Skanda Purana · Verses 7.61-2

// īśvara uvāca // //
tato gacchenmahādevīṃ kṣetradūtīṃ tu vaiṣṇavīm //
śrīdaityasūdanāddevi pūrvabhāge vyavasthitām

yogeśvaryāstathaiśānyāṃ dhanuṣāṃ saptake sthitām //
mahādaurbhāgyadagdhānāṃ sthitāṃ bheṣajarūpiṇīm

cākṣuṣasyāṃtare devi yadā daityā balotkaṭāḥ //
hanyamānā viṣṇunā'tha dakṣiṇāṃ diśamāviśan

tatra varṣaśataṃ sāgraṃ daityāścakrurmahāhavam //
viṣṇunā saha deveśi divyāstraiśca pṛthagvidhaiḥ

duḥkhavadhyāṃstato jñātvā viṣṇuḥ kamalalocanaḥ //
sasmāra bhairavīṃ śaktiṃ mahāmāyāṃ mahāprabhām

sā smṛtā kṣaṇamātreṇa viṣṇunā prabhaviṣṇunā//
tatrāgatā mahādevī ānaṃdasphuritekṣaṇā

viśāle tu kṛte devyā locane viṣṇudarśanāt //
viśālākṣī tato jātā tatrasthā daityanāśinī

asminkalpesamākhyātā lalitomā varānane //
umādvayaṃ samākhyātaṃ someśe daityasūdane

pūrvaṃ someśvare paśyetpaścācchrīdaityasūdane //
umā dvayaṃ pūjayitvā tīrthayātrāphalaṃ labhet

māghe māsi tṛtīyāyāṃ vidhinā yo'rcayettu tām//
na saṃtativihīnaḥ syāttasyakoṭyanvaye naraḥ

yo nityamīkṣate tatra bhaktyā paramayā yutaḥ //
ārogyasukhasaubhāgyasaṃyukto'sau bhavecciram

iti saṃkṣepataḥ proktaṃ māhātmyaṃ lalitodbhavam//
śrutaṃ yatpāpanāśāya jāyate dharmavṛddhaye

iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṇḍe prathame prabhāsa kṣetramāhātmye lalitomāviśālākṣī māhātmyavarṇanaṃnāmaikaṣaṣṭitamo'dhyāyaḥ