સ્કંદ પુરાણ · અધ્યાય 7.54

॥ પુલસ્ત્ય ઉવાચ ॥ ॥
તતસ્ત્રિપુષ્કરં ગચ્છેદભીષ્ટં પદ્મજસ્ય ચ ॥
બ્રહ્મણા તત્સમાનીતં પર્વતેઽર્બુદસંજ્ઞકે

વસિષ્ઠસ્ય પુરા સત્રે વર્ત્તમાને નરાધિપ ॥
તસ્મિન્નગે સમાયાતા બ્રહ્માદ્યાશ્ચ સુરોત્તમાઃ

પ્રતિજ્ઞાતં મહારાજ બ્રહ્મણાઽવ્યક્તજન્મના ॥
યાવત્સ્થાસ્યે નૃલોકેઽસ્મિંસ્તાવત્સન્ધ્યાં ત્રિપુષ્કરે ॥
વંદયિષ્યામિ સંપ્રાપ્તે સંધ્યાકાલે સમાહિતઃ

એતસ્મિન્નેવ કાલે તુ પ્રસ્થિતઃ પુષ્કરં પ્રતિ ॥
સંધ્યાર્થં પદ્મજો યાવદ્વસિષ્ઠસ્તાવદબ્રવીત્

॥ વસિષ્ઠ ઉવાચ ॥ ॥
કર્મકાલશ્ચ સમ્પ્રાપ્તો યજ્ઞેઽસ્મિન્સુરસત્તમ ॥
સ વિના ન ત્વયા દેવ સિદ્ધિં યાસ્યતિ કર્હિચિત્

તસ્માદાનય ચાત્રૈવ પદ્મયોને ત્રિપુષ્કરમ્ ॥
સંધ્યોપાસ્તિં તતઃ કૃત્વા તત્ર ભૂયઃ સુરેશ્વર ॥
બ્રહ્મત્વં કુરુ દેવેશ સત્રે ચાસ્મિન્દયાનિધે

એવમુક્તો વસિષ્ઠેન બ્રહ્મા લોક પિતામહઃ ॥
ધ્યાત્વા તત્રાનયામાસ જ્યેષ્ઠમધ્યકનિષ્ઠિકમ્ ॥
પુષ્કરત્રિતયં ચાગાત્સુપુણ્યે સલિલાશયે

તતઃપ્રભૃતિ સંજાતમર્બુદેઽસ્મિંસ્ત્રિપુષ્કરમ્

તત્ર યઃ કાર્તિકે માસિ પૌર્ણમાસ્યાં સમાહિતઃ ॥
સ્નાનં કરોતિ દાનં ચ તસ્ય લોકાઃ સનાતનાઃ

તસ્ય ચોત્તરદિગ્ભાગે સાવિત્રીકુણ્ડમુત્તમમ્ ॥
સ્નાનદાનાદિકં કુર્વન્યત્ર યાતિ શુભાં ગતિમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખંડે ત્રિપુષ્કરમાહાત્મ્યવર્ણનંનામ ચતુષ્પંચાશત્તમોઽધ્યાયઃ