સ્કંદ પુરાણ · અધ્યાય 7.60

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ જંબૂતીર્થમનુત્તમમ્ ॥
તત્ર સ્નાતો નરઃ સમ્યગિષ્ટં ફલમવાપ્નુયાત્। ॥
જંબૂદ્વીપસમુત્થાનાં તીર્થાનાં નૃપસત્તમ

આસીત્પુરા નિમિર્નામ ક્ષત્રિયઃ સૂર્યવંશજઃ ॥
વયસઃ પરિણામે સ પર્વતં ચાર્બુદં ગતઃ

પ્રાયોપવેશનં કૃત્વા સ્થિતસ્તત્ર સમાહિતઃ ॥
અથાજગ્મુર્મુનિગણાસ્તસ્ય પાર્શ્વે સહસ્રશઃ

ચક્રુર્ધર્મકથાં પુણ્યાં રાજર્ષીણાં મહાત્મનામ્ ॥
દેવર્ષીણાં પુરાણાનાં તથાન્યેષાં મહાત્મનામ્

તતઃ કશ્ચિત્કથાંતે ચ લોમશો નામ સન્મુનિઃ ॥
કીર્ત્તયામાસ માહાત્મ્યં સર્વતીર્થસમુદ્ભવમ્

તચ્છ્રુત્વા પાર્થિવો રાજન્નિમિઃ પરમદુર્મનાઃ ॥
બભૂવ ન કૃતં પૂર્વં યતસ્તીર્થાવગાહનમ્

તતઃ પ્રોવાચ તં વિપ્રમસ્ત્યુપાયો દ્વિજોત્તમ ॥
કશ્ચિદ્યેન ચ સર્વેષાં તીર્થાનાં લભ્યતે ફલમ્

॥
॥ લોમશ ઉવાચ ॥ ॥
દયા મે નૃપ સઞ્જાતા ત્વાં દૃષ્ટ્વા દુઃખિતં ભૃશમ્ ॥
તીર્થયાત્રાકૃતે યસ્માત્કરિષ્યેઽહં તવ પ્રિયમ્

અત્રૈવ ચાનયિષ્યામિ જંબૂદ્વીપોદ્ભવાનિ ચ ॥
સર્વતીર્થાનિ રાજેન્દ્ર મન્ત્રશક્ત્યા ન સંશયઃ

સ્નાનં કુરુ મહારાજ હ્યેકીભૂતેષુ તત્ર ચ ॥
અસ્મિઞ્જલાશયે પુણ્યે સત્યમેતદ્બ્રવીમ્યહમ્

એવમુક્ત્વા સ વિપ્રર્ષિર્ધ્યાનં ચક્રે સમાહિતઃ ॥
તતસ્તીર્થાનિ સર્વાણિ તત્રાયાતાનિ તત્ક્ષણાત્

પ્રત્યયાર્થં ચ રાજર્ષે જંબૂવૃક્ષો વ્યજાયત ॥
તત્ર સ્નાનં નૃપશ્ચક્રે સર્વતીર્થમયે ધ્રુવે

સદેહશ્ચ ગતઃ સ્વર્ગે તીર્થસ્નાનાદનન્તરમ્ ॥
તતઃ પ્રભૃતિ તત્તીર્થં જંબૂતીર્થમનુસ્મૃતમ્

કન્યાગતે રવૌ તત્ર યઃ શ્રાદ્ધં કુરુતે નરઃ ॥
ગયાશીર્ષસમં તસ્ય પુણ્યમાહુર્મહર્ષયઃ

ઇતિ શ્રીસ્કાન્દે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે તૃતીયેઽર્બુદખણ્ડે જંબૂતીર્થપ્રભાવવર્ણનંનામ ષષ્ટિતમોઽધ્યાયઃ