Skanda Purana · Chapter 7.70

// īśvara uvāca // //
tato gacchenmahādevi varuṇeśvaramuttamam //
gaurītapovanāgneyyāṃ dhanuṣāṃ viṃśatau sthitam //
liṃgaṃ mahāprabhāvaṃ hi varuṇena pratiṣṭhitam

pūrvaṃ pīto yadā devi samudraḥ kumbhajanmanā //
tadā kopena santapto varuṇaḥ saritāṃ patiḥ

kāmikaṃ tu samājñāya kṣetraṃ prābhāsikaṃ tadā //
tatrātapaddevi tapaḥ sa vai paramaduścaram

pratiṣṭhāpya mahāliṃgaṃ saṃpūjayati bhaktitaḥ //
varṣāṇāmayutaṃ sāgraṃ pūjito vṛṣabhadhvajaḥ

tataḥ prasanno deveśi nijagaṃgājalena tu //
pūrayāmāsa taṃ riktaṃ samudraṃ yādasāṃpatim

chaṃdayāmāsa taṃ liṃgaṃ varadānairanekadhā //
tatprabhṛtyeva te sarve samudrāḥ paripūritāḥ

varuṇeśvaranāmeti talliṃgaṃ tatprabhṛtyabhūt

ko hyartho bahubhirliṃgairdṛṣṭairvā surasundari //
varuṇeśena dṛṣṭena sarvatīrthaphalaṃ labhet

aṣṭamyāṃ ca caturdaśyāṃ taddadhnā snāpayedyadi //
sa brāhmaṇaścaturvedo jāyate nātra saṃśayaḥ

brāhmaṇāḥ kṣatriyā vaiśyāḥ śūdrāścānye varānane //
mūkāṃdhabadhirā bālāḥ striyaścaiva napuṃsakāḥ

dṛṣṭvā gacchaṃti te devi svargaṃ dharmaparāyaṇāḥ //
snānaṃ jāpyaṃ baliṃ homaṃ pūjāṃ stotraṃ ca nartanam //
tasminsthāne tu yaḥ kuryāttatsarvaṃ cākṣayaṃ bhavet

haimaṃ padmaṃ mauktikaṃ ca dānaṃ tatraiva dāpayet //
samyagyātrāphalāpekṣī svargāpekṣī tathā naraḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye varuṇeśvaramāhātmyavarṇanaṃnāma saptatitamo'dhyāyaḥ //