Skanda Purana · Verses 7.5-2

// prahlāda uvāca // //
tato gaccheddvijaśreṣṭhā gomatīṃ kṛṣṇasaṃśrayām //
yasyā darśanamātreṇa mucyate sarvapātakaiḥ //
sarvapāpavinirmuktaḥ kṛṣṇasāyujyamāpnuyāt

duritaughakṣayakaramamaṃgalyavināśanam //
sarvakāmapradaṃ nṝṇāṃ praṇamedgomatījalam

mahāpāpakṣayakaramagatīnāṃgatipradam //
pūrvapuṇyavaśātprāptaṃ praṇamedgomatījalam

// ṛṣaya ūcuḥ // //
daityendra saṃśayo'smākaṃ taṃ tvaṃ chettumihārhasi //
iyaṃ kā gomatī tatra kenānītā mahāmate

kena kāryavaśeneha saṃprāptā varuṇālayam //
sarvaṃ bhāgavataśreṣṭha hyetadvistarato vada

// prahlāda uvāca // //
ekārṇave purā bhūte naṣṭe sthāvara jaṃgame //
tadā brahmā samabhavadviṣṇornābhisaroruhāt

ādiṣṭaḥ prabhuṇā brahmā sṛjasva vividhāḥ prajāḥ //
iti dhātā samādiṣṭo hariṇā sṛṣṭi kāraṇe

uktvā bāḍhamiti brahmā tataḥ sṛṣṭau mano dadhe //
sasarja mānasātsadyaḥ sanakādyānkumārakān //
uvāca vacanaṃ brahmā prajāḥ sṛjata putrakāḥ

brahmaṇo vacanaṃ śrutvā te kṛtāṃjalayo'bruvan //
bhagavanbhagavadrūpaṃ draṣṭukāmā vayaṃ prabho

na bandhamanuvarttāmaḥ sṛṣṭirūpaṃ durāsadam//
ityuktvā te yayuḥ sarve sanakādyā kumārakāḥ

paścimāṃ diśamāsthāya tīre nadanadīpateḥ //
tejomayasya rūpasya draṣṭukāmā mahātmanaḥ //
tasminmānasamādhāya tepire paramaṃ tapaḥ

bahuvarṣasahasraistu prasanne dharaṇīdhare //
bhittvā jalaṃ samuttasthau tejorūpaṃ durāsadam //

anekadaityadamanaṃ bahuyaṃtravidāraṇam //
sūryakoṭiprabhābhāsaṃ sahasrāraṃ sudarśanam

taṃ dṛṣṭvā vismitāḥ sarve brahmaputrāḥ parasparam //
vīkṣamāṇā bhagavataḥ paramāyudhamuttamam

tānvilokya tathābhūtānvāguvācāśarīriṇī //
bho brahmaputrā bhagavāñchrīghramāvirbhaviṣyati

arhaṇārthaṃ bhagavataḥ śīghramarghyaṃ prakalpyatām//
āyudhaṃ lokanāthasya dvijāḥ śīghraṃ prasādyatām

tacchrutvā''kāśavacanaṃ tuṣṭuvuste sudarśanam

ṛṣaya ucuḥ // //
jyotirmaya namaste'stu namaste harivallabha //
sudarśana namaste'stu sahasrārā'kṣarā'vyaya

namaste sūryarūpāya brahma rūpāya te namaḥ //
amoghāya namastubhyaṃ rathāṃgāya namonamaḥ

evaṃ te pūjayāmāsuḥ sumanobhistathā'kṣataiḥ

stavairnānāvidhaiḥ stutvā praṇemurharivallabham //
tatprasādya sunābhaṃ tu prabhusaṃdarśanotsukāḥ

asmaranmanasā devaṃ brahmāṇaṃ pitaraṃ svakam //
teṣāṃ tu ciṃtitaṃ jñātvā brahmā gaṃgāmathābravīt

yāhi śīghraṃ saricchreṣṭhe pṛthivyāṃ harikāraṇāt //
gāṃ gatā tvaṃ mahābhāge tato bahumatā'si me

urvyāṃ te gomatī nāma suprasiddhaṃ bhaviṣyati

vasiṣṭhasyānugā bhūtvā yāhi śīghraṃ dharātalam //
tātaṃ putrīvānuyātā vasiṣṭhatanayā bhava

bāḍhamityeva sā devī prasthitā varuṇālayam //
vasiṣṭhastvagrato yāti taṃ gaṃgā pṛṣṭhato'nvagāt

tāṃ dṛṣṭvā manujāḥ sarve vasiṣṭhena samanvitām //
namaścakrurmahābhāgāṃ gacchato paścimārṇavam

āvirbabhūva tatraiva yatra te munayaḥ sthitāḥ //
draṣṭukāmā hare rūpaṃ śriyā juṣṭaṃ caturbhujam

dṛṣṭvā vasiṣṭhamanugāmāyāntīṃ surapāvanīm //
avākiranmahābhāgāṃ sumanobhiśca sarvaśaḥ

divyairmālyaiḥ sugandhaiśca gandhadhūpaistathā'kṣataiḥ //
saṃpūjya hṛṣṭamanasaḥ sādhusādhviti cābruvan

vasiṣṭhaṃ te'gragaṃ dṛṣṭvā hyudatiṣṭhaṃstato dvijāḥ //
arghyādisatkriyāṃ kṛtvā prahṛṣṭā idamabruvan //

yasmāttvayā samānītā hyasmim̐lloke saridvarā //
tasmāttava sutetyevaṃ khyātiṃ loke gamiṣyati

goḥ svargādāgatā yasmādidaṃ sthānaṃ matī matā //
tasmāddhi gomatīnāma khyātiṃ loke gamiṣyati

asyā darśanamātreṇa muktiṃ yāsyaṃti mānavāḥ //
kiṃ punaḥ snāna dānādi kṛtvā yāṃti hareḥ padam

tāmeva cārghyaṃ dattvā te yogīṃdrā īḍire harim //
paraṃ puruṣasūktena puruṣaṃ śeṣaśāyinam

iti saṃstuvatāṃ teṣāṃ harirāvirbabhūva ha //
pītakauśeyavasano vanamālāvibhūṣitaḥ //
divyamālyānuliptāṃgo divyābharaṇabhūṣitaḥ

śeṣāsanagataṃ devaṃ divyānekodyatāyudham //
jvalatkirīṭamukuṭaṃ sphuranmakarakuṃḍalam

bhaktābhayapradaṃ śāṃtaṃ śrīvatsāṃkaṃ mahābhujam //
sadā prasannavadanaṃ ghanaśyāmaṃ caturbhujam

pādasaṃvāhanāsaktalakṣmyā juṣṭaṃ manoharam //
taṃ dṛṣṭvā munayaḥ sarve harṣotkarṣasamanvitāḥ //
viṣṇuṃ te viṣṇusūktaiśca tuṣṭuvurvedasaṃbhavaiḥ

evaṃ saṃstuvatā teṣāṃ viṣṇurdīnānukaṃpakaḥ //
uvāca suprasannena manasā dvijasattamān

// śrībhagavānuvāca // //
bhobhoḥ kumārāstuṣṭo'haṃ pradāsyāmi yathepsitam //
bhaviṣyatha jñānayutā aspṛṣṭā mama māyayā

yasmānmokṣārthibhirviprā jalenāhaṃ prasāditaḥ //
tasmādidaṃ paraṃ tīrthaṃ sarvakāmapradaṃ param

anugrahāya bhavatāṃ yatra cakraṃ sudarśanam //
niḥsṛtaṃ prathamaṃ viprā jalaṃ bhittvā mamāgrataḥ //

cakratīrthamiti khyātaṃ tasmādetadbhaviṣyati //
mamāpi niyataṃ vāso bhaviṣyati mahārṇave

ye'tra snānaṃ prakurvaṃti prasaṃgenāpi mānavāḥ //
cakratīrthe dvijaśreṣṭhāsteṣāṃ muktiḥ kare sthitā

bhavato'pi sadā hyatra tiṣṭhadhvaṃ ca dvijarṣabhāḥ //
vāyubhūtāṃtarikṣasthāḥ sarvakāmasya dāyakāḥ

// prahlāda uvāca // //
tacchrutvā hṛṣṭamanasaḥ kṛtvārghyaṃ surapāvanīm //
avanijya hareḥ pādau mūrdhnā'paścāpyadhārayan //

prakṣālya sā hareḥ pādau praviṣṭā varuṇālayam //
tasminmahāpāpaharā gomatī sāgaraṃ gatā

varaṃ dattvā tato viṣṇustatraivāntara dhīyata //
sanakādyā brahmasutāstasthustatra samāhitāḥ

evaṃ sā gomatī tatra saṃjātā sāgaraṃgamā //
sarvapāpaharā proktā pūrvagaṃgeti yā śrutā //

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe caturthe dvārakāmāhātmyaṃ sanatkumāratapobalena bhagavatprādurbhāva vṛttāntavarṇanapuraḥsara gomatyutpattimāhātmyavarṇanaṃnāma pañcamo'dhyāyaḥ