Skanda Purana · Verses 7.49-2

// īśvara uvāca // //
tasmācchukreśvarādgaccheddevi liṃgaṃ mahāprabham//
śanaiścaraiśvaraṃnāma mahāpātakanāśanam

budheśvarātpaścimato hyajādevyagnigocare //
tasyā dhanuḥ paṃcakena nātidūre vyavasthitam

kalpaliṃgaṃ mahādevi pūjitaṃ devadānavaiḥ //
chāyāputreṇa saṃtaptaṃ tapaḥ paramaduṣkaram

anādi nidhano devo yena liṃge'vatāritaḥ //
prāptavānyo graheśatvaṃ bhaktyā śaṃbhoḥ prasādataḥ

yasya dṛṣṭyā bibheti sma devāsuragaṇo mahān //
na sa ko'pyasti vai prāṇī brahmāṃḍe sacarācare

devo vā dānavo vāpi sauriṇā pīḍito na yaḥ //
śanivāreṇa saṃpūjya bhaktyā saurīśvaraṃ śivam //

śamīpatrairmahādevi tilamāṣaguḍaudanaiḥ //
saṃtarpya tu vidhānena dadyātkṛṣṇaṃ vṛṣaṃ dvije

stutvā stotraiśca vividhaiḥ purāṇaśrutisaṃbhavaiḥ //
atha vaikena deveśaḥ stotreṇa paritoṣitaḥ

rājñā daśarathenaiva kṛtena tu balīyasā //
stutyaḥ saurīśvaro devaḥ sarvapīḍopaśāṃtaye

// devyu vāca // //
kathaṃ daśaratho rājā cakre śānaiścarīṃ stutim //
kathaṃ saṃtuṣṭimagamattasya devaḥ śanaiścaraḥ

// īśvara uvāca // //
raghuvaṃśe'ti vikhyāto rājā daśaratho balī //
cakravartī sa vijñeyaḥ saptadvīpādhipaḥ purā

kṛttikāṃte śaniṃ kṛtvā daivajñairjñāpito hi saḥ //
rohiṇīṃ bheda yitvā tu śaniryāsyati sāṃpratam

uktaṃ śakaṭabhedaṃ tu surāsurabhayaṃkaram //
dvādaśābdaṃ tu durbhikṣaṃ bhaviṣyati sudāruṇam

etacchrutvā munervākyaṃ maṃtribhiḥ sahito nṛpaḥ //
ākulaṃ tu jagaddṛṣṭvā paurajānapadādikam

vadaṃti satataṃ lokā niyamena samāgatāḥ //
deśāśca nagara grāmā bhayākrāṃtāḥ samaṃtataḥ //
munīnvasiṣṭhapramukhānpapraccha ca svayaṃ nṛpaḥ

// daśaratha uvāca // //
samādhānaṃ kimatrāste brūhi me dvija sattama

// vasiṣṭha uvāca // //
prājāpatye ca nakṣatre tasminbhinne kutaḥ prajāḥ //
ayaṃ yogo hyasādhyastu brahmādīṃdrādibhiḥ suraiḥ//

tadā saṃciṃtya manasā sāhasaṃ paramaṃ mahat //
samādāya dhanurdivyaṃ divyairastraiḥ samanvitam

rathamāruhya vegena gato nakṣatramaṃḍalam ///
rathaṃ tu kāṃcanaṃ divyaṃ maṇiratnavibhūṣitam

dhvajaiśca cāmaraiśchatraiḥ kiṃkiṇairatha śobhitam//
haṃsavarṇahayairyuktaṃ mahāketusamanvitam

dīpyamāno mahāratnaiḥ kirīṭamukuṭojjvalaḥ //
babhrāja sa tadākāśe dvitīya iva bhāskaraḥ

ākarṇaṃ cāpamāpūrya saṃhārāstraṃ niyojya ca //
kṛttikāṃte śaniṃ jñātvā praviśya kila rohiṇīm

dṛṣṭvā daśaratho'syāgre tasthau sabhrukuṭīmukhaḥ //
saṃhārāstraṃ śanirdṛṣṭvā surāsuravimarddanam//

hasitvā tadrayātsauriridaṃ vacanamabravīt //
pauruṣaṃ tava rājeṃdra paraṃ ripubhayaṃkaram

devāsuramanuṣyāśca siddhavidyādharoragāḥ //
mayā vilokitāḥ sarve bhayaṃ cāśu vrajaṃti te

tuṣṭohaṃ tava rājeṃdra tapasā pauruṣeṇa ca //
varaṃ brūhi pradāsyāmi manasā yadabhīpsitam

//
// daśaratha uvāca // //
rohiṇīṃ bhedayitvā tu na gaṃtavyaṃ tvayā śane //
saritaḥ sāgarā yāvadyāvaccadrārkamedinī

yācitaṃ te mayā saure nānya micchāmi te varam //
evamuktaḥ śaniḥ prādādvaraṃ tasmai tu śāśvatam

prāpyaivaṃ tu varaṃ rājā kṛtakṛtyo'bhavattadā //
punarevābravītsaurirvaraṃ varaya suvrata

prārthayāmāsa hṛṣṭātmā varamevaṃ śanestadā //
na bhettavyaṃ ca śakaṭaṃ tvayā bhāskaranaṃdana

dvādaśābdaṃ tu durbhikṣaṃ na kartavyaṃ kadācana //
kīrtireṣā madīyā ca trailokye vicariṣyati

// īśvara uvāca // //
varadvayaṃ tataḥ prāpya hṛṣṭaromā sa pārthivaḥ //
rathopari dhanurmuktvā bhūtvā caiva kṛtāṃjaliḥ

dhyātvā sarasvatīṃ devīṃ gaṇanāthaṃ vināyakam //
rājā daśarathaḥ stotraṃ saureridamathākarot

//
// rājovāca // //
namo nīlamayūkhāya nīlotpalanibhāya ca //
namo nirmāṃsadehāya dīrghaśmaśrujaṭāya ca

namo viśālanetrāya śuṣkodarabhayāna ka //
namaḥ paruṣagātrāya sthūlaromāya vai namaḥ

namo nityaṃ kṣudhārttāya nityataptāya vai namaḥ //
namaḥ kālāgnirūpāya kṛtāṃtaka namostu te

namo dīrghāya śuṣkāya kāladṛṣṭe namo'stu te //
namaste koṭarākṣāya durnirīkṣyāya vai namaḥ

namo ghorāya raudrāya bhīṣaṇāya karā line //
namaste sarvabhakṣāya valīmukha namo'stu te

sūryaputra namaste'stu bhāskare bhayadāyaka //
adhodṛṣṭe namastubhyaṃ vapuḥśyāma namo'stu te

namo mandagate tubhyaṃ nistriṃśāya namonamaḥ //
namasta ugrarūpāya caṇḍatejāya te namaḥ

tapasā dagdhadehāya nityaṃ yogaratāya ca //
namaste jñānanetrāya kaśyapātmajasūnave

tuṣṭo dadāsi vai rājyaṃ ruṣṭo harasi tatkṣaṇāt //
devāsuramanuṣyāśca paśupakṣisarīsṛpāḥ

tvayā vilokitāḥ saure dainyamāśu vrajaṃti ca //
brahmā śakro yamaścaiva ṛṣayaḥ saptatārakāḥ

rājyabhraṣṭāśca te sarve tava dṛṣṭyā vilokitāḥ //
deśāśca nagaragrāmā dvīpāścaivādrayastathā

raudradṛṣṭyā tu ye dṛṣṭāḥ kṣayaṃ gacchaṃti tatkṣaṇāt

prasādaṃ kuru me saure varārthe'haṃ tavāśritaḥ
saure kṣamasvāparādhaṃ sarvabhūtahitāya ca

// īśvara uvāca // //
evaṃ stutastadā saurī rājñā daśarathena ca //
maharājaḥ śanirvākyaṃ hṛṣṭaro mā'bravīdidam

// śaniruvāca // //
tuṣṭo'haṃ tava rājendra stavenānena suvrata //
varaṃ brūhi pradāsyāmi svecchayā raghunaṃdana

//
// daśaratha uvāca // //
adyaprabhṛti piṃgākṣa pīḍā kāryā na kasyacit //
devāsuramanuṣyāṇāṃ paśupakṣisarīsṛpām

// śaniruvāca // //
grahāṇāṃ durgraho jñeyo grahapīḍāṃ karomyaham //
adeyaṃ prārthitaṃ rājankiṃcidyuktaṃ dadāmyaham

tvayā proktaṃ mama stotraṃ ye paṭhi ṣyaṃti mānavāḥ //
puruṣāśca striyo vāpi madbhayenopapīḍitāḥ

devāsuramanuṣyāstu siddhavidyādharoragāḥ //
mṛtyusthāne sthito vāpi janmaprāṃtagatastathā

ekakālaṃ dvikālaṃ vā teṣāṃ śreyo dadāmyaham //
pūjayitvā japetstotraṃ bhūtvā caiva kṛtāṃjaliḥ

tasya pīḍāṃ na caivāhamiha kuryāṃ kadācana //
janmasthāne sthito vāpi mṛtyusthāne sthito'pi ca

janmaṛkṣe ca lagne ca daśāsvaṃtardaśāsu ca //
rakṣāmi satataṃ tasya pīḍāṃ cānyagrahasya ca

anenaiva prakāreṇa rpāḍāmuktastvasau bhavet //
etatproktaṃ mayā dattaṃ varaṃ ca raghunaṃdana

// īśvara uvāca // //
varadvayaṃ ca saṃprāpya rājā daśarathaḥ purā //
mene kṛtārthamātmānaṃ namaskṛtya śanaiścaram

śaniṃ stutvā'bhyanujñāto rathamāruhya vīryavān //
svasthānaṃ gatavānrājā pūjyamāno divaukasaiḥ

ya idaṃ prātarutthāya saurivāre paṭhennaraḥ //
sarvagrahodbhavā pīḍā na bhavedbhuvi tasya tu

śanaiścaraṃ smareddevaṃ nityaṃ bhaktisamanvitaḥ //
pūjayitvā paṭhetstotraṃ tasya tuṣyati bhāskariḥ

iti te kathitaṃ devi māhātmyaṃ śanidaivatam //
sarvapāpopaśamanaṃ sarvakāmaphalapradam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathamaṃ prabhāsakṣetramāhātmye śanaiścareśvaramāhātmyavarṇanaṃnāmaikonapañcāśo'dhyāyaḥ