સ્કંદ પુરાણ · અધ્યાય 7.49

॥ પુલસ્ત્ય ઉવાચ ॥ ॥
રામતીર્થં તતો ગચ્છેત્પુણ્યમૃષિનિષેવિતમ્॥
તત્ર સ્નાતસ્ય મર્ત્ત્યસ્ય જાયતે પાપસંક્ષયઃ

પિતૄણાં ચ પરા તુષ્ટિર્યાવદાભૂતસંપ્લવમ્ ॥
પુરાસીદ્ભાર્ગવો રામઃ સર્વશસ્ત્રભૃતાં વરઃ

તેન પૂર્વં તપસ્તપ્તં શત્રૂણામિચ્છતા ક્ષયમ્॥
તતઃ પાશુપતં નામ તસ્યાસ્ત્રં પરમં દદૌ

તપસ્તુષ્ટો મહાદેવો ગતે વર્ષશતત્રયે ॥
અબ્રવીદ્વરદોઽસ્મીતિ સ વવ્રે શત્રુસંક્ષયમ્

તતઃ પાશુપતં નામ તસ્યાસ્ત્રં પરમં દદૌ ॥
સ્મરણેનાપિ શત્રૂણાં યસ્ય સંજાયતે ક્ષયઃ

અબ્રવીદ્વચનં ચાપિ પ્રહસ્ય વૃષભધ્વજઃ ॥
જામદગ્ન્ય મહાબાહો શૃણુ મે પરમં વચઃ

અસ્ત્રેણાનેન યુક્તસ્ત્વમજેયઃ સર્વદેહિનામ્ ॥
ભવિષ્યસિ ન સંદેહો મત્પ્રસાદાદ્ભૃગૂદ્વહ

એતજ્જલાશયં પુણ્યં ત્રૈલોક્યે સચરાચરે ॥
રામતીર્થમિતિ ખ્યાતં મત્પ્રસાદાદ્ભવિષ્યતિ

યેઽત્ર શ્રાદ્ધં કરિષ્યંતિ પૌર્ણમાસ્યાં સમાહિતાઃ ॥
સંપ્રાપ્તે કાર્ત્તિકે માસિ કૃત્તિકાયોગસંયુતે

પિતૃમેધફલં તેષામશેષં ચ ભવિષ્યતિ ॥
તથા શત્રુક્ષયો રાજન્વાસઃ સ્વર્ગેષુ ચાક્ષયઃ

॥ પુલસ્ત્ય ઉવાચ ॥ ॥
એવમુક્ત્વા મહાદેવસ્તતશ્ચાદર્શનં ગતઃ ॥
રામોઽપ્યસૂદયત્ક્ષત્રં પિતૃદુઃખેન દુઃખિતઃ

ત્રિઃસપ્ત તર્પયામાસ પિતૄંસ્તત્ર પ્રહર્ષિતઃ ॥
જમદગ્નૌ મૃતે તેન પ્રતિજ્ઞાતં મહાત્મના

દૃષ્ટ્વા માતુઃ ક્ષતાન્યંગે ત્રિઃસપ્ત મનુજાધિપ ॥
શસ્ત્રજાતાનિ વિપ્રાણાં સમાજે સમુપસ્થિતે

પિતા મે નિહતો યસ્માત્ક્ષત્રિયૈસ્તાપસો દ્વિજઃ ॥
અયુધ્યમાન એવાથ તસ્માત્કૃત્વા ત્રિસપ્ત વૈ

ક્ષત્ત્રહીનામહં પૃથ્વીં પ્રદાસ્યે સલિલં પિતુઃ ॥
તત્સર્વં તસ્ય સંજાતં તીર્થમાહાત્મ્યતો નૃપ

તસ્માત્સર્વં પ્રયત્નેન શ્રાદ્ધં તત્ર સમાચરેત્ ॥
ક્ષત્રિયશ્ચ વિશેષેણ ય ઇચ્છેચ્છત્રુસંક્ષયમ્

ઇતિ શ્રીસ્કાંદે મહાપુરાણ એકાશીતિસાહસ્ર્યાં સંહિતાયાં સપ્તમે પ્રભાસખંડે તૃતીયેઽર્બુદખંડે રામતીર્થમાહાત્મ્યવર્ણનંનામૈકોનપંચાશત્તમોઽધ્યાયઃ