Skanda Purana · Verses 7.57-2

// īśvara uvāca // //
paṃcaivaṃ siddhaliṃgāni kathitāni tava priye //
yaścainaṃ veda saṃketaṃ kṣetravāsī sa ucyate

atha śaktitrayāṇāṃ te raudrīṇāṃ vacmi vistaram //
icchā kriyājñānaśaktyastisrastāḥ parikīrttitāḥ

punastāsāṃ pūjanāyānukramaṃ kramataḥ śṛṇu //
caturdaśa tathā paṃca pūrvamuktāni yāni tu

//
catvāri trīṇi caikaṃ vā yathāśaktyābhipūjya ca //
liṃgāni tāni saṃpūjya śaktīstisrastato'rcayet

someśādīśadigbhāge varāroheti yā smṛtā //
amā kalā sā somasya umā paścātprakīrttitā

icchāśaktistu sā jñeyāprabhāsakṣetrasaṃsthitā //
tatra devi hitārthāya sarveṣāṃ prāṇināṃ bhuvi

tasyā māhātmyamakhilaṃ kathayāmi tavādhunā //
purā somena tyaktābhirbhāryābhistu varānane

ṣaḍviṃśadbhistapastaptaṃ kṣetre prābhāsike śubhe //
gaurī sā''rādhyamānātha divyavarṣagaṇānbahūn

tāsāṃ pratyakṣatāṃ prāptā pārvatī parameśvarī //
uvāca varadā brūta yadvo manasi saṃsthitam

atha tāścābruvandevi yadi tuṣṭāsi pārvati //
saubhāgyaṃ dehi no bhūri lāvaṇyaṃ paramaṃ tathā

tyaktāḥ sarvā vayaṃ devi nirdoṣāḥ svāminā śubhe //
daurbhāgyadoṣasaṃdagdhā daurbhāgyeṇa tu pīḍitāḥ

// gauryuvāca // //
adyaprabhṛti sarvā vaḥ samaṃ drakṣyati rātripaḥ //
prasādānmama cārvaṃgyo naitanmithyā bhaviṣyati

varadā ceti mannāma varadānādbhaviṣyati //
ihāgatya tu yā nārī pūjayiṣyati māṃ śubhām

na daurbhāgyaṃ kule tasyāḥ kvacitprāpsyaṃti yoṣitaḥ //
māghamāse tṛtīyāyāmupavāsaparāyaṇā

yā māṃ drakṣyati suśroṇī mattulyā sā bhavi ṣyati //
dampatī ṣoḍaśaivātra paridhāpya prayatnataḥ

phalāni bhakṣyabhojyaṃ ca pakvānnāni ca ṣoḍaśa //
yā pradāsyati vai nārī sā tūmaiva bhaviṣyati

etadgaurīvrataṃnāma tṛtīyāyāṃ tu kārayet //
aprasūtā ca yā nārī yā nārī durbhagā bhavet

pumānasakṛdapyaivaṃ kṛtvā prāpsyatyabhīpsitam //
evamuktvā sthitā tatra sā devī cārulocanā

paśyate rātrināthaśca sarvāstā rohiṇīṃ yathā //
anyāpi duḥkhasaṃdagdhā daurbhāgyeṇa tu pīḍitā

apūjayadumāṃ devīṃ subhagā sā'bhavattataḥ //
iti saṃkṣepataḥ proktaṃ māhātmyaṃ śaktisaṃbhavam

someśvare varārohā nāmeti kathitaṃ tava //
sarvapāpakṣayakaraṃ sarvadāridryanāśanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye varārohāmāhātmyavarṇanaṃnāma saptapaṃcāśo'dhyāyaḥ