Skanda Purana · Verses 7.60-2

// īśvara uvāca // //
prabhāsakṣetradūtīnāṃ tritayaṃ varavarṇini //
atha te saṃpravakṣyāmi śṛṇu hyekamanāḥ priye

prathamā maṃgalā devī viśālākṣī dvitīyikā //
tathā catvaradevī tu tṛtīyā parikīrtitā

yathānukramataḥ pūjyāḥ śaktayastā varānane //
prabhāsakṣetrayātrāyāḥ phalaprepsurnaro yadi

// devyuvāca // //
kasminsthāne sthitā deva dūtyastāḥ kṣetrarakṣikāḥ //
kasya tāḥ kathamārādhyāḥ kathaṃ pūjyā jagatpate

//
// īśvara uvāca // //
brāhmī tu maṃgalā proktā viśālākṣī tu vaiṣṇavī //
raudrīśaktiḥ samākhyātā devī sā catvarapriyā

maṃgalā prathamaṃ pūjyā ajādevyuttare sthitā //
rāhvīśāddakṣiṇebhāge nātidūre varānane

someśvarapratiṣṭhāpya prārabdhe yajñakarmaṇi //
somena tatra devānāmāgatā sā didṛkṣayā

brahmādīnāṃ ca sā yasmānmāṃgalyaṃ kṛtavatyume //
tasmātsā maṃgalā proktā sarvamāṃgalyadāyinī

tṛtīyāyāṃ tu yā nārī naro vā pūjayiṣyati //
tasyā'maṃgalyaduḥkhāni nāśaṃ yāsyaṃti kṛtsnaśaḥ

dampatībhojanaṃ tatra phaladānaṃ sakañcukam //
praśastaṃ pṛṣadājyasya prāśanaṃ pāpanāśanam

iti saṃkṣepataḥ proktaṃ mahābhāgyaṃ mahodayam //
maṃgalāyāśca māhātmyaṃ sarvapātakanāśanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye maṅgalāmāhātmyavarṇanaṃnāma ṣaṣṭitamo'dhyāyaḥ