સ્કંદ પુરાણ · અધ્યાય 7.53

॥ પુલસ્ત્ય ઉવાચ ॥ ॥
તતો ગચ્છેદ્બ્રહ્મપદં તીર્થં ત્રૈલોક્યવિશ્રુતમ્ ॥
યત્ર પૂર્વં પદં ન્યસ્તં બ્રહ્મણા લોકકારિણા

પુરા બ્રહ્માદયો દેવાસ્તત્ર સર્વે સમાહિતાઃ ॥
અર્બુદે પર્વતે રમ્ય ઋષયશ્ચ સુનિર્મલાઃ

અચલેશ્વરયાત્રાયાં સુભક્ત્યા ભાવિતા નૃપ ॥
અથ તે મુનયઃ સર્વે પ્રોચુર્દેવં પિતામહમ્

॥ ઋષય ઊચુઃ ॥ ॥
પ્રભૂતનિયમૈર્હોમૈર્વ્રતસ્નાનૈશ્ચ નિત્યશઃ ॥
ઉપવાસૈશ્ચ નિર્વિણ્ણા વયં સર્વે પિતામહ

તસ્માત્સદુપદેશં ત્વં કિંચિદ્દાતુમિહાર્હસિ ॥
તરામો યેન દેવેશ દુર્ગં સંસારસાગરમ્

અયાચિતોપચારૈશ્ચ જપહોમૈઃ સુદુષ્કરૈઃ ॥
મન્ત્રૈર્વ્રતૈસ્તથા દાનૈઃ સ્વર્ગપ્રાપ્તિં વદસ્વ નઃ

તેષાં તદ્વચનં શ્રુત્વા તદા દેવઃ કૃપાન્વિતઃ ॥
ચિંતયામાસ સુચિરમિહ કિંચિત્પ્રહસ્ય ચ

તતઃ સ્વકં પદં ત્યક્ત્વા રમ્યે પર્વતરોધસિ ॥
અથોવાચ મુનીન્સર્વાન્બ્રહ્મા સંશ્લક્ષ્ણયા ગિરા

॥ બ્રહ્મોવાચ ॥ ॥
એતન્મહાપદં રમ્યં સર્વપાતકનાશનમ્ ॥
સ્પૃશંતુ ઋષયઃ સર્વે તતો યાસ્યથ સદ્ગતિમ્ ॥

વિના સ્નાનેન દાનેન વ્રતહોમજપાદિભિઃ॥
હિતાર્થં સર્વલોકાનાં મયા ન્યસ્તં પદં શુભમ્

અસ્મિન્પદે મયા ન્યસ્તે યાંતિ લોકાઃ સહસ્રશઃ॥
સ્પૃશંતુ ઋષયઃ સર્વે દેવાશ્ચાપિ પદં મમ

એકૈવાત્ર પ્રકર્ત્તવ્યા શ્રદ્ધા વાઽવ્યભિચારિણી ॥
યશ્ચ શ્રદ્ધાન્વિતઃ સમ્યક્પદમેતન્મુનીશ્વરાઃ

પૂજયિષ્યતિ સંપ્રાપ્તે કાર્તિકે પૂર્ણિમાદિને ॥
તોયૈઃ ફલૈશ્ચ વિવિધૈર્ગંધમાલ્યાનુલેપનૈઃ

બ્રાહ્મણાન્ભોજયિત્વા તુ મિષ્ટાન્નેન સ્વશક્તિતઃ ॥
સ યાસ્યતિ ન સન્દેહો મમ લોકં સુદુર્લભમ્

॥ પુલસ્ત્ય ઉવાચ ॥ ॥
તતો મુનિગણાઃ સર્વે સમ્યક્છ્રદ્ધાસમન્વિતાઃ ॥
પૂજયિત્વા પદં તત્ર બ્રહ્મલોકં સમાગતાઃ

તસ્માત્સર્વપ્રયત્નેન પદં પૂજ્યં નરોત્તમ ॥
પિતામહપદં સમ્યક્છ્રદ્ધયા સ્વર્ગદાયકમ્

અન્યત્કૌતૂહલં રાજન્મહદ્દૃષ્ટં મહાદ્ભુતમ્ ॥
પદસ્ય તસ્ય યચ્છ્રુત્વા જાયતે વિસ્મયો મહાન્

આયામવિસ્તરેણાઽપિ પ્રાપ્તે કૃતયુગે નૃપ ॥
ન સંખ્યા જાયતે રાજઞ્છુક્લવર્ણસ્ય માનવૈઃ

તતસ્ત્રેતાયુગે પ્રાપ્તે રક્તવર્ણં પ્રદૃશ્યતે ॥
સુવ્યક્તં સંખ્યયા યુક્તં સર્વલોકનમસ્કૃતમ્

દ્વાપરે કપિલં તચ્ચ લઘુમાત્રં પ્રદૃશ્યતે ॥
કલૌ કૃષ્ણં સુસૂક્ષ્મં ચ રમ્યે પર્વતરોધસિ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે તૃતીયેઽર્બુદખંડે બ્રહ્મપદોત્પત્તિમાહાત્મ્યવર્ણનંનામ ત્રિપઞ્ચાશત્તમોઽધ્યાયઃ