Skanda Purana · Chapter 7.54

// pulastya uvāca // //
tatastripuṣkaraṃ gacchedabhīṣṭaṃ padmajasya ca //
brahmaṇā tatsamānītaṃ parvate'rbudasaṃjñake

vasiṣṭhasya purā satre varttamāne narādhipa //
tasminnage samāyātā brahmādyāśca surottamāḥ

pratijñātaṃ mahārāja brahmaṇā'vyaktajanmanā //
yāvatsthāsye nṛloke'smiṃstāvatsandhyāṃ tripuṣkare //
vaṃdayiṣyāmi saṃprāpte saṃdhyākāle samāhitaḥ

etasminneva kāle tu prasthitaḥ puṣkaraṃ prati //
saṃdhyārthaṃ padmajo yāvadvasiṣṭhastāvadabravīt

// vasiṣṭha uvāca // //
karmakālaśca samprāpto yajñe'sminsurasattama //
sa vinā na tvayā deva siddhiṃ yāsyati karhicit

tasmādānaya cātraiva padmayone tripuṣkaram //
saṃdhyopāstiṃ tataḥ kṛtvā tatra bhūyaḥ sureśvara //
brahmatvaṃ kuru deveśa satre cāsmindayānidhe

evamukto vasiṣṭhena brahmā loka pitāmahaḥ //
dhyātvā tatrānayāmāsa jyeṣṭhamadhyakaniṣṭhikam //
puṣkaratritayaṃ cāgātsupuṇye salilāśaye

tataḥprabhṛti saṃjātamarbude'smiṃstripuṣkaram

tatra yaḥ kārtike māsi paurṇamāsyāṃ samāhitaḥ //
snānaṃ karoti dānaṃ ca tasya lokāḥ sanātanāḥ

tasya cottaradigbhāge sāvitrīkuṇḍamuttamam //
snānadānādikaṃ kurvanyatra yāti śubhāṃ gatim

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe tṛtīye'rbudakhaṃḍe tripuṣkaramāhātmyavarṇanaṃnāma catuṣpaṃcāśattamo'dhyāyaḥ