Skanda Purana · Verses 7.52-2

// īśvara uvāca // //
paṃcātha siddhaliṃgāni kathayāmi yaśasvini //
yeṣāṃ darśanato devi siddhā yātrā bhavennṛṇām

someśādīśadigbhāge varāroheti yā smṛtā //
tasyāśca pūrvadigbhāge devaṃ siddheśvaraṃ param //
abhigamya naro bhaktyā aṇimādikamāpnuyāt

siddhaiḥ pratiṣṭhitaṃ liṃgaṃ dṛṣṭvā bhaktyā tu mānavaḥ //
mucyate pātakaiḥ sarvaiḥ siddhalokaṃ sa gacchati

vighnāni nāśamāyāṃti tatra kṣetranivāsinām //
kāmaḥ krodho bhaya lobho rāgo matsara eva ca

īrṣyā daṃbhastathā''lasyaṃ nidrā mohastvahaṃkṛtiḥ //
etāni vighnarūpāṇi siddhervighnakarāṇi tu

tāni nāśaṃ samāyāṃti tatra siddhe śvarārcanāt //
evaṃ jñātvā tu yatnena tatra yātrāṃ samācaret

ityevaṃ kathitaṃ devi siddheśvaramahodayam//
sarvakāmapradaṃ nṛṇāṃ śrutaṃ pātakanāśanam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe prathame prabhāsakṣetramāhātmye siddheśvaramāhātmyavarṇanaṃnāma dvipañcāśattamo'dhyāyaḥ