Skanda Purana · Chapter 7.62

// pulastyasya uvāca // //
tataḥ kaṭeśvaraṃ gacchelliṃgaṃ gaurīvinirmitam //
tathā gaṃgeśvaraṃ cānyadgaṅgayā nirmitaṃ svayam

purā samabhavadyuddhamumāyāḥ saha gaṃgayā //
saubhāgyaṃ prati rājendra tato gaurītyabhāṣata

yayā saṃpūjitaḥ śaṃbhuḥ śīghraṃ yāsyati darśanam //
sā saubhāgyavatī nūnabhāvayoḥ saṃbhaviṣyati

evamuktā tato gaṃgā satvaraityātra parvate //
liṃgamanveṣayāmāsa cirakālādavāpa sā

dṛṣṭvā gauryātha kaṭakaṃ parvatasya manoharam //
liṃgākāraṃ mahārāja pūjayāmāsa sā tadā

samyakchraddhāsamopetā tatastuṣṭo maheśvaraḥ //
pradadau darśanaṃ tasyā varado'smīti cābravīt

// gauryuvāca // //
sāpatnyajerṣyayā deva mayā liṃgaṃ prakalpitam //
tasmātkaṭeśvarākhyā ca loke cāsya bhaviṣyati

yā nārī patinā muktā sapatnīduḥkhaduḥkhitā //
asya saṃdarśanādeva sā bhaviṣyati vijvarā //
sutasaubhāgyasaṃpannā bhartṛprāṇasamā tathā

gaṃgayārādhito deva evameva varaṃ dadau //
tasmālliṃgadvayaṃ tacca draṣṭavyaṃ manujādhipa

viśeṣataśca nārībhiḥ sapatnīdoṣahānidam //
sukhasaubhāgyadaṃ nityaṃ tathā'bhīṣṭapradaṃ nṛṇām

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe kaṭeśvaragaṃgeśvaramāhātmyavarṇanaṃnāma dviṣaṣṭitamo'dhyāyaḥ