સ્કંદ પુરાણ · અધ્યાય 7.6

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ વસિષ્ઠં તપસાં નિધિમ્ ॥
યં દૃષ્ટ્વા માનવઃ સમ્યક્કૃતાર્થત્વમવાપ્નુયાત્

તત્રાસ્તિ જલસમ્પૂર્ણં કુણ્ડં પાપહરં નૃણામ્॥
તસ્મિન્કુણ્ડે નૃપશ્રેષ્ઠ વસિષ્ઠેન મહાત્મના

ગોમતી ચ સમાનીતા તપસા નૃપસત્તમ ॥
તત્ર સ્નાતો નરઃ સમ્યક્પાતકૈ ર્વિપ્રમુચ્યતે

ઋષિધાન્યેન યસ્તત્ર શ્રાદ્ધં નૃપ સમાચરેત્ ॥
સ પિતૃંસ્તારયેત્સર્વાન્પક્ષયોરુભયોરપિ

અત્ર ગાથા પુરા ગીતા નારદેન મહાત્મ ના ॥
સ્નાત્વા પુણ્યોદકે તત્ર દૃષ્ટ્વા તં મુનિસત્તમમ્

કિં ગયાશ્રાદ્ધદાનેન કિમન્યૈર્મખવિસ્તરૈઃ ॥
વસિષ્ઠસ્યાશ્રમં પ્રાપ્ય યઃ શ્રાદ્ધં કુરુતે નરઃ ॥
સ પિતૄંસ્તારયેત્સર્વાનાત્મના નૃપસત્તમ

તત્રૈવારુંધતી સાધ્વી વસિષ્ઠસ્ય સમીપતઃ ॥
પૂજનીયા વિશેષેણ સર્વકામપ્રદા નૃણામ્

બાલ્યે વયસિ યત્પાપં વાર્દ્ધકે યૌવનેઽપિ વા ॥
વસિષ્ઠદર્શનાત્સદ્યો નરાણાં યાતિ સંક્ષયમ્

દીપં પ્રયચ્છતે યસ્તુ વસિષ્ઠાગ્રે સમાહિતઃ ॥
સુખસૌભાગ્યસંયુક્તસ્તેજસ્વી જાયતે નરઃ

ઉપવાસપરો યસ્તુ તત્રૈકા રજનીં નયેત્ ॥
સ યાતિ પરમં સ્થાનં યત્ર સપ્તર્ષયોઽમલાઃ

ત્રિરાત્રિં કુરુતે યસ્તુ વસિષ્ઠાગ્રે સમાહિતઃ ॥
સ યાતિ ચ મહર્લોકં જરામરણવર્જિતઃ

યસ્તુ માસોપવાસં ચ વસિષ્ઠાગ્રે કરોતિ ચ ॥
સોઽપિ મુક્તિમવાપ્નોતિ ન યાતિ સ ભવાર્ણવમ્

શ્રાવણસ્ય સિતે પક્ષે પૌર્ણમાસ્યાં સમાહિતઃ॥
ઋષિં તર્પયતે યસ્તુ બ્રહ્મલોકં સ ગચ્છતિ

વસિષ્ઠસ્યાગ્રતો યસ્તુ ગાયત્ર્યષ્ટશતં જપેત્॥
આજન્મમરણાત્પાપાત્સદ્યો મુચ્યેત માનવઃ

વામદેવં યજેત્તત્ર યદિ શ્રદ્ધાસમન્વિતઃ॥
અગ્નિષ્ટોમફલં રાજન્સદ્યઃ પ્રાપ્નોતિ માનવઃ

તસ્માત્સર્વપ્રયત્નેન દ્રષ્ટવ્યોઽસૌ મહામુનિઃ ॥
શુચિભિઃ શ્રદ્ધયા યુક્તાસ્તે યાસ્યંતિ પરં પદમ્

તસ્માત્સર્વાત્મના રાજન્વામદેવં ચ પૂજયેત્

ઇતિ શ્રીસ્કાંદે મહાપુરાણ એકાશીતિ સાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખંડે વસિષ્ઠાશ્રમમાહાત્મ્યવર્ણનંનામ ષષ્ઠોઽધ્યાયઃ