સ્કંદ પુરાણ · અધ્યાય 7.59

॥ પુલસ્ત્ય ઉવાચ ॥ ॥
તતો મહૌજસં ગચ્છેત્તીર્થં પાતકનાશનમ્ ॥
યસ્મિન્સ્નાતો નરો રાજંસ્તેજસા યુજ્યતે ધ્રુવમ્ ॥
બ્રહ્મહત્યાગ્નિના શક્રઃ પુરા દૈન્યં પરં ગતઃ

નિઃશ્રીકસ્તેજસા હીનો દુર્ગન્ધેન સમન્વિતઃ ॥
પરિત્યક્તઃ સુરૈઃ સર્વૈર્વિષાદં પરમં ગતઃ

તતઃ પપ્રચ્છ દેવેન્દ્રો દ્વિજશ્રેષ્ઠં બૃહસ્પતિમ્ ॥
ભગવંસ્તેજસો વૃદ્ધિઃ કથં સ્યાન્મે યથા પુરા

॥ બૃહસ્પતિરુવાચ ॥ ॥
તીર્થયાત્રાં સુરશ્રેષ્ઠ કુરુષ્વ ધરણીતલે ॥
તીર્થં વિના ધ્રુવં વૃદ્ધિસ્તેજસો ન ભવિષ્યતિ

તતસ્તીર્થાન્યનેકાનિ ભ્રાંત્વા શક્રો નરાધિપ ॥
ક્રમેણૈવાર્બુદં પ્રાપ્તસ્તત્ર દૃષ્ટ્વા જલાશયમ્ ॥
સ્નાનં ચક્રે તતઃ શ્રાન્તો મહૌજાઃ પ્રત્યપદ્યત

દુર્ગન્ધેન વિનિર્મુક્તસ્તતો દેવૈઃ સમાવૃતઃ ॥
ઉવાચ પ્રહસન્વાક્યં શૃણુધ્વં સર્વદેવતાઃ

યેઽત્ર સ્નાનં કરિષ્યન્તિ પ્રાપ્તે શક્રોચ્છ્રયે સદા ॥
આશ્વિને શુક્લપક્ષાંતે તે યાસ્યંતિ પરાં ગતિમ્ ॥
સુશ્રીકાશ્ચ ભવિષ્યંતિ સદા જન્મનિજન્મનિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખંડે મહૌજસતીર્થપ્રભાવવર્ણનંનામૈકોનષષ્ટિતમોઽધ્યાયઃ