Skanda Purana · Verses 7.5-3

// sūta uvāca // //
ityevamukte vipreṃdrā śaṃkareṇa mahātmanā //
punaḥ papraccha sā devī harṣasaṃpūrṇamānasā

// devyuvāca // //
devadeva jagannātha sarvaprāṇahitāya vai //
prabhāsakṣetramāhātmyaṃ vistarādvada me prabho

// īśvara uvāca // //
anyaddṛṣṭāṃtarūpaṃ te kathayāmi yaśasvini //
yena sṛṣṭaṃ mahādevi kṣetrametanmama priyam

yā gatirdhyāyatāṃ nityaṃ niḥsaṃgānāṃ ca yoginām //
saivaṃ saṃtyajatāṃ prāṇānprabhāse tu parā gatiḥ

anekakalpasthāyī ca mārkaṃḍeyo mahātapāḥ //
so'pi devaṃ virūpākṣaṃ prabhāse tu sadā'rcati

aṭitvā sarvatīrthāni prabhāsaṃ naiva muṃcati //
durvāsāśca mahātejā liṃgasyārādhanodyataḥ //
na muṃcati kṣaṇaṃ devi tatkṣetraṃ śaśimaulinaḥ

bharadvājo marīciśca muniścoddālakastathā //
kratuścaiva vasiṣṭhaśca kaśyapo bhṛgureva ca /// ७ ////
dakṣaścaiva tu sāvarṇiryamaścāṃgirasastathā// //
śuko vibhāṃḍakaścaiva ṛṣyaśṛṃgo'tha gobhilaḥ

gautamaśca ṛcīkaśca agastyaḥ śaunako mahān//
nārado jamadagniśca viśvāmitro'tha lomaśaḥ

anye ca ṛṣayaścaiva divyā devarṣayastathā //
na muṃcaṃti mahākṣetraṃ liṃgasyārādhanodyatāḥ

ahaṃ tatraiva tiṣṭhāmi liṃgārādhanatatparaḥ //
na muṃcāmi mahākṣetraṃ satyaṃsatyaṃ varānane

sarvatīrthāni deveśi mayā dṛṣṭāni bhūtale //
prabhāsena samaṃ kṣetraṃ naiva dṛṣṭaṃ kadācana

devi ṣaṣṭisahasrāṇi yājñavalkyapuraskṛtāḥ //
japaṃ kurvaṃti rudrāṇāṃ candrabhāgāṃ vyavasthitāḥ

catvāriṃśatsahasrāṇi ṛṣīṇāmūrddhvaretasām //
devikātaṭamāśritya japaṃti śatarudriyam

koṭayaścaiva paṃcāśanmunīnāmūrddhvaretasām //
umāpatiṃ samāsādya liṃgaṃ tatraiva saṃsthitam

rudrāṇāṃ koṭi jāpyaṃ tu kṛtaṃ tatraiva taiḥ purā //
koṭistatraiva saṃsiddhāstasmiṃlliṃge na saṃśayaḥ

śataṃ caiva sahasrāṇāṃ deveśaṃ śaśibhūṣaṇam //
pūjayaṃti mahāsiddhā mama kṣetraniṣeviṇaḥ

vedāṃteṣu ca yatproktaṃ phalaṃ caiva maharṣibhiḥ //
tatphalaṃ sakalaṃ tatra caṃdrabhūṣaṇadarśanāt

agnitīrthe ṛṣīṇāṃ tu koṭiḥ sāgrā sthitā śubhe //
rudreśvare smṛtaṃ lakṣaṃ kaṃparddīśe tathaiva ca

ratneśvare sahasraṃ tu ṛṣīṇāmūrddhvaretasām //
arkasthale mahāpuṇye koṭiḥ sāgrā sthitā śubhe

ṣaṣṭiścaiva sahasrāṇi tatra siddheśvare sthitāḥ //
sapta caiva sahasrāṇi mārkaṃḍeye tu saṃsthitāḥ

sarasvatyāṃ brahmakuṇḍe'saṃkhyātā munayaḥ smṛtāḥ //
daśārbudasahasrāṇi koṭitritayameva ca

ṛṣayastatra tiṣṭhaṃti yatra prācī sarasvatī //
brahmahatyā gatā yatra śaṃkarasya ca tatkṣaṇāt

kāyaḥ suvarṇatāṃ prāpa kapālaṃ patitaṃ karāt //
jñātvaivaṃ śaṃkinā pūrvaṃ kṛtaṃ tatra mahātapaḥ

tuṣṭaḥ śrīśaṃkaro devo liṃga vāsavareṇa tu //
koṭiyajñaphalaṃ snāne prācyāṃ liṃgasya pūjane

piṃḍe gayāśataguṇamamāsomayute dine //
bhūtāyāṃ piṃḍadastatra kulakoṭiṃ samuddharet

ye cātra malanāśāya nimaṅkṣyaṃti ca mānavāḥ //
daśagodānajaṃ puṇyaṃ teṣāmapi bhaviṣyati

pādena vā krīḍamānā jalaṃ lipsaṃti ye narā //
teṣāmapi śrāddhaphalaṃ vidhivatsaṃbhaviṣyati //
tatra liṃgāni pūjyāni śūlabhedādikāni tu

evaṃ vikalpya liṃgāni aśvamedha phalāni tu //
darśanenāpi sarveṣāṃ sparśāddhi dviguṇaṃ phalam

evaṃ tuṣṭo jagannāthaḥ sthitaḥ prācīvane dhruvam //
mano'pi ye kariṣyaṃti snānadāneṣu kā kathā

/
teṣāṃ tuṣṭo jagannāthaḥ śaṃkaro nīlalohitaḥ //
triṃśatkoṭigaṇastatra prācīṃ rakṣaṃti sarvataḥ

mahāpāpasamācāraḥ pāpiṣṭho vā'ti kilbiṣī //
ghuṇākṣaramiva prāṇānprācyāṃ muktvā śivaṃ vrajet

dadhikaṃbaladānaṃ tu tatra deyaṃ dvijottame //
kathitaṃ pāpaśamanaṃ sārātsārataraṃ dhruvam

adhunā saṃpravakṣyāmi hiraṇyāśca mahodayam //
durvāsasā tapastaptaṃ tatra sūryaḥ pratiṣṭhitaḥ

koṭirekā tu tatraiva ṛṣīṇāmūrddhvaretasām //
caturviṃśatitattvānāmadhiko balarūpadhṛk

yatra tiṣṭhati deveśi bhṛgukoṭisamanvitaḥ //
anyatra brāhmaṇānāṃ tu koṭyā yacca phalaṃ labhet

brahmasthāne tathaikena bhojitena tu tatphalam //
evaṃ jñātvā mahādevi tatra tiṣṭhāmi nirvṛtaḥ//
koṭirbhirdevaṛṣibhirdevaiḥ saha samāvṛtaḥ //
tīrthāni tatra tiṣṭhaṃti aṃtarbhūtāni vai kalau

tatra kṣetre mahāramye yatra someśvaraḥ sthitaḥ//
mama devi gaṇau dvau tu vibhramaḥ saṃbhramaḥ paraḥ

tau cātra kṣetrasaṃsthānāṃ lokānāṃ bhramavibhramaiḥ //
yojayaṃti sadā cittaṃ vikalpānaikyasaṃkulam

vināyakopasargāśca daśa doṣāstathā pare //
evaṃ kṣetraṃ tu rakṣaṃti pāpināṃ duṣṭacetasām

daṃḍapāṇiṃ tu ye bhaktyā paśyaṃtīha narottamāḥ //
na teṣāṃ jāyate vighnaṃ tatra kṣetranivāsinām

brāhmaṇāḥ kṣatriyā vaiśyāḥ śūdrā vai varṇasaṃkarāḥ //
akāmā vā sakāmā vā prabhāse ye mṛtāḥ śubhe

caṃdrārddhamaulinaḥ sarve lalāṭākṣā vṛṣadhvajāḥ //
śive mama pure divye jāyaṃte tatra mānavāḥ

yastatra vasate vipraḥ saṃyatātmā samāhitaḥ //
trikālamapi bhuṃjāno vāyubhakṣasamo bhavet

meroḥ śakyā guṇā vaktuṃ dvīpānāṃ ca guṇāstathā //
samudrāṇāṃ ca sarveṣāṃ śakyā vaktuṃ guṇāḥ priye

ādidevasya deveśi maheśasya mahāprabhoḥ //
śakyā naiva guṇā vaktuṃ varṣākoṭiśatairapi

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye kṣetrastharṣidevagaṇavarṇanaṃ nāma paṃcamo'dhyāyaḥ