Skanda Purana · Verses 7.54-2

// īśvara uvāca // //
tato gacchenmahādevi gaṃdharveśvaramuttamam //
daṇḍapāṇestu bhavanāduttare nikaṭe sthitam

yatra gaṃdharvarājo vai ghanavāheti viśrutaḥ//
tasya gaṃdharvaseneti khyātā putrī mahāprabhā

śikhaṃḍinā gaṇenaiva sā śaptā rūpagarvitā//
tato gośṛṃgaṛṣiṇā dattastasyā anugrahaḥ

somavāravratenaiva someśārādhanaṃ prati//
tataḥ kṣetraṃ samāgatya tapaḥ kṛtvā suduścaram

liṃgaṃ pratiṣṭhayāmāsa tatra gaṃdharvarāṭ svayam//
tathaiva putryā tasyaiva tatra liṃgaṃ pratiṣṭhitam

atha tatraiva deveśi daṃḍapāṇeḥ samīpataḥ //
ghanavāheśvaraṃ nāma yo liṃgaṃ yatnato'rcayet

gaṃdharvalokamāpnoti dṛṣṭvā sa prayataḥ śuciḥ //
iti te kathitaṃ devi gāṃdharvaṃ liṃgamuttamam

tṛtīyaṃ sarvapāpānāṃ nāśanaṃ puṇyavarddhanam //
agnitīrthe naraḥ snātvā pūjya gaṃdharvapūjitam

ayane cottare prāpte nirvāṇamadhigacchati //
śrutvā 'bhinaṃdya māhātmyaṃ mucyate mahato bhayāt

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetra māhātmye gandharveśvaramāhātmyavarṇanaṃnāma catuḥpaṃcāśo'dhyāyaḥ