Skanda Purana · Chapter 7.57

// pulastya uvāca // //
aviyuktavanaṃ gacchettataḥ pārthivasattama //
yasmindṛṣṭe narobhīṣṭairna viyujyeta karhicit

tatra pūrvaṃ śacī rājanpraviṣṭā duḥkhasaṃyutā //
nahuṣeṇa hṛte rājye devendrasya mahātmanaḥ

tatprabhāvātpunaḥ prāpto viyukto'pi śatakratuḥ //
tatastasya varo datto vanasya hi tayā nṛpa

naro vā yadi vā nārī viyuktā'tra vane śubhe //
priyairnivāsa ekasminrātrimekāṃ vasiṣyati

sa tena labhate saṃgaṃ bhūya eva yathā mayā //
priyaiḥ sa labhate vāsamekarātraṃ vasannṛpa

phaladānaṃ praśaṃsaṃti tatra brāhmaṇasattamāḥ //
vaṃdhyānāṃ ca viśeṣeṇa yataḥ putraphalaṃ labhet

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṇḍe'viyuktakṣetramāhātmyavarṇanaṃnāma saptapañcāśattamo'dhyāyaḥ