Skanda Purana · Chapter 7.49

// pulastya uvāca // //
rāmatīrthaṃ tato gacchetpuṇyamṛṣiniṣevitam//
tatra snātasya marttyasya jāyate pāpasaṃkṣayaḥ

pitṝṇāṃ ca parā tuṣṭiryāvadābhūtasaṃplavam //
purāsīdbhārgavo rāmaḥ sarvaśastrabhṛtāṃ varaḥ

tena pūrvaṃ tapastaptaṃ śatrūṇāmicchatā kṣayam//
tataḥ pāśupataṃ nāma tasyāstraṃ paramaṃ dadau

tapastuṣṭo mahādevo gate varṣaśatatraye //
abravīdvarado'smīti sa vavre śatrusaṃkṣayam

tataḥ pāśupataṃ nāma tasyāstraṃ paramaṃ dadau //
smaraṇenāpi śatrūṇāṃ yasya saṃjāyate kṣayaḥ

abravīdvacanaṃ cāpi prahasya vṛṣabhadhvajaḥ //
jāmadagnya mahābāho śṛṇu me paramaṃ vacaḥ

astreṇānena yuktastvamajeyaḥ sarvadehinām //
bhaviṣyasi na saṃdeho matprasādādbhṛgūdvaha

etajjalāśayaṃ puṇyaṃ trailokye sacarācare //
rāmatīrthamiti khyātaṃ matprasādādbhaviṣyati

ye'tra śrāddhaṃ kariṣyaṃti paurṇamāsyāṃ samāhitāḥ //
saṃprāpte kārttike māsi kṛttikāyogasaṃyute

pitṛmedhaphalaṃ teṣāmaśeṣaṃ ca bhaviṣyati //
tathā śatrukṣayo rājanvāsaḥ svargeṣu cākṣayaḥ

// pulastya uvāca // //
evamuktvā mahādevastataścādarśanaṃ gataḥ //
rāmo'pyasūdayatkṣatraṃ pitṛduḥkhena duḥkhitaḥ

triḥsapta tarpayāmāsa pitṝṃstatra praharṣitaḥ //
jamadagnau mṛte tena pratijñātaṃ mahātmanā

dṛṣṭvā mātuḥ kṣatānyaṃge triḥsapta manujādhipa //
śastrajātāni viprāṇāṃ samāje samupasthite

pitā me nihato yasmātkṣatriyaistāpaso dvijaḥ //
ayudhyamāna evātha tasmātkṛtvā trisapta vai

kṣattrahīnāmahaṃ pṛthvīṃ pradāsye salilaṃ pituḥ //
tatsarvaṃ tasya saṃjātaṃ tīrthamāhātmyato nṛpa

tasmātsarvaṃ prayatnena śrāddhaṃ tatra samācaret //
kṣatriyaśca viśeṣeṇa ya icchecchatrusaṃkṣayam

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṃḍe tṛtīye'rbudakhaṃḍe rāmatīrthamāhātmyavarṇanaṃnāmaikonapaṃcāśattamo'dhyāyaḥ