Skanda Purana · Chapter 7.6

// pulastya uvāca // //
tato gacchennṛpaśreṣṭha vasiṣṭhaṃ tapasāṃ nidhim //
yaṃ dṛṣṭvā mānavaḥ samyakkṛtārthatvamavāpnuyāt

tatrāsti jalasampūrṇaṃ kuṇḍaṃ pāpaharaṃ nṛṇām//
tasminkuṇḍe nṛpaśreṣṭha vasiṣṭhena mahātmanā

gomatī ca samānītā tapasā nṛpasattama //
tatra snāto naraḥ samyakpātakai rvipramucyate

ṛṣidhānyena yastatra śrāddhaṃ nṛpa samācaret //
sa pitṛṃstārayetsarvānpakṣayorubhayorapi

atra gāthā purā gītā nāradena mahātma nā //
snātvā puṇyodake tatra dṛṣṭvā taṃ munisattamam

kiṃ gayāśrāddhadānena kimanyairmakhavistaraiḥ //
vasiṣṭhasyāśramaṃ prāpya yaḥ śrāddhaṃ kurute naraḥ //
sa pitṝṃstārayetsarvānātmanā nṛpasattama

tatraivāruṃdhatī sādhvī vasiṣṭhasya samīpataḥ //
pūjanīyā viśeṣeṇa sarvakāmapradā nṛṇām

bālye vayasi yatpāpaṃ vārddhake yauvane'pi vā //
vasiṣṭhadarśanātsadyo narāṇāṃ yāti saṃkṣayam

dīpaṃ prayacchate yastu vasiṣṭhāgre samāhitaḥ //
sukhasaubhāgyasaṃyuktastejasvī jāyate naraḥ

upavāsaparo yastu tatraikā rajanīṃ nayet //
sa yāti paramaṃ sthānaṃ yatra saptarṣayo'malāḥ

trirātriṃ kurute yastu vasiṣṭhāgre samāhitaḥ //
sa yāti ca maharlokaṃ jarāmaraṇavarjitaḥ

yastu māsopavāsaṃ ca vasiṣṭhāgre karoti ca //
so'pi muktimavāpnoti na yāti sa bhavārṇavam

śrāvaṇasya site pakṣe paurṇamāsyāṃ samāhitaḥ//
ṛṣiṃ tarpayate yastu brahmalokaṃ sa gacchati

vasiṣṭhasyāgrato yastu gāyatryaṣṭaśataṃ japet//
ājanmamaraṇātpāpātsadyo mucyeta mānavaḥ

vāmadevaṃ yajettatra yadi śraddhāsamanvitaḥ//
agniṣṭomaphalaṃ rājansadyaḥ prāpnoti mānavaḥ

tasmātsarvaprayatnena draṣṭavyo'sau mahāmuniḥ //
śucibhiḥ śraddhayā yuktāste yāsyaṃti paraṃ padam

tasmātsarvātmanā rājanvāmadevaṃ ca pūjayet

iti śrīskāṃde mahāpurāṇa ekāśīti sāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe vasiṣṭhāśramamāhātmyavarṇanaṃnāma ṣaṣṭho'dhyāyaḥ