Skanda Purana · Chapter 7.68

// īśvara uvāca // //
iti proktāni te devi vaktraliṃgāni paṃca vai //
atha te saṃpravakṣyāmi yatra gauryāstapo vanam//
sthānaṃ mahāprabhāvaṃ hi surasiddhaniṣevitam

someśātpūrvadigbhāge ṣaṣṭidhanvaṃtare sthitam //
yatra devyā tapastaptaṃ satyā vai pūrvajanmani //

kṛtvā ca praṇayātkopaṃ mayā sārddhaṃ varānane //
prabhāsakṣetramāsādya saṃsthitā sā tapasvinī

// devyuvāca // //
kimarthaṃ sā parityajya satī tvāṃ tapasi sthitā //
kasminsthāne sthitā devī etanme vistarādvada

// īcara.uvāca // //
purā''sīstvaṃ mahādevi śyāmavarṇā manasvinī //
nāmārthaṃ ca mayā proktā kālīti rahasi sthitā

sā śrutvā vismayaṃ vākyaṃ bhṛśaṃ roṣaparāyaṇā //
abravītparuṣaṃ vākyaṃ bhṛkuṭī kuṭilānanā

yasmātkālītyahaṃ proktā tvayā śaṃbho'tiviplavāt//
tasmādyāsyāmi gaurīti bhaviṣyāmi ca yatra hi

evamuktvā mahābhāgā sakhīgaṇasamāvṛtā//
gatvā prabhāsakṣetraṃ sā pratiṣṭhāpya maheśvaram//
gaurīśvareti vikhyātaṃ pūjayaṃtī vidhānataḥ

tato liṃgasamīpasthā ekapāde sthitā satī //
liṃgamārādhayaṃtī sā cakāra sumahattapaḥ

paṃcāgnisādhikā devī grīṣma jāpyaparāyaṇā //
varṣāsvākāśaśayanā hemaṃte salilāśayā

yathā yathā tapo vṛddhiṃ yāti tasyā mahāprabhā //
tathātathā śarīrasya gauratvaṃ pratipadyate

kālena mahatā gaurī sarvāṃgeṇātha sā'bhavat //
tato vihasya bhagavānuvāca śaśiśekharaḥ

gaurīti ca muhurvākyamuttiṣṭha vraja mandiram //
varaṃ varaya kalyāṇi yatte manasi varttate

gauryuvāca // //
yo māmatra sthitāṃ paśyennārī vā puruṣo'tha vā //
sa bhūyātsutasaubhāgyaiḥ saptajanmāni saṃyutaḥ //

gītavādyādikaṃ nṛtyaṃ yaḥ kuryātpurato mama //
tasyānvaye na daurbhāgyaṃ bhūyāttava prasādataḥ

mayā pratiṣṭhitaṃ liṃgaṃ pūrvamabhyarcya māṃ tataḥ//
pūjayiṣyati yo bhaktyā sa yāsyati paraṃ padam

gaurīśvareti vikhyātaṃ nāma tasya bhavetprabho //
tathetyahaṃ pratijñāya tatra sthāne sthito 'bhavam

devyā saha mahādevi prahṛṣṭenāṃtarātmanā //
adyāpi ayane prāpte uttare dakṣiṇe'pi vā

gaurīṃsthānaṃ samabhyeti tatra deva guṇairyutaḥ//
tasminnahani yastatra viśiṣṭāni phalāni ca //
saṃprayacchati viprebhyastasya putrā bhavaṃti ca

putrahīnā tu yā nārī nālikeraṃ prayacchati //
putraṃ sā labhate śīghraṃ sabalaṃ lakṣaṇānvitam

ghṛtena dīpakaṃ tatra yā nārī saṃprayacchati //
raktavarttyā mahādevi yāvattasyaiva taṃtava //

tāvajjanmāṃtarāṇyeva sā saubhāgyamavāpnuyāt

yā nṛtyaṃ kurute tatra bhaktyā paramayā yutā //
ārogyasukhasaubhāgyaiḥ saṃyuktā sā bhavecciram

tatrāṃte sumahatkuḍaṃ tīrthaṃ svacchodapūritam //
yaḥ snānamācarettatra mucyate sarvapātakaiḥ

yaḥ śrāddhaṃ kurute tatra pitṝnuddiśya bhaktitaḥ //
sa yāti paramaṃ sthānaṃ pitṛbhiḥ saha puṇyabhāk

tasmātsarvaprayatnena śrāddhaṃ tatra samācaret //
gītavādyādibhirnṛtyai rātrau kurvīta jāgaram

daṃpatyoḥ paridhānaṃ ca tatra deyaṃ sadakṣiṇam //
yaścaitatpaṭhate nityaṃ tṛtīyāyāṃ viśeṣataḥ //
pārvatyāḥ purato devi sa saubhāgyamavāpnuyāt ]/ २७ //
śṛṇuyādvā'pi yo bhaktyā samyagbhaktiparāyaṇaḥ //
so'pi saubhāgyamāpnoti yāvajjīvaṃ na saṃśayaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye gaurītapovanamāhātmyavarṇanaṃnāmāṣṭaṣaṣṭitamo'dhyāyaḥ //