સ્કંદ પુરાણ · અધ્યાય 7.51

॥ પુલસ્ત્ય ઉવાચ ॥ ॥
તતો ગચ્છેન્નૃપશ્રેષ્ઠ ચંદ્રોદ્ભેદમનુત્તમમ્ ॥
તીર્થં પાપહરં નૃણાં નિશાનાથેન નિર્મિતમ્

પ્રતિજ્ઞાતં યદા રાજન્ગ્રહણે ચંદ્રસૂર્યયોઃ ॥
રાહુણા કૃતવૈરેણ ચ્છિન્ને શિરસિ વિષ્ણુના

તદા ભયાન્વિતશ્ચન્દ્રો મત્વા દૈત્યં દુરાસદમ્॥
પીયૂષભક્ષણોદ્યુક્તં તતશ્ચાર્બુદમભ્યગાત્

તત્ર ભિત્ત્વા ગિરેઃ શૃંગે કૃત્વા વિવરમુત્તમમ્॥
પ્રવિષ્ટસ્તસ્ય મધ્યે તુ તપસ્તેપે સુદુશ્ચરમ્

તતઃ કાલેન મહતા તુષ્ટસ્તસ્ય મહેશ્વરઃ ॥
અબ્રવીદ્વૃણુ ભદ્રં તે વરં યત્તે હૃદિસ્થિતમ્

॥ ચંદ્ર ઉવાચ ॥ ॥
પ્રતિજ્ઞાતં સુરશ્રેષ્ઠ રાહુણા ગ્રહણં મમ ॥
બલવાનેષ દુર્ધર્ષઃ પ્રકૃત્યા સિંહિકાસુતઃ

સાંપ્રતં ભક્ષિતં તેન પીયૂષં સુરસત્તમ ॥
અહં મધ્યે ધૃતશ્ચાપિ રાહુણાઽસૌ દુરાસદઃ

પીયમાનેઽમૃતે દેવ દેવૈઃ પૂર્વં પરાજિતૈઃ ॥
દૈવતં રૂપમાસ્થાય દાનવોઽસૌ સમાગતઃ

અપિબચ્ચામૃતં રાહુસ્તેનાસ્ય મૃત્યુવર્જિતમ્ ॥
અમૃતં ચાક્ષયં જાતં શિરો દેવભયપ્રદમ્

તતો દેવૈઃ કૃતં સામ ગ્રહમધ્યે પ્રતિષ્ઠિતઃ ॥
પ્રતિજ્ઞાતે ગ્રહેઽસ્માકં તતો મે ભયમાવિશત્

ભયાત્તસ્ય સુરશ્રેષ્ઠ ભિત્ત્વા શૃંગં ગિરેરિદમ્ ॥
કૃતં શ્વભ્રમગાધં ચ તપોઽર્થં સુરસત્તમ ॥
તસ્માદત્ર પ્રસાદં મે કુરુ કામનિષૂદન

॥ ભગવાનુવાચ ॥ ॥
અવધ્યઃ સર્વદેવાનામજેયઃ સ મહાબલઃ ॥
કરિષ્યતિ ગ્રહં નૂનં રાહુઃ કોપપરાયણઃ ॥
પરં તવ નિશાનાથ કરિષ્યેઽહં પ્રતિક્રિયામ્

ગ્રહણે તવ સંપ્રાપ્તે સ્નાનદાનાદિકાઃ ક્રિયાઃ ॥
કરિષ્યંતિ જના લોકે સમ્યક્છ્રેયઃસમન્વિતાઃ

તાભિસ્તવ ન સંતાપઃ સ્વલ્પોઽપ્યેવં ભવિષ્યતિ ॥
અક્ષયં સુકૃતં તેષાં કૃતં કર્મ ભવિષ્યતિ

ગ્રહણે તવ સંજાતે મમ વાક્યાદસંશયમ્ ॥
એતદ્ભિન્નં ત્વયા યસ્માત્તપોઽર્થં શિખરં ગિરેઃ ॥
ચન્દ્રોદ્ભેદમિતિ ખ્યાતં તીર્થં લોકે ભવિષ્યતિ

ગ્રહણે તવ સંપ્રાપ્તે યોઽત્ર સ્નાનં કરિષ્યતિ ॥
ન તસ્ય પુનરેવાત્ર જન્મ લોકે ભવિષ્યતિ

યો વા સોમદિને સ્નાનં દર્શનં તત્ર ચાચરેત્ ॥
તવ લોકે ધ્રુવં વાસસ્તસ્ય ચંદ્ર ભવિષ્યતિ

એવમુક્ત્વા સ ભગવાંસ્તતશ્ચાંતર્દધે હરઃ॥
ચન્દ્રોઽપિ પ્રયયૌ હૃષ્ટઃ સ્વસ્થાનં નૃપસત્તમ

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખણ્ડે તૃતીયેઽર્બુદખણ્ડે ચન્દ્રોદ્ભેદતીર્થમાહાત્મ્યવર્ણનંનામૈકપંચાશત્તમોઽધ્યાયઃ ॥