Skanda Purana · Chapter 7.69

// devyuvāca // //
gaurīśvareti vikhyātaṃ yattvayā liṃgamuttamam //
kutra tiṣṭhati talliṃgaṃ pūjitaṃ yatphalaṃ labhet

// īśvara uvāca // //
śṛṇu devi pravakṣyāmi māhātmyaṃ pāpanārānam //
gaurīśvarasya devasya sarvakāmapradasya vai

idaṃ tapovanaṃ devi khyātaṃ gauryā mahāprabham //
dhanuṣāṃ pacapaṃcāśatsamaṃtātparimaṃḍalam

tatra madhye sthitā devī ekapādā taponvitā //
tasyā uttarato devi kiṃcidīśānasaṃsthitam//

dhanuṣāṃ caturaṃte ca liṃgaṃ pāpabhayāpaham //
yastatpūjayate bhaktyā liṃgaṃ bhaktiyuto naraḥ //
kṛṣṇāṣṭamyāṃ viśeṣeṇa sa muktaḥ pātakairbhavet

godānaṃ cātra śaṃsaṃti suvarṇaṃ dvijapuṃgave //
annadānaṃ viśeṣeṇa sarvapāpapraśāṃtaye

goghno vā brahmahā vā'pi tathā duṣkṛtakarmakṛt //
sarva pāpaiḥ pramucyeta tasya liṃgasya darśanāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsa kṣetramāhātmye gaurīśvaramāhātmyavarṇanaṃnāmaikonasaptatitamo'dhyāyaḥ