiḥ kāryaṃ hariṇīṃ prati paśyataḥ //
yatra sā hariṇī yāti yayau siṃhastathaiva tām

yadā vegaṃ mṛgī cakre siṃhaḥ kuddhastadā vane //
siṃho'pi vegavāñjāto mṛgīvegādhiko'bhavat / १३६ //
yadā siṃhena saṃkrāṃtā dadau jhampāṃ mṛgī tu sā //
bhavasyāgre nadītoye patitā jalamūrddhani

laṃbate tu śarīraṃ me veṇau protaṃ śiro mama //
siṃhaḥ sahaiva patito mṛtaḥ payasi madhyataḥ

svarṇareṣājale deva viśīrṇaṃ mama tadvapuḥ //
na tu vaktraṃ nipatitaṃ tvaksāraśirasi sthitam

etaccaritraṃ yatsarvaṃ dṛṣṭaṃ sārasvatena vai //
tattīrthasya prabhāvena siṃhastvaṃ samajāyathāḥ

idaṃ hi saptamaṃ janma sarvapāpakṣayodayam //
kānyakubje mahādeśe rājā bhojetiviśrutaḥ

ahaṃ hi hariṇīgarbhe jātā mānuṣarūpiṇī //
jātaṃ vaktraṃ mṛgīṇāṃ me yasmānna patitaṃ jale

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe dvitīye vastrāpathakṣetramāhātmye bhavamāhātmye mṛgānanābhojavṛttāntavarṇane sārasvatamaharṣisaṃskṛtapuroḍāśaprāśanasamupa labdhaspaṣṭavākprasara mṛgānanākathitobhayaprāksaptajanmavṛttāntavarṇanaṃnāma ṣaṣṭho'dhyāyaḥ