Skanda Purana · Verses 7.6-3

// devyuvāca // //
atyadbhutaṃ mahādeva māhātmyaṃ kathitaṃ mama //
apūrvaṃ devadeveśa kadācinna śrutaṃ mayā

brahmāṃḍe yāni liṃgāni kīrtitāni tvayā mama //
teṣāṃ prabhāvenādhikyaṃ someśe tatkathaṃ vada

kiṃ prabhāvo mahādeva kṣetrasya ca sureśvara //
tanme brūhi sureśāna yāthātathyaṃ mamāgrataḥ

// īśvara uvāca // //
ataḥ paraṃ pravakṣyāmi rahasyaṃ paramaṃ tava //
prabhāsakṣetramāhātmyaṃ someśasya varānane

tīrthānāṃ paramaṃ tīrthaṃ vratānāṃ paramaṃ vratam //
jāpyānāṃ paramaṃ jāpyaṃ dhyānānāṃ dhyānamuttamam

yogānāṃ paramo yogo rahasyaṃ paramaṃ mahat //
tattehaṃ saṃpravakṣyāmi śṛṇu hyekamanā priye

someśaṃ paramaṃ sthānaṃ paṃcavaktrasamanvitam //
etalliṃgaṃ na muṃcāmi satyaṃsatyaṃ mayoditam

yacca tatparamaṃ devi dhruvamakṣayamavyayam //
someśaṃ tadvijānīhi mā vikalpamanā bhava

nirbhayaṃ nirmalaṃ nityaṃ nirapekṣaṃ nirāśrayam //
niraṃjanaṃ niṣprapaṃcaṃ niḥsaṃgaṃ nirupadravam/

talliṃgamiti jānīhi prabhāse saṃvyavasthitam //
apavargamavijñeyaṃ manoramyamanāmayam

nityaṃ ca kāraṇaṃ devaṃ makhaghnaṃ sarvatomukham //
śivaṃ sarvātmakaṃ sūkṣmamanādyaṃ yacca daivatam

ātmopalabdhivijñeyaṃ cittaciṃtāvivarjitam //
gamāgamavinirmuktaṃ bahiraṃtaśca kevalam

ātmopalabdhiviṣayaṃ stutigocaravarjitam //
niṣkalaṃ vimalātmānaṃ prakaṭaṃ jñānadīpakam

talliṃgamiti jānīhi prabhāse surasuṃdari //
nirāvakāśarahitaṃ śabdaṃ śabdāṃtagocaram

niṣkalaṃ vimalaṃ devaṃ devadevaṃ surātmakam //
hetupramāṇarahitaṃ kalpanābhāvavarjitam

cittāvalokaviṣayaṃ bahiraṃtarasaṃsthitam //
prabhāse taṃ vijānīhi praṇavaṃ liṃgarūpiṇam

aniṣpaṃdaṃ mahātmānaṃ nirānaṃdāvalokanam //
lokāvalokamārgasthaṃ viśuddhajñānakevalam

vidyāviśeṣamārgasthamanekākārasaṃjñitam //
svabhāvabhāvanāgrāhyaṃ bhāvātītamalakṣaṇam

vākprapaṃcādirahitaṃ niṣprapañcātmakaṃ śivam//
jñānajñeyāvalokasthaṃ hetvābhāsavivarjitam

anāhataṃ śabdagataṃ śabdādigaṇasaṃbhavam //
evaṃ someśvaraṃ viddhi prabhāse liṃgarūpiṇam

śabdabrahmagataṃ śāntaṃ sa śabdāṃtagamāspadam //
sarvātirikta viṣayaṃ sarvadhyānapade sthitam

anādimacyutaṃ divyaṃ pramāṇātīta gocaram //
adhaścordhvaṃ gataṃ nityaṃ jīvākhyaṃ dehasaṃsthitam

hṛdādidvādaśāṃtasthaṃ prāṇāpānodayāstagam //
agrāhyamindriyātmānaṃ niṣkalaṃkātmakaṃ vibhum

svarādivyaṃjanātītaṃ varṇādiparivarjitam //
vācāmavācyaviṣayamahaṃkārārddharūpiṇam

apratarkyamanuccāryaṃ kalanākālavarjitam //
niḥśabdaṃ niścalaṃ saumyaṃ dehātītaṃ parātparam

bhūtāvagraharahitaṃ bhāvābhāvavivarjitam //
avijñeyaṃ paraṃ sūkṣmaṃ pañcapañcādisaṃbhavam

aprameyamanaṃtākhyamakṣayaṃ kāmarūpiṇam //
prabhavaṃ sarvabhūtānāṃ bījāṃkurasamudbhavam

vyāpakaṃ sarvakāmākhyamakṣaraṃ paramaṃ mahat //
sthūlasūkṣmavibhāgasthaṃ vyaktāvyaktaṃ sanātanam

kalpakalpāntarahitamanādinidhanaṃ mahat //
mahābhūtaṃ mahākāyaṃ śivaṃ nirvāṇabhairavam

evaṃ sadāśivaṃ viddhi prabhāse liṃgarūpiṇam //
yogakriyā vinirmuktaṃ mṛtyuṃjayamanādimat

sarvopasargarahitaṃ sarvatovyāpakaṃ śivam //
avyaktaṃ parato nityaṃ kevalaṃ dvaitavarjitam

ananyatejasākrāṃtaṃ prabhāsakṣetravāsinam//
bhūrisvayaṃprabhaprakhyaṃ sarvatejo'dhikaṃ haram

śaraṇyaṃdevamīśānamoṃkāraṃ śivarūpiṇam//
devadevaṃ mahādevaṃ paṃcavaktraṃ vṛṣadhvajam

nirmalaṃ mānasātītaṃ bhāvagrāhyamanūpamam//
sadā śāṃtaṃ virūpākṣaṃ śūlahastaṃ jaṭādharam

hṛtpadmakośamadhyasthaṃ śūnyarūpaṃ nirañjanam //
evaṃ sadāśivaṃ viddhi prabhāse liṅgarūpiṇam

yo'sau parātparo devo haṃsākhyaḥ parikīrtitaḥ //
nādākhyaḥ suvrate devi so'sminsthāne sthitaḥ svayam

etadādisvarūpaṃ ca mayā yogabalena tu //
vijñātaṃ devi gaditaṃ divyamātmānamātmanā

ṛgvedasthastu pūrvāhṇe madhyāhne yajuṣi sthitaḥ //
aparāhṇe tu sāmastho hyatharvastho niśāgame

vedāhametaṃ puruṣaṃ mahāṃtamādityavarṇaṃ tamasaḥ parastāt //
tameva viditvā na bhavettu mṛtyurnānyaḥ paṃthā vidyate vai janānām

itīritaste tu mahāprabhāvaḥ someśaliṃgasya kṛtaikadeśaḥ //
vṛtaṃ na cābdairbahubhiḥ sahasrairvaktuṃ ca kenāpi mukhairna śakyam

/
brāhmaṇaḥ kṣatriyo vaiśyaḥ śūdro'pīdaṃ paṭhedyadi //
nirmuktaḥ sarvapāpebhyaḥ sarvānkāmānavāpnuyāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śrīsomeśvaramahimavarṇanaṃ nāma ṣaṣṭho'dhyāyaḥ