Skanda Purana · Verses 7.63-2

// īśvara uvāca // //
tato gacchenmahādevi bhairaveśvaramuttamam //
yogeśvaryā dakṣiṇato nātidūre vyavasthitam

sarvapāpapraśamanaṃ dibyaiśvaryapradāyakam//
purā daityavināśārthaṃ yadā devī kṛtodyamā //

tadā bhairavamāhūya dūtatve niyuyoja ha //
śivadūtī tadā khyātā paścādyogeśvarīti ca

bhairavo yatra vai devyā dūtatve viniyojitaḥ //
tena liṃgaṃ samākhyātaṃ bhairaveśvaranāmakam

pūjitaṃ devadaityaiśca bhairaveṇa pratiṣṭhitam //
yastatpūjayate bhaktyā kārtikyāṃ vidhinā naraḥ //
niraṃtaraṃ vā ṣaṇmāsaṃ so'bhīṣṭaṃ labhate phalam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye bhairaveśvaramāhātmyavarṇanaṃnāma triṣaṣṭitamo'dhyāya