Skanda Purana · Chapter 7.63

// pulastya uvāca // //
etatte sarvamākhyātaṃ yanmāṃ tvaṃ paripṛcchasi //
arbudasya mahārāja māhātmyaṃ hi samāsataḥ

vistareṇa ca saṃkhyā syādapi varṣaśatairapi //
asaṃkhyānīha tīrthāni puṇyānyāyatanāni ca //
padepade gṛhāṇyeva nirmitāni maharṣibhiḥ

na tattīrthaṃ na sā siddhirna sa vṛkṣo mahīpate //
na sā nadī na deveśo yasya tatrāsti na sthitiḥ

ye vasaṃti mahārāja suramye'rbudaparvate //
nūnaṃ te puṇyakarmāṇo na vasaṃti triviṣṭape

kiṃ tasya jīvitenārthaḥ kiṃ dhanaiḥ kiṃ japairnṛpa //
yo na paśyati mandātmā samantādarbudācalam

api kīṭapataṃgā ye paśavaḥ pakṣiṇo mṛgāḥ //
svedajāścāṇḍajāścāpi hyudbhijjāśca jarāyujāḥ

tasminmṛtā mahārāja niṣkāmāḥ kāmato'pi vā //
te yānti śivasāyujyaṃ jarā maraṇavarjitam

yaścaitacchuṇuyānnityaṃ purāṇaṃ śraddhayānvitaḥ //
arbudasya mahārāja sa yātrāphalamaśnute

tasmātsarvaprayatnena yātrāṃ tatra samācaret //
ya icchedātmanaḥ siddhimiha loke paratra ca

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe'rbudakhaṇḍamāhātmyaphalaśrutivarṇanaṃnāma triṣaṣṭitamo'dhyāyaḥ

iti śrīskānde mahāpurāṇe saptame prabhāsakhaṇḍe tṛtīyamarbudakhaṇḍaṃ sampūrṇam // ७ - ३ //