Skanda Purana · Chapter 7.53

// pulastya uvāca // //
tato gacchedbrahmapadaṃ tīrthaṃ trailokyaviśrutam //
yatra pūrvaṃ padaṃ nyastaṃ brahmaṇā lokakāriṇā

purā brahmādayo devāstatra sarve samāhitāḥ //
arbude parvate ramya ṛṣayaśca sunirmalāḥ

acaleśvarayātrāyāṃ subhaktyā bhāvitā nṛpa //
atha te munayaḥ sarve procurdevaṃ pitāmaham

// ṛṣaya ūcuḥ // //
prabhūtaniyamairhomairvratasnānaiśca nityaśaḥ //
upavāsaiśca nirviṇṇā vayaṃ sarve pitāmaha

tasmātsadupadeśaṃ tvaṃ kiṃciddātumihārhasi //
tarāmo yena deveśa durgaṃ saṃsārasāgaram

ayācitopacāraiśca japahomaiḥ suduṣkaraiḥ //
mantrairvrataistathā dānaiḥ svargaprāptiṃ vadasva naḥ

teṣāṃ tadvacanaṃ śrutvā tadā devaḥ kṛpānvitaḥ //
ciṃtayāmāsa suciramiha kiṃcitprahasya ca

tataḥ svakaṃ padaṃ tyaktvā ramye parvatarodhasi //
athovāca munīnsarvānbrahmā saṃślakṣṇayā girā

// brahmovāca // //
etanmahāpadaṃ ramyaṃ sarvapātakanāśanam //
spṛśaṃtu ṛṣayaḥ sarve tato yāsyatha sadgatim //

vinā snānena dānena vratahomajapādibhiḥ//
hitārthaṃ sarvalokānāṃ mayā nyastaṃ padaṃ śubham

asminpade mayā nyaste yāṃti lokāḥ sahasraśaḥ//
spṛśaṃtu ṛṣayaḥ sarve devāścāpi padaṃ mama

ekaivātra prakarttavyā śraddhā vā'vyabhicāriṇī //
yaśca śraddhānvitaḥ samyakpadametanmunīśvarāḥ

pūjayiṣyati saṃprāpte kārtike pūrṇimādine //
toyaiḥ phalaiśca vividhairgaṃdhamālyānulepanaiḥ

brāhmaṇānbhojayitvā tu miṣṭānnena svaśaktitaḥ //
sa yāsyati na sandeho mama lokaṃ sudurlabham

// pulastya uvāca // //
tato munigaṇāḥ sarve samyakchraddhāsamanvitāḥ //
pūjayitvā padaṃ tatra brahmalokaṃ samāgatāḥ

tasmātsarvaprayatnena padaṃ pūjyaṃ narottama //
pitāmahapadaṃ samyakchraddhayā svargadāyakam

anyatkautūhalaṃ rājanmahaddṛṣṭaṃ mahādbhutam //
padasya tasya yacchrutvā jāyate vismayo mahān

āyāmavistareṇā'pi prāpte kṛtayuge nṛpa //
na saṃkhyā jāyate rājañchuklavarṇasya mānavaiḥ

tatastretāyuge prāpte raktavarṇaṃ pradṛśyate //
suvyaktaṃ saṃkhyayā yuktaṃ sarvalokanamaskṛtam

dvāpare kapilaṃ tacca laghumātraṃ pradṛśyate //
kalau kṛṣṇaṃ susūkṣmaṃ ca ramye parvatarodhasi

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṃḍe brahmapadotpattimāhātmyavarṇanaṃnāma tripañcāśattamo'dhyāyaḥ