Skanda Purana · Verses 7.6-2

// ṛṣaya ūcuḥ // //
sādhusādhu mahābhāga prahlādā surasattama //
yena naḥ kalimadhye tu darśito bhagavānhariḥ

tvanmukhakṣīrasiṃdhūtthā katheyamamṛtopamā //
karṇābhyāṃ pibatāṃ tṛptirmunīnāṃ na prajāyate //
kathayasva mahābāho tīrthayātrāṃ suvistarām // २ /
asmābhistatra gaṃtavyaṃ vahate yatra gomatī //
tiṣṭhate yatra bhagavāṃścakratīrthāvalokakaḥ //

bhavābdhau patitāṃstāta uddharasva bhavārṇavāt //
tīrthayātrāvidhānaṃ ca kathayasva mahāmate

// prahlāda uvāca // //
gatvā tu gomatītīre praṇameddaṃḍavacca tām //
prakṣālya pāṇipādau ca kṛtvā ca karayoḥ kuśān

gṛhītvā tu phalaṃ śubhramakṣataiśca samanvitam //
prāṅmukhaḥ prayato bhūtvā dadyādarghyaṃ vidhānataḥ

brahmalokātsamāyāte vasiṣṭhatanaye śubhe //
sarvapāpaviśuddhyarthaṃ dadāmyarghyaṃ tu gomati

vasiṣṭhatanaye devi suravaṃdye yaśasvini //
trailokyavaṃdite devi pāpaṃ me hara gomati

ityuccāryya dvijaśreṣṭhā mṛdamālabhya pāṇinā //
viṣṇuṃ saṃsmṛtya manasā maṃtrametamudīrayet

aśvakrāṃte rathakrāṃte viṣṇukrāṃte vasuṃdhare //
uddhṛtā'si varāheṇa kṛṣṇena śatabāhunā

mṛttike hara me pāpaṃ yanmayā pūrvasaṃcitam //
tvayā hatena pāpena pūtaḥ saṃvatsaraṃ bhavet

ityevaṃ mṛdamālipya snānaṃ kuryyādyathāvidhi //
āpo asmāniti snātvā śṛṇudhvaṃ yatphalaṃ labhet

kurukṣetre ca yatpuṇyaṃ rāhugraste divākare //
snānamātreṇa tatpuṇyaṃ gomatyāṃ kṛṣṇasannidhau

bhaktyā snātvā tu tatraivaṃ kuryātkarma yathoditam//
devānpitṝnmanuṣyāṃśca tarpayedbhāvasaṃyutaḥ

ye ca rauravasaṃsthā hi ye ca kīṭatvamāgatāḥ //
gomatīnīradānena muktiṃ yāṃti na saṃśayaḥ

vināpyakṣatadarbhairvā vinā bhāvanayā tathā //
vārimātreṇa gomatyāṃ gayāśrāddhaphalaṃ labhet

tataśca viprānāhūya vedajñāṃstīrasaṃśrayān //
viśvedevādi saṃpūjya pitṝṇāṃ śrāddhamācaret

śraddhayā parayā yuktaḥ śrāddhaṃ kṛtvā vidhānataḥ //
dakṣiṇāṃ ca tato dadyātsuvarṇaṃ rajataṃ tathā

suvarṇaśṛṃgasahitāṃ rājatakhurabhūṣitām //
ratnapucchāṃ vastrayutāṃ tāmrapṛṣṭhāṃ savatsakām

dadyādvipraṃ samabhyarcya vastrālaṃkārabhūṣaṇaiḥ //
saptadhānyayutāṃ dadyādviṣṇurme prīyatāmiti

āsīmāṃtaṃ visṛjyaitānbrāhmaṇānniyateṃdriyaḥ //
dīnāṃdhakṛpaṇebhyaśca dānaṃ dadyātsvaśaktitaḥ

gomatī gomayasnānaṃ godānaṃ gopicandanam //
darśanaṃ gopināthasya gakārāḥ paṃca durlabhāḥ

tasmāccaiva prakartavyaṃ godānaṃ gomatītaṭe //
evaṃ kṛtvā dvijaśreṣṭhāḥ kṛtakṛtyo bhavennaraḥ

ye gatā narakaṃ ghoraṃ ye ca pretatvamāgatāḥ //
pūrvakarmavipākena sthāvaratvaṃ gatāśca ye

pitṛpakṣe ca ye kecinmātṛpakṣe kulodbhavāḥ //
sarve te muktimāyāṃti gomatyā darśanātkalau

kṛtaṃ śrāddhaṃ narairyaistu gomatyāṃ bhūsurottamāḥ //
hayamedhasya yajñasya phalamāyāṃtyasaṃśayam

gaṃgāsnānena yatpuṇyaṃ prayāge parikīrttitam //
tatpuṇyaṃ samavāpnoti gomatyāṃ śrāddhakṛnnaraḥ

viṣṇulokaṃ hi gacchaṃti pitarastatkulodbhavāḥ //
anekajanmasāhasraṃ pāpaṃ yāti na saṃśayaḥ

vācā ca yatkṛtaṃ pāpaṃ karmaṇā manasā tathā//
tatsarvaṃ vilayaṃ yāti gomatīdarśanena hi

yo naraḥ kārttike snānaṃ gomatyāṃ kurute dvijāḥ//
prasanno bhagavāṃstasya lakṣmyā saha na saṃśayaḥ

pratyahaṃ hutam̐ bhoktāraṃ tarpayetsusamāhitaḥ//
pratyahaṃ ṣaḍrasaṃ deyaṃ bhojanaṃ ca dvijātaye

pūjayetkṛṣṇadevaṃ ca pratyahaṃ bhaktitatparaḥ //
yena kenāpi viprendrāḥ sthātavyaṃ niyamena tu

brāhmaṇānujñayā tatra gṛhṇīyānniyamānnaraḥ //
saṃpūrṇe kārttike māsi saṃprāpte bodhavāsare

paṃcāmṛtena deveśaṃ snāpayettīrthavāriṇā //
śrīkhaṇḍaṃ kuṃkumonmiśraṃ mṛganābhisamanvitam //
vilepayecca deveśaṃ bhaktyā dāmodaraṃ harim

kusumairvārisaṃbhūtaistulasyā karavīrakaiḥ //
taddeśasaṃbhavaiḥ puṣpaiḥ pūjayedgaruḍadhvajam

naivedyaṃ ruciraṃ dadyādvi ṣṇurme prīyatāmiti //
gītavādyādinṛtyena tathā pustakavācanaiḥ

rātrau jāgaraṇaṃ kāryyaṃ stotrairnānāvidhairapi //
āhūya brāhmaṇānbhaktyā bhojayecca svaśaktitaḥ

tato rathasthitaṃ devaṃ pūjayedgaruḍadhvajam //
kārttikāṃte ca vipreṃdrā gomatyudadhisaṃgame

snātvā pitṝṃśca saṃtarpya pūjayecca janārddanam //
suvastrairbhūṣaṇaiścāpi samabhyarcya ramāpatim //
anujñayā tu viprāṇāṃ vrataṃ saṃpūrṇatāṃ nayet

evaṃ yaḥ snāti viprendrāḥ kārttike kṛṣṇasannidhau //
sarvapāpavinirmukto viṣṇulokaṃ sa gacchati

māghasnānaṃ naro bhaktyā gomatyāṃ kurute tu yaḥ //
vainateyodaye nityaṃ saṃtuṣṭaḥ saha bhāryayā

tilā hiraṇyasahitā deyā brāhmaṇasattame //
modakā guḍasaṃmiśrāḥ pratyahaṃ dakṣiṇānvitāḥ

tilairājyāplutairhomaḥ karttavyaḥ pratyahaṃ naraiḥ //
homārthaṃ sevayedvahniṃ na śītārthaṃ kadācana

gomatyāṃ snāti yo bhaktyā māghaṃ mādhavavallabham //
samāptau raktavastrāṇi kañcukoṣṇīṣameva ca

dadyādupānahau bhaktyā kuṃkumaṃ ca viśeṣataḥ //
kambalaṃ tailapakvaṃ ca viṣṇurme prīyatāmiti

svāmikāryyamṛtānāṃ ca saṃgrāme śastrasaṃkule //
gavārthe brāhmaṇārthe ca mṛtānāṃ yā gatiḥ smṛtā

māghasnāne ca sā proktā gomatyāṃ nātra saṃśayaḥ //
sarvadānaphalaṃ tasya sarva tīrthaphalaṃ tathā

māghasnānānnaro yāti viṣṇulokaṃ sanātanam //
sarvānkāmānavāpnoti samabhyarcya janārddanam

māghaṃ yaḥ kṣapate sarvaṃ gomatyudadhisaṃgame //
brāhmaṇānujñayā viprāḥ sarvaṃ saṃpūrṇatāṃ vrajet

pāpino'pi dvijaśreṣṭhā ye snātā gomatījale //
yajvināṃ ca gatiṃ yāṃti prasādāccakrapāṇinaḥ

brahmarudrapadādūrdhvaṃ yatpadaṃ cakrapāṇinaḥ //
snānamātreṇa gomatyāṃ tatproktaṃ kṛṣṇasaṃnidhau

mitradrohe ca yatpāpaṃ yatpāpaṃ gurughātini //
tatpāpaṃ samavāpnoti yātrābhaṃgaṃ karoti yaḥ

brahmasvahāriṇaḥ pāpāstathā devasvahāriṇaḥ //
snānamātreṇa śuddhyaṃti gomatyāṃ nātra saṃśayaḥ

bhītā'bhayapradānena yatpuṇyaṃ labhate naraḥ //
tatpuṇyaṃ samavāpnoti gomatyāṃ snānamātrataḥ

bhītābhaya pradānena putrāniṣṭānna saṃśayaḥ //
dhanakāmastu vipulaṃ labhate dhanamūrjitam

prāpnuyādīpsitānkāmāngomatīnīrasaṃgame //
kṛtakṛtyo bhavedviprā ṛṇānmucyeta paitṛkāt

manasā vacasā caiva karmaṇā yadupārjitam //
tatsarvaṃ naśyate pāpaṃ gomatīnīrasaṃgamāt

pītāṃbaradharo bhūtvā tathā garuḍavāhanaḥ //
vanamālī caturbāhurdivyagandhānulepanaḥ //
yāti viṣṇvālayaṃ viprā apunarbhavalakṣaṇam

gomatīsnānamātreṇa mānavo nātra saṃśayaḥ //
sarvapāpavinirmukto yāti viṣṇuṃ sanātanam

iti śrīskāṃde mahāpurāṇa ekāśītisāhasryāṃ sahitāyāṃ saptame prabhāsakhaṃḍe caturthe dvārakāmāhātmye gomatyudadhisaṃgame snānadānādimāhātmyavarṇanaṃnāma ṣaṣṭho'dhyāyaḥ