Skanda Purana · Chapter 7.48

// pulastya uvāca // //
kulasaṃtāraṇaṃ gacchettatra tīrthamanuttamam //
yatra snāto naraḥ samyakkulaṃ tārayate'khilam

daśa pūrvānbhaviṣyāṃśca tathātmānaṃ nṛpottama //
uddharecchraddhayāyuktastatra dānena mānavaḥ

āsīdaprastuto nāma rājā pūrvaṃ sa pāpakṛt //
nāpi dānaṃ tathā jñānaṃ na dhyānaṃ na ca satkriyā

tasmiñchāsati lokānāṃ nāsītsaukhyaṃ kadācana //
paradāra rucirnityaṃ mahādaṇḍaparaśca saḥ

nyāyato'nyāyato vāpi karoti dhanasaṃgraham //
sa ghātayati lokāṃśca nirdoṣānpāpakṛttamaḥ

tato vārdhakyamāpannastathāpi na śamaṃ gataḥ //
kasyacittvatha kālasya pitṛbhiḥ pratibodhitaḥ //
taṃ prasuptaṃ samāsādya nārakeyaiḥ suduḥkhitaiḥ

// pitara ūcuḥ // //
vayaṃ śuddhasamācārā nityaṃ dharmaparāyaṇāḥ //
dānayajñatapaḥśīlāḥ svadāraniratāstathā

svakarmabhiḥ kulāṃgāra divaṃ prāptā yathārhataḥ //
kuputraṃ tvāṃ samāsādya narakaṃ samupasthitāḥ //
tasmāduddhara naḥ sarvānkṛtvā kiṃcicchubhārcanam

karmabhistava pāpātmanvayaṃ narakamāśritāḥ //
narakaṃ daśa yāsyaṃti bhaviṣyāśca tathā bhavān

evamuktvā ca te sarve pitarastu suduḥkhitāḥ //
yātāśca narakaṃ bhūyaḥ prabuddhaḥ so'pi pārthivaḥ

tato duḥkhamanuprāptaḥ pitṛvākyāni saṃsmaran //
ruroda prātarutthāya taṃ bhāryā pratyabhāṣata

// indumatyuvāca // //
kimarthaṃ rājaśārdūla tvaṃ rodiṣi mahāsvanam //
kathaṃ te kuśalaṃ rājye śarīre vā pure'thavā

//
// rājovāca // //
mayā dṛṣṭo'dya svapnāṃte pitā hyatha pitāmahaḥ //
apaśyaṃ duḥkhitāndevi tābhyāmathāgrajānpitṝn

upālabdho'smi taiḥ sarvaistava karmabhirīdṛśaiḥ //
dāruṇe narake prāptā adharmādiviceṣṭitaiḥ

athānye daśa yāsyanti bhaviṣyāśca bhavānapi //
tasmātkṛtvā śubhaṃ karma durgateścoddharasva naḥ

evamuktaḥ prabuddho'haṃ pitṛbhirvaravarṇini //
tenāhaṃ duḥkhamāpannastadvākyaṃ hṛdi saṃsmaran

//
// indumatyuvāca // //
satyametanmahārāja yadukto'si pitāmahaiḥ //
na tvayā sukṛtaṃ karma saṃsmare'haṃ kṛtaṃ purā

yathā suputramāsādya taraṃti pitaro nṛpa //
kuputreṇa tathā yāṃti narakaṃ nātra saṃśayaḥ

sa tvamāhūya vipreṃdrāndharmaśāstravicakṣaṇān //
pṛṣṭvā tānkuru yacchreyaḥ pitṝṇāmātmanā saha

ānayāmāsa rājā'sau tato viprānanekaśaḥ //
vedavedāṃgatattvajñāndharmaśāstravicakṣaṇān //
uvāca vinayopeto bhāryayā sahito hitān

// rājovāca // //
karmaṇā kena pitaro nirayasthā dvijottamāḥ //
svargaṃ yāṃti suputreṇa tāritāḥ procyatāṃ sphuṭam //

// brāhmaṇā ūcuḥ // //
pitṛmedhena rājeṃdra kṛtena vidhipūrvakam //
nirayasthā divaṃ yāṃti yadyapi syuḥ supāpinaḥ

// rājovāca // //
dīkṣayaṃtu dvijāḥ sarve tadarthaṃ māṃ dhṛtavratam //
yatkiṃcidatra karttavyaṃ procyatāmakhilaṃ hi tat

tathoktāste nṛpeṃdreṇa brāhmaṇāḥ satyavādinaḥ //
samagrāḥ pārthivaṃ procuryaduktaṃ yajñakarmaṇi

dīkṣā grāhyā nṛpaśreṣṭha puraścaraṇamāditaḥ //
kṛtvā kāyaviśuddhyarthaṃ tataḥ śreyaskarī bhavet

sa tvaṃ pāpasamācāro bālyātprabhṛti pārthiva //
asaṃkhyaṃ pātakaṃ tasmāttīrthayātrāṃ samācara

sarvatīrthābhiṣiktastvaṃ yadā syānnṛpasattama //
prāyaścittena yogyaḥ syāstato yajñasya nānyathā

prabhāsādīni tīrthāni yāni saṃti dharātale //
gaṃtavyaṃ teṣu sarveṣu snānaṃ kuru samāhitaḥ

manasā gaccha durgāṇi dadaddānamanuttamam //
naśyettenāśubhaṃ kiṃcidapi brahmavadhodbhavam //
yanna yāti nṛṇāṃ rājaṃstīrthasnānādinā bhuvi

// pulastya uvāca // //
viprāṇāṃ vacanaṃ śrutvā sa rājā śraddhayā'nvitaḥ //
tīrthayātrāparo bhūtvā paribabhrāma medinīm//

niyato niyatāhāro dadaddānāni bhūriśaḥ //
rājye putraṃ pratiṣṭhāpya vasuṃ satyaparākramam

kasyacittvatha kālasya tīrthayātrānuṣaṃgataḥ //
yāto'sau nṛpatiścaiva hyarbude nirmalodakam

sa snānamakarottatra śraddhāpūtena cetasā //
snātamātrasya tasyātha tasminneva jalāśaye //

vimuktāḥ pitaro raudrānnarakātsupraharṣitāḥ //
tato divyavimānasthā divyamālyāṃbarānvitāḥ

tamūcustāritāḥ sarve vayaṃ putra tvayā'dhunā //
tīrthasyāsya prabhāveṇa bhaviṣyāśca tathā daśa

ātmā ca pārthivaśreṣṭha snānācca jalatarpaṇāt //
yasmātkulaṃ tvayā putra tīrthe'smiṃstāritaṃ tataḥ

kulasaṃtāraṇaṃnāma tīrthametadbhaviṣyati //
tasmāttvamapi rājeṃdra sahā'smābhirdivaṃ prati //
āgacchānena dehena tīrthasyāsya prabhāvataḥ

// pulastya uvāca // //
evamuktaḥ sa rājeṃdro divyakāṃtivapustadā //
taṃ vimānamathāruhya gataḥ svargaṃ ca taiḥ saha

eṣa prabhāvo rājarṣe kulasaṃtāraṇasya ca //
mayā te varṇitaḥ samyagbhūyaḥ kiṃ paripṛcchasi

// yayātiruvāca // //
sa kiṃprabhāvo rājā sa tathā pāpasamanvitaḥ //
svadehena gataḥ svargametanme kautukaṃ mahat

// pulastya uvāca // //
rākāsomavyatīpāta samakāle nṛpottama //
sa snāto yatra bhūpālastanmahacchreyase param

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsa khaṇḍe tṛtīye'rbudakhaṃḍe kulasaṃtāraṇatīrthamāhātmyavarṇanaṃnāmāṣṭacatvāriṃśo'dhyāyaḥ