Skanda Purana · Verses 7.48-2

// īśvara uvāca // //
tato gacchenmahādevi liṃgaṃ śukrapratiṣṭhitam//
sarvapāpaharaṃ devi vibhūtīśvarapaścime

nātidūre sthitaṃ tatra svayaṃ śukreṇa nirmitam//
yatra saṃjīvanīṃ prāpto vidyāṃ rudraprabhāvataḥ

saṃtapya tu mahāghoraṃ tapovarṣasahasrakam //
saṃprasādya virūpākṣaṃ yo'vāpa grahatāṃ sudhīḥ

grastena śaṃbhunā yena devakāryārthasiddhaye //
tatrodaragatenaiva tapastaptaṃ suduṣkaram

varṣāṇāmayutaṃ sāgraṃ tuṣṭiṃ nīto maheśvaraḥ //
niṣkāsitastataḥ śīghraṃ śukra mārgeṇa śaṃbhunā

tataḥ śukreti nāmābhūdbhārgavasya mahātmanaḥ //
tadārādhayate liṃgaṃ yaḥ kṛtvā niścalaṃ manaḥ

mṛtyuṃjayaṃ japellakṣaṃ sa samīhitamāpnuyāt

taṃ dṛṣṭvā tvathavā spṛṣṭvā janmādimaraṇāntakāt//
mucyate pātakānmṛtyoḥ prasādāttasya bhāmini

mṛtasaṃjīvanārthaṃ yadaiśvaryamaṇimādikam//
prāpnuyānnātra saṃdeho yasya bhaktiḥ suniścalā

paṃcāmṛtena saṃsnāpya devaṃ śukapratiṣṭhitam//
sugandhapuṣpaiḥ saṃpūjya śaukrīṃ pīḍāṃ sa nāpnuyāt

iti sarvaṃ samāsena māhātmyaṃ śukradaivatam //
kathitaṃ tava suśroṇi śrutaṃ pāpabhayāpaham

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye śukreśvaramāhātmyavarṇanaṃnāmāṣṭacatvāriṃśodhyāyaḥ