Skanda Purana · Verses 7.47-2

// īśvara uvāca // //
tato gacchenmahādevi devaṃ guruniṣevitam//
umāyāḥ pūrvadigbhāge siddheśāgneyagocare

saṃsthitaṃ tu mahalliṃgaṃ devācārya pratiṣṭhitam //
ārādhya parayā bhaktyā liṃgaṃ varṣasahasrakam

toṣayāmāsa deveśaṃ bhavaṃ śarvamumāpatim //
prāptavānakhilānkāmānaprāpyānakṛtātmabhiḥ

devānāṃ caiva pūjyatvaṃ prāpya jñānamathaiśvaram//
grahatvaṃ ca tathā prāpya modate divi sāṃpratam

taṃ dṛṣṭvā mānavo bhaktyā na durgati mavāpnuyāt//
bṛhaspatikṛtaṃ liṃgaṃ ye paśyaṃti narottamāḥ

bṛhaspatikṛtā pīḍā naiva teṣāṃ hi jāyate //
tatra śuklacaturdaśyāṃ guruvāre tathā priye //

saṃpūjya vidhivalliṃgaṃ samyagrājopacārataḥ //
athavā bhaktibhāvena prāpnuyātparamaṃ padam

snānaṃ palasahasreṇa paṃcāmṛtarasena yaḥ //
karoti bhaktyā martyo vai mucyate sa ṛṇatrayāt

mātṛkātpaitṛkāddevi tathā gurusamudbhavāt //
sarvapāpaviśuddhātmā nirdvaṃdvo muktimāpnuyāt

evaṃ saṃkṣepataḥ proktaṃ māhātmyaṃ gurudaivatam //
śṛṇuyādyastu bhāvena tasya prīto gururbhavet

iti śrīskānde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye vṛhaspatīśvaramāhātmyavarṇanaṃnāma saptacatvāriṃśo'dhyāyaḥ